នៅថ្ងៃទី១៩ ខែសីហា ឆ្នាំ២០២១នេះ លោក ម៉ុងប៊ុនលីម នាយខណ្ឌរដ្ឋបាលព្រៃឈើ នៃមន្ទីរកសិកម្មរុក្ខាប្រមាញ់និងនេសាទ ខេត្តសៀមរាប បានបញ្ជាក់ថា ការដឹកជញ្ជូនសត្វតុកកែ ដោយគ្មានច្បាប់អនុញ្ញាត គឺជាអំពើខុសច្បាប់ ព្រោះសត្វតុកកែ ជាប្រភេទសត្វព្រៃឧរង្គសត្វ ដែលស្ថិតក្នុងក្រុមប្រភេទមានដោយបង្គួរតាមច្បាប់ស្តីពីព្រៃឈើ និងលិខិតបទដ្ឋានគតិយុត្ត។
ទន្ទឹមនោះ លោកនាយខណ្ឌរដ្ឋបាលព្រៃឈើ បានច្រានចោលចំពោះការចោទប្រកាន់របស់ក្រុមហ៊ុន វីរ: ប៊ុនថាំ តាមរយៈគណនីហ្វេសប៊ុកឈ្មោះ Virak Bunthan Express Tour & Travel ដែលបានចោទប្រកាន់ កម្លាំងរដ្ឋបាលព្រៃឈើបន្ទាយស្រី នៃមន្ទីរកសិកម្មរុក្ខាប្រមាញ់ និងនេសាទ ខេត្តសៀមរាបថា៖
១.ហេតុអ្វីបានដឹងច្បាស់ថាក្នុងឡានមានដឹកសត្វតុកកែ? ហើយដឹងច្បាស់ថាផ្ញើរចេញពីតំបន់ណា?មានន័យថាលោកដឹងច្បាស់ណាស់ថាជាបញ្ញើរមិនពាក់ព័ន្ធក្រុមហ៊ុនឡើយ រឺជាការរៀបចំទុកជាមុន? របស់ខុសច្បាប់ហេតុអីនៅគូទឡានវិញ ម្តេចមិននៅខាងក្នុង?
២. បើលោកដឹងហើយថាមានដឹកតុកកែ ហើយជាក្រុមហ៊ុនទទួលបញ្ញើរមានទាំងវិក័ត្រទទួល ផ្ញើរ ហើយលេខអ្នកផ្ញើរ អ្នកទទួល ទីតាំងអ្នកផ្ញើរ និងពត៌មានផ្សេងៗទៀត ហេតុអីលោកមិនទៅចាប់អ្នកប្រព្រត្តិទៅ បើតុកកែខុសច្បាប់ពិតមែន?
៣. ចាប់ភ្លាមទាមទារពិន័យ ៣០,០០០ដុល្លារ ជាថ្នូរក្នុងការដោះលែង តើជាច្បាប់មែនទេ?
៤. អ្នកកាប់ឈើ ដឹកឈើ ចាប់សត្វព្រៃពិតប្រាកដម្តេចលោកមិនទៅចាប់?
៥. តើលោកដឹងទេថា ក្រុមហ៊ុនទទួលបញ្ញើរគ្មានសិទ្ធឆែកមើលទំនិញភ្ញៀវនោះទេ តែក្រុមហ៊ុនតែងតែសហការជាមួយសមត្ថកិច្ចជានិច្ច បើមានករណីសង្ស័យណាមួយ។
ដោយលោក បានបំភ្លឺថា៖
១. ករណីចាប់ឃាត់រថយន្តដឹកជញ្ជូនសត្វតុកកែ ដែលជាសត្វព្រៃឧរង្គសត្វ ស្តិតក្នុងក្រុមប្រភេទមានដោយបង្គួរ និងគ្មានច្បាប់អនុញ្ញាតនេះ ជាករណីសង្ស័យមានការដឹកជញ្ជូនផល អនុផលព្រៃឈើ និងសត្វព្រៃ ហើយក៏ពុំមានការរៀបចំជាមុននោះទេ។ កន្លងមក មន្រ្តីរដ្ឋបាលព្រៃឈើ តែងតែឃាត់រថយន្តតូច ធំជាច្រើន ដើម្បីឆែកឆេរ ពិនិត្យលើការដឹកជញ្ជូនផល អនុផលព្រៃឈើ និងសត្វព្រៃ និងបានបង្ក្រាបជាច្រើនករណីនៃការដឹកជញ្ជូនដោយបង្កប់ផល អនុផលព្រៃឈើ និងសត្វព្រៃក្នុងទំនិញផ្សេងៗតាមរថយន្ត។
ព័ត៌មានជាតិ ថ្មីៗ
