ថ្ងៃទី១៨ ខែសីហា ឆ្នាំ២០២១ លោក សន សុខហេង ប្រធានផ្នែកទំនាក់ទំនងសាធារណៈ តំណាងលោក ហ៊ុន ប៉ូគា ប្រធានសមាគមចលនាយុវជនកម្ពុជា ក្រុម១៥៧ សាខាខេត្តសៀមរាប បានដឹកនាំសមាជិក សមាជិកា នាំយកអំណោយមួយចំនួនប្រគល់ជូន កម្លាំងការិយាល័យនគរបាលប្រឆាំងបទល្មើសសេដ្ឋកិច្ច ខេត្តសៀមរាប ប្រចាំការទីតាំងមណ្ឌលចត្តាឡីស័ក គោលដៅសាលាអេសអូអេស ភូមិ មណ្ឌ៣ សង្កាត់ស្លក្រាម និងប៉ុស្តិ៍រដ្ឋបាលគោតចក ក្នុងសង្កាតគោកចក ក្រុងសៀមរាប ដើម្បីផ្គត់ផ្គង់ដល់កងកម្លាំងសម្រាបប្រើប្រាស់ប្រចាំថ្ងៃក្នុងការប្រយុទ្ធប្រឆាំងនឹងជំងឺកូវីដ-១៩។
លោក សន សុខហេង មានប្រសាសន៍ថា សម្ភារៈប្រើប្រាស់ និងគ្រឿងឧបភោគបរិភោគទាំងនេះ គឺបានមកពីការចូលរួមរបស់សមាជិកសមាជិកាសមាគមចលនាយុវជនកម្ពុជា ក្រុម១៥៧ ដែលបានបរិច្ចាគធនធានថវិកាផ្ទាល់ខ្លួន ដើម្បីចូលរួមគ្នាក្នុងការទិញនូវសម្ផារៈប្រើប្រាស់ និងគ្រឿងឧបភោគបរិភោគមកប្រគល់ជូនបងប្អូនកងកម្លាំងរបស់យើង ដែរបានលះបង់អស់នៅកម្លាងកាយចិត្ត មមាញឹកក្នុងការថែរក្សាសុខសុវត្ថិភាពបងប្អូនប្រជាពលរដ្ឋយើងដែរកំពុងធ្វើចត្ថាឡីស័កនៅតាមមណ្ឌលនៅក្នុងក្រុងសៀមរាប។ ជាមួយគ្នានោះដែរ លោកក៏មានសេចក្ដីរីករាយ ដែរបានចូលរួមចំណែកជាមួយរដ្ឋាភិបាល ក៏ដូចជាអាជ្ញាធរខេត្ត និងបងប្អូនកងកម្លាំងទាំងអស់ ហើយចំពោះអំណោយនេះ វាក៏បានឆ្លុះបញ្ចាំងឱ្យឃើញអំពីការរួមសាមគ្គីគ្នា និងការយកចិត្តទុកដាក់ក្នុងចូលរួមជាមួយរាជរប្រជាដ្ឋាភិបាលកម្ពុជា ដើម្បីជួយដល់ពលរដ្ឋក្នុងកាលៈទេសៈដ៏លំបាកនេះ។
លោកមានប្រសាសន៍ទៀតថា នៅក្នុងបរិបទជំងឺកូវីដ-១៩ នេះ សូមអំពាវនាវដល់បងប្អូនប្រជាពលរដ្ឋទាំងអស់ មេត្តាយកចិត្តទុកដាក់ឲ្យបានខ្ពស់បន្ថែមទៀត ក្នុងការធ្វើអនាម័យជាប្រចាំ ដើម្បីការពារខ្លួនយើង ក្រុមគ្រួសារយើង ក៏ដូចជាសង្គមជាតិទាំងមូលផងដែរ។ ជាពិសេសវិធានការរបស់រាជរដ្ឋាភិបាល គឺ៣កុំ និង ៣ការពារ ដើម្បីរួមគ្នាការពារទប់ស្កាត់កុំឱ្យមេរោគដ៍សាហាវនេះ រីករាលដាលបន្តឆ្លងចូលសហគមន៍ ក្នុងនោះត្រូវការពារដោយការពាក់ម៉ាស់ , ការលាងសំអាតដៃឱ្យបានញឹកញាប់ , ការរក្សាគម្លាតសុវត្ថិភាពសង្គមបុគ្គលពីម្នាក់ទៅម្នាក់ឱ្យបានយ៉ាងតិចមួយម៉ែត្រកន្លះ និងកុំចូលទៅទីកន្លែងបិទជិតខ្វះខ្យល់ចេញចូលនិងប្រើម៉ាស៊ីនត្រជាក់ច្រើន, កុំទៅទីដែលមានមនុស្សច្រើនកុះករ, កុំប៉ះពាល់គ្នា និងកុំជួបជុំគ្នាច្រើនជាដើម ដើម្បីយើងរួមគ្នាទប់ស្កាត់ការឆ្លងរាលដាលនៃជំងឺកូវីដ-១៩ ឲ្យកាន់តែមានប្រសិទ្ធភាពខ្ពស់។
សូមជម្រាបថា ចំពោះអំណោយដែរបានផ្ដល់ជូន សម្រាបកម្លាំងការិយាល័យនគរបាលប្រឆាំងបទល្មើសសេដ្ឋកិច្ច ប្រចាំការទីតាំងមណ្ឌលចត្តាឡីស័ក គោលដៅសាលាអេសអូអេស មាន៖ ជែលលាងដៃចំនួន ១០ដប, ម៉ាស់ ៥ប្រអប់ ស្មើ២៥០ម៉ាស់, មី ៣ កេស, ត្រីខ ៣០ កំប៉ុង និងទឹកបរិសុទ្ធ ៥០យួរ។ ចំណែកកងកម្លាំងប៉ុស្តិ៍រដ្ឋបាលគោតចក មាន៖ អាល់កុលពេទ្យចំនួន ៣០លីត្រ, ទឹកសុទ្ធ ចំនួន ៣០យួរ និងម៉ាស់ ចំនួន ១០ប្រអប់៕
អត្ថបទ និង រូបភាព៖ លោក អ៊ុន ណារាជ្យ
