កាលពីថ្ងៃទី១៩ ខែសីហា ឆ្នាំ២០២១ លោក ឃូ ប៊ុនទ្រី ប្រធាននាយកគ្រឹះស្ថានមីក្រូហិរញ្ញវត្ថុ ហ្វូណន ភីអិលស៊ី ខេត្តសៀមរាប បាននាំយកនូវអំណោយជាសម្ភារៈប្រើប្រាស់មួយចំនួនប្រគល់ជូនរដ្ឋបាលខេត្ត ដើម្បីចូលរួមក្នុងសកម្មភាពប្រយុទ្ធប្រឆាំងនឹងជំងឺកូវីដ-១៩ ក្នុងខេត្តសៀមរាប ក្រោមវត្តមានលោក ពិន ប្រាកដ អភិបាលរងខេត្ត តំណាងដ៏ខ្ពង់ខ្ពស់ ឯកឧត្តម ទៀ សីហា អភិបាលនៃគណៈអភិបាលខេត្តសៀមរាប។ អំណោយទាំងនោះរួមមាន៖ ម៉ាស ១០កេះធំ ស្មើរនឹង ២៥០០០ម៉ាស, អាល់កុល ៥កាន ស្មើរនឹង ១៥០លីត្រ និងស្រោមដៃពេទ្យ ៥កេះធំ។
ក្នុងនាមអាជ្ញាធរខេត្ត លោក ពិន ប្រាកដ បានថ្លែងអំណរគុណដល់ទឹកចិត្តសប្បុរសធម៌របស់គ្រឹះស្ថានមីក្រូហិរញ្ញវត្ថុ ហ្វូណន ភីអិលស៊ី ខេត្តសៀមរាប ដែលបានផ្តល់ជូននូវសម្ភារៈមួយចំនួនសម្រាប់ប្រើសប្រាស់ក្នុងការប្រយុទ្ធប្រឆាំងបង្កាដើម្បីទប់ស្កាត់ជំងឺកូវីដ-១៩ ដល់រដ្ឋបាលខេត្តសៀមរាប ខណៈដែរប្រទេសកម្ពុជាយើង ក៏ដូចជាខេត្តសៀមរាប ដែលបានកើនឡើងគួរឲ្យមានការព្រួយបារម្ភបំផុត។ ដូចនេះយើងត្រូវចូលរួមទាំងអស់គ្នាក្នុងការប្រយុទ្ធប្រឆាំង នឹងការរីករាលដាលនៃជំងឺឆ្លងទាំងអស់គ្នា។ ជាមួយនោះបច្ចុប្បន្ន អាជ្ញាធរខេត្តក៏បានផ្តល់នូវសម្ភារៈ ឧបករណ៍ប្រើប្រាស់ជូនទៅតាមបណ្តាក្រុង/ស្រុក ជាបន្តបន្ទាប់ស្ទើជារៀងរាល់ថ្ងៃកន្លងមក រួមទាំងគ្រឿងឧបភោគបរិភោគជាច្រើន ក្នុងការផ្គត់ផ្គង់ដល់បងប្អូនដែលបានវិលមកពីក្រៅប្រទេស និងរាជធានី/ខេត្ត ដែលជួបនូវហានីភ័យខ្ពស់នៃជំងឺកូវីដ-១៩ បាននឹងកំពុងធ្វើចត្តាឡីស័កនៅតាមមណ្ឌលក្នុងក្រុង/ស្រុក នៃខេត្តសៀមរាប។
លោកអភិបាលរងខេត្ត មានប្រសាសន៍ទៀតថា ដោយមានការគិតគូរយកចិត្តទុកដាក់ពីសំណាក់រាជរដ្ឋាភិបាល សម្រាប់បងប្អូនប្រជាពលរដ្ឋក្នុងខេត្តសៀមរាបយើង ដែរទទួលបានការចាក់វ៉ាក់សាំងជាបន្តបន្ទាប់រហូតឈានដល់ការចាក់វ៉ាក់សាំងចាក់ជូនដល់ប្រជាពលរដ្ឋយើង ដែរមានអាយុចាប់ពី១២ឆ្នាំ ដល់១៧ឆ្នាំបន្ថែមទៀត នៅក្នុងក្រុង និងតាមបណ្តាស្រុកនានាជាដើម។ ជាមួយគ្នានោះ លោកក៏បានអំពាវនាវដល់បងប្អូនប្រជាពលរដ្ឋទាំងអស់គ្នា សូមបងប្អូនត្រូវចូលរួមសហការអនុវត្តវិធានការណ៍ របស់រាជរដ្ឋាភិបាលគឺ ៣កុំ ៣ការពារ និង២ចូលរួម ឲ្យមានប្រសិទ្ធភាពខ្ពស់បំផុត និងបន្តប្រកាន់នូវវិធានសុខាភិបាលឲ្យបានខ្ជាប់ខ្ជួន ទោះបីបងប្អូនបានចាក់វ៉ាក់សាំងរួចហើយនោះក្តី ដើម្បីទប់ស្កាត់ការឆ្លងរាលដាលនៃជំងឺកូវីដ-១៩ ឲ្យកាន់តែមានប្រសិទ្ធភាពខ្ពស់៕
#ប្រភពរដ្ឋបាលខេត្តសៀមរាប
