បើតាមលោក ជូ រ៉ាឌីណា អនុប្រធាននាយកដ្ឋានគ្រប់គ្រងព្រៃឈើ ទេសភាពវប្បធម៌ និងបរិស្ថាន នៃអាជ្ញាធរជាតិអប្សរា បានឲ្យដឹងថា គិតត្រឹមរយៈពេល៦ថ្ងៃ គិតចាប់ពីថ្ងៃទី១៦ ដល់ថ្ងៃទី២១ ខែសីហា ឆ្នាំ២០២១ អាជ្ញាធរជាតិអប្សរា បានបន្តចែកកូនឈើចម្រុះបានសរុបចំនួន ៣,៣៨១ដើម ជូនដល់សាធារណជនទូទៅនៅក្នុងខេត្តសៀមរាប ក៏ដូចជាបណ្ដារខេត្តផ្សេងទៀត ដើម្បីធ្វើការដាំដុះតាមតម្រូវការ។
លោក ជូ រ៉ាឌីណា បានឲ្យដឹងទៀតថា កូនឈើចម្រុះទាំង ៣,៣៨១ដើមនេះដែរ ត្រូវបានក្រុមការងារចែកជូនដល់៖ ចៅអធិការវត្តវេឡុវ័ន ដោកពោយគោកក្រោល ចំនួន១,០០០ដើម ដើម្បីយកទៅដាំលម្អក្នុងបរិវេណវត្ត ស្ថិតក្នុងឃុំជ្រោយនាងនួន ស្រុកស្រីស្នំ, ផ្តល់ជូនប្រជាពលរដ្ឋរស់នៅខេត្តសៀមរាប ចំនួន១៣០ដើម ដើម្បីយកទៅដាំនៅដីផ្ទាល់ខ្លួននៅខេត្តបាត់ដំបង, ផ្តល់ជូនពលរដ្ឋ ចំនួន១៥០ដើម ដើម្បីយកទៅដាំនៅដីផ្ទាល់ខ្លួននៅស្រុកពួក, ផ្ដល់ជូនប្រជាពលរដ្ឋរស់នៅរាជធានីភ្នំពេញ ចំនួន២០០ដើម ដើម្បីយកទៅដាំនៅដីផ្ទាល់ខ្លួន នៅស្រុកបន្ទាយស្រី, ផ្តល់កូនឈើជូនតំណាងនាយកដ្ឋានសណ្តាប់ធ្នាប់នៃអាជ្ញាធរជាតិអប្សរា ចំនួន១,៣១១ដើម ដើម្បីយកទៅដាំនៅបរិវេណប្រាសាទបាយក្អែក ប្រាសាទតាព្រហ្ម ប្រាសាទបេងមាលា, ផ្តល់ជូនពលរដ្ឋ ចំនួន៤០ដើម ដើម្បីយកទៅដាំនៅដីផ្ទាល់ខ្លួនស្ថិតនៅខេត្តតាកែវ និងផ្តល់ជូនប្រជាពលរដ្ឋ ចំនួន ៥៥០ដើម ដើម្បីយកទៅដាំលំអក្នុងបរិវេណសាលាបឋមសិក្សារ៉ាកូអំពិល សិ្ថតក្នុងភូមិអំពិល ឃុំប្រាសាទ ស្រុកព្រះនេត្រព្រះ ខេត្តបន្ទាយមានជ័យ។
សូមជម្រាបថា គិតចាប់ពីខែមករា ដល់ខែកក្កដា ឆ្នាំ២០២១ កន្លងមកនេះ អាជ្ញាធរជាតិអប្សរាបានដាំកូនឈើចម្រុះក្នុងតំបន់អង្គរ បានចំនួន ១១,២០៣ដើម ហើយបានចែកចាយកូនឈើចម្រុះទាំងអស់នោះដោយឥតគិតថ្លៃ ជូនសាធារណជនទូទៅបានចំនួន ៤៨,៧០២ដើមផងដែរ៕
អត្ថបទ និងរូបភាព៖ លោក ខេង ឧត្តម
កែសម្រួល៖ លោក អ៊ុន ណារាជ្យ
