កាលពីរសៀលថ្ងៃទី១០ ខែសីហា ឆ្នាំ២០២១ លោក ឌុច សុធា ប្រធានសមាគមចលនាយុវជនកម្ពុជា ក្រុម១៥៧ ស្រុកអង្គរជុំ តំណាងលោក ហ៊ុន ប៉ូគា ប្រធានសមាគមចលនាយុវជនកម្ពុជា ក្រុម១៥៧ សាខាខេត្តសៀមរាប រួមនឹងសមាជិក សមាជិកា បាននាំយកទៀនចំណាំព្រះវស្សា, គ្រឿងឧបភោគបរិភោគ, ទេយ្យទាន និងសម្ភារ: មួយចំនួន យកទៅប្រគេនដល់ព្រះសង្ឃដែលគង់ចាំព្រះវស្សានៅវត្តចំនួន២ គឺ: វត្តចន្ទរង្សីពោធិញាណ ហៅវត្តនគរភាស និងវត្តមនោរម្យភ្នំពើងតាន់ ស្ថិតក្នុងស្រុកអង្គរជុំ ខេត្តសៀមរាប។
លោក ឌុច សុធា បានមានប្រសាសន៍ថា សម្ភារ: និងទេយ្យវត្ថុទាំងនេះ គឺបានមកពីការចូលរួមរបស់សមាជិក សមាជិកាសមាគមចលនាយុវជនកម្ពុជា ក្រុម១៥៧ ដែលបានបរិច្ចាគធនធានថវិកាផ្ទាល់ខ្លួនសម្រាប់ចំណាយទិញទៀនវស្សា, សម្ភារ: , គ្រឿងឧបភោគបរិភោគ និងប្រគេនដល់ព្រះសង្ឃនៅក្នុងវត្តនៅរដូវកាលដែលព្រះសង្ឃ ត្រូវធ្វើវដ្តប្រតិបត្តិ ចូលព្រះវស្សាអស់កាលត្រីមាស សម្រាប់ជាចតុប្បច្ច័យភិក្ខុសង្ឃប្រើប្រាស់ ក៏ដូចជាតបទៅនឹងតម្រូវការចាំបាច់របស់ព្រះសង្ឃ ក្នុងពេលគង់ចាំព្រះវស្សា ជាពិសេសក្នុងដំណាក់កាលជួបការលំបាក ដោយវិបត្តិជំងឺកូវីដ-១៩ ដែលកំពុងរាតត្បាតឆ្លងចូលសហគមន៍ជាបន្តបន្ទាប់ ដែលមិនទាន់ស្រាកស្រាន្តនៅឡើយ។ លោក ឌុច សុធា បន្តថា ប្រទេសកម្ពុជា មានពុទ្ធបរិស័ទប្រតិបត្តិតាមគន្លងព្រះពុទ្ធសាសនាជាធំ ហើយការចូលព្រះវស្សា គឺជាកម្មវិធី របស់ព្រះសង្ឃដ៏សំខាន់មួយ ដែលមានរយ:ពេលមួយត្រីមាស ក្នុងរយពេលនេះព្រះសង្ឃមិនអាចនិមន្តចេញក្រៅវត្ត ឬទីឆ្ងាយបានឡើយ ដូចនេះ ជាទម្លាប់ពុទ្ធបរិស័ទជាអ្នកជួយផ្គត់ផ្គង់ចង្ហាន់ដល់ព្រះសង្ឃនិងទារាមផងដែរ។
លោក បន្ថែមថា នៅក្នុងបរិបទជំងឺកូវីដ-១៩ នេះ សូមឲ្យព្រះសង្សគ្រប់អង្គ និងបងប្អូនប្រជាពលរដ្ឋទាំងអស់ ត្រូវបន្តយកចិត្តទុកដាក់ឲ្យបានខ្ពស់ ក្នុងការពារ នៃការឆ្លជំងឺកូវីដ-១៩ ឲ្យបានទាំងអស់គ្នា ដោយត្រូវបន្តធ្វើអនាម័យជាប្រចាំ ដើម្បីការពារខ្លួនយើង ក្រុមគ្រួសារយើង ក៏ដូចជាសង្គមជាតិទាំងមូល។ ជាពិសេសត្រូវអនុវត្តឱ្យជាប្រចាំនូវវិធានការរបស់រាជរដ្ឋាភិបាល គឺ៣កុំ និង ៣ការពារ និងសេចក្តីណែនាំរបស់ក្រសួងសុខាភិបាល ដើម្បីរួមគ្នាការពារទប់ស្កាត់កុំឱ្យមេរោគដ៍សាហាវនេះ រីករាលដាលបន្តឆ្លងចូលសហគមន៍ និងប្រទេសកម្ពុជាយើង។
សូមជម្រាបថា ចំពោះទេយ្យទាន និងសម្ភារ: ដែលប្រគេនដល់វត្តទាំង២ ក្នុងនោះរួមមាន៖ សម្រាបវត្តចន្ទរង្សីពោធិញាណ ហៅវត្តនគរភាស៖ អង្ករ ២បេ ស្មើនឹង ១០០គីឡូក្រាម ,មី ៤កេស ,ទឹកត្រី ១យួរ ,ទឹកស៊ីអុីវ ១យួរ ,ត្រីខ ៣យួរ ,ភេសជ្ជ: ១កេស ,ទឹកសុទ្ឋ ៨យួរ ,ម៉ាស់ ២ប្រអប់ ,ទឹកអាល់កុល ១លីត្រកន្លះ និងឧបករណ៍បាញ់ ១គ្រឿង។ សម្រាបវត្តមនោរម្យភ្នំពើងតាន់ មាន៖ ទានវស្សា ១គូរ ,អង្ករ ១បេ ស្មើនឹង ៥០គីឡូក្រាម ,មី ៣កេស, ត្រីខ ៣យួរ ,ទឹកត្រី ២យួរ ,ទឹកស៊ីអុីវ ២យួរ ,ភេសជ្ជ: ២កេស ,ម៉ាស់ ២ប្រអប់ ,ទឹកអាល់កុល ២លីត្រកន្លះ និងឧបករណ៍បាញ់ ១គ្រឿង៕
អត្ថបទ និងរូបភាព: លោកអ៊ុន ណារាជ្យ កែសម្រួលដោយ លីវ សុខុន!!!