២.បញ្ញើជាឥវ៉ាន់ឬទំនិញស្របច្បាប់ គ្រប់សមត្ថកិច្ចពុំមានសិទ្ឋិចាប់ឃាត់ឡើយ។ ការដឹកជញ្ជូននេះ មានការពាក់ព័ន្ឋនឹងរថយន្តស្លាកលេខភ្នំពេញ 3F- 7232 ប្រើប្រាស់ជាមធ្យោបាយដឹកជញ្ជូនបទល្មើសសត្វព្រៃ ដែលតម្រូវឱ្យសមត្ថកិច្ចចាប់ឃាត់ និងអនុវត្តនិតិវីធីច្បាប់ ។
៣. ពុំមានករណីទាមទារប្រាក់ចំនួន ៣០,០០០ដុល្លារ ជាថ្នូរក្នុងការដោះលែងដូចការចោទប្រកាន់ឡើយ។ បុគ្គលបានប្រព្រឹត្តដឹកជញ្ជូនត្រូវចោទប្រកាន់តាមមាត្រា៤៨ នឹងត្រូវដាក់ទោសតាមមាត្រា៩៦ ចំនុចទី១៩ នៃច្បាប់ស្តីពីព្រៃឈើ ។ ករណីដឹកជញ្ជូនសត្វតុកកែជាប្រភេទសត្វព្រៃនេះ ត្រូវពិន័យអន្តរកាណ៍ ពី ៥០,០០០រៀល ដល់ ១០០,០០០រៀល ក្នុងមួយគីឡូក្រាម តាមប្រកាសអន្តរក្រសួង លេខ ៤១០ ប្រក.បស្ថ ចុះថ្ងៃទី ១៨ ខែ សីហា ឆ្នាំ២០១៧ ស្តីពីការកំណត់តម្លៃជាមូលដ្ឋាននៃធនធានធម្មជាតិសម្រាប់ធ្វើការជួសជុលស្តារការខូចខាត របស់ក្រសួងបរិស្ថាន និងក្រសួងសេដ្ឋកិច្ច និងហិរញ្ញវត្ថុ ។
៤. ចំពោះករណីអ្នកកាប់ឈើ ដឹកឈើ ចាប់សត្វព្រៃ ត្រូវបានរដ្ឋបាលព្រៃឈើទប់ស្កាត់ និងបង្រ្កាបជាច្រើនករណី។ ការទប់ស្កាត់ និងបង្រ្កាបបទល្មើសព្រៃឈើគ្រប់ប្រភេទ ជាសមត្ថកិច្ចរបស់រដ្ឋបាលព្រៃឈើ ដូចមានចែងក្នុងច្បាប់ស្តីពីព្រៃឈើ ។
៥.ករណីដឹកជញ្ជូនសត្វតុកកែជាប្រភេទសត្វព្រៃនេះ ត្រូវបានចាត់ទុកជាបទល្មើសសត្វព្រៃ ដែលតម្រូវឱ្យក្រុមហ៊ុនចូលរួមសហការជាមួយសមត្ថកិច្ចឱ្យបានពេញលេញ ។
គួរំលឹកថា កាលពីថ្ងៃទី១៧ ខែសីហា ឆ្នាំ២០២១ កម្លាំងរដ្ឋបាលព្រៃឈើបន្ទាយស្រី ខេត្តសៀមរាប បានធ្វើការឃាត់រថយន្តដឹកទំនិញមួយគ្រឿងដែលលួចដឹកបង្កប់សត្វតុកកែដោយខុសច្បាប់ តាមបណ្តោយផ្លូវជាតិលេខ៦៧ ស្ថិតក្នុងភូមិគោកឬស្សី ឃុំបល័ង្គ ស្រុកប្រាសាទបាគង ខេត្តសៀមរាប។រថយន្តដែល ឃាត់នេះជារបស់ក្រុមហ៊ុនដឹកជញ្ជូនវីរ: ប៊ុនថាំ ប្រភេទដឹកឥវ៉ាន់ពាក់ស្លាកលេខ ភ្នំពេញ៣F៧២៣២ ចេញដំណើរពីខេត្តមណ្ឌលគីរី ហើយចូលយកអីវ៉ាន់នៅតាមសាខាក្នុងខេត្តនានារហូតមកកាន់ខេត្តសៀមរាប នេះបើតាម លោក លី សុផា នាយរងផ្នែករដ្ឋបាលព្រៃឈើបន្ទាយស្រី។ ចំពោះសត្វតុកកែដែលបានដឹកជញ្ជូននោះ គឺយកពីខេត្តព្រះវិហារ មានចំនួន២កេស ស្មើនឹង៩៨៤ក្បាល។ បច្ចុប្បន្នរថយន្តល្មើសខាងលើ ត្រូវបានកម្លាំងរដ្ឋបាលព្រៃឈើបន្ទាយស្រី បានដកហូតមករក្សាទុកដើម្បីធ្វើការពិន័យតាមច្បាប់ស្តីពីព្រៃឈើ ចំណែកវត្ថុតាងជាសត្វតុកកែ កំពុងរង់ចាំចំណាត់ការពីថ្នាក់លើដើម្បីចាត់ការតាមនិតិវិធី។
អត្ថបទ និងរូបភាព៖ លោក យូ វង្ស
កែសម្រួល៖ លោក សេង ផល្លី
