បើតាមលោក តាន់ ប៊ុនឈឿន ប្រធានក្រុមសន្ដិសុខ និងជាអ្នកដើរទារភាស៊ីផ្សារលើធំថ្មី ក្រុងសៀមរាប បានឱ្យដឹងថា ដើម្បីសុខភាពសុវត្ថិភាព និងដើម្បីទប់ស្កាត់ការឆ្លងជំងឹកូវីដ-១៩ គណៈគ្រប់គ្រងផ្សារ នៅថ្ងៃទី១៣ ខែសីហានេះ បានចាប់ផ្ដើមធ្វើការសំអាតផ្សារ និងបាញ់ថ្នាំសម្លាប់មេរោគ មុននឹងអនុញ្ញាតិឲ្យបងប្អូនអាជីវករចូលលក់ដូរឡើងវិញជាហ៊ានទី១។ ជាមួយគ្នានោះ សម្រាបអាជីវករដូលចូលលក់ដូរក្នុងផ្សារនេះ ត្រូវអនុវត្តឲ្យបាននូវការរក្សាគម្លាតសុវត្ថិភាព ការលក់ដូរប្ដូរវេនគ្នា ពាក់ម៉ាស់ជាប្រចាំ និងធ្វើអនាម័យប្រចាំ ក្នុងនោះអាជីវករត្រូវផ្ដល់សំណាកធ្វើតេស្ដមុនចូលលក់ដូរ ជាពិសេសអាជីវករត្រូវចាក់វ៉ាក់សំាងបង្ការជំងឺកូវីដ-១៩ បើមិនដូច្នេះទេ គណៈគ្រប់គ្រងផ្សារមិនអនុញ្ញាតឲ្យពួកគាត់ចូលលក់ទេ។
លោកបញ្ជាក់ថា នៅក្នុងផ្សារលើធំថ្មីមានអាជីវករលក់ដូរប្រមាណជិត ២០០០នាក់ ខណៈដែលអ្នកផ្ដល់សំណាកធ្វើតេស្ដរកមេរោគកូវីដ-១៩ មុនចូលលក់ដូរក្នុងរយៈពេល២ថ្ងៃ មានចំនួនជាង១ពាន់នាក់។ ជាមួយគ្នានោះលោក និងអាជីវករ ពិតជាសប្បាយចិត្ដណាស់ ក្រោយពេលអាជ្ញាធរបើកអោយលក់ដូរនៅផ្សារលើធំថ្មីនេះឡើងវិញ ព្រោះការលក់ដូរជាការដោះស្រាយជីវភាពប្រចាំថ្ងៃពួកគាត់។
គួររំលឹកថា បើតាមឯកឧត្តម ទៀ សីហា អភិបាលខេត្តសៀមរាប កាលពីពេលថ្មីៗនេះ បានបញ្ជាក់ថា ជាមួយនឹងការបើកសាកល្បងបើកផ្សារលើធំថ្មីឡើងវិញនេះដែរ អាជីវករគឺតម្រូវប្ដូរវេនគ្នាលក់ ដោយក្នុងនោះអ្នកលក់នៅចំហៀងផ្សារអាចលក់បានមួយសប្ដាហ៍ ហើយប្ដូរទៅអោយអាជីវករម្ខាងផ្សារវិញទៀត។ ដោយឡែកចំពោះអាជីវករដែលលក់នៅខាងក្នុងផ្សារ គឺអាចលក់បានរហូត ប៉ុន្តែត្រូវរក្សាគម្លាត និងចងខ្សែព័ន្ធជុំវិញឲ្យមានត្រូវរៀបចំសណ្តាប់ធ្នាប់ល្អ និងវិធានការមួយចំនួនទៀតតាមការណែនាំរបស់អាជ្ញាធរ ដើម្បីបង្ការឆ្លងមេរោគកូវីដ-១៩ ជាពិសេសការរីករាលដាលនៃជំងឺកូវីដ-១៩ បំប្លែងថ្មី ប្រភេទដែលតា។ សម្រាប់អាជីវករមិនទាន់ដល់វេនលក់ក្នុងផ្សារ គឺពួកគាត់អាចទៅលក់នៅផ្សារបណ្ដោះអាសន្នផ្លូវ៦០ម៉ែត្រ ជិតផ្សារកុងទីន័រ។
ឯកឧត្ដមបានបញ្ជាក់ទៀតថា ការបើកផ្សារឡើងវិញវាមិនពិបាកទេ ប៉ុន្តែអ្វីដែលអាជ្ញាធរចង់បាននោះ គឺចង់ឱ្យអ្នកលក់ និងអ្នកទិញមានសុវត្ថិភាព ខណៈដែលអ្នកលក់ជុំវិញផ្សារលើធំថ្មី ដែលមានប្រមាណជាង៨០០នាក់។ ប្រសិនជាការបើកសាកល្បងនេះ អាជីវករមិនស្តាប់តាមការណែនាំរបស់អាជ្ញាធរ ធ្វើឱ្យផ្សារនេះមានភាពស្មុកស្មាញ និងប្រឈមការឆ្លងកូវីដច្រើន អាជ្ញាធរខេត្តនឹងបិទផ្សារនេះបន្តទៀត ក្នុងនោះដែរ ចំពោះអ្នកដែរមិនពាក់ម៉ាស់ និងការជួបជុំគ្នាច្រើននៅតាមទីសាធារណៈបំពានការណែនាំរបស់ក្រសួងសុខាភិបាលក៍ដូចជាការណែនាំរបស់រាជរដ្ឋាភិបាល អាជ្ញាធរខេត្តនឹងធ្វើការផាកពិន័យដោយគ្មានការលើកលែងឡើយ៕
អត្ថបទ និង រូបភាព៖ លោក ឈិត សាវី
