នៅព្រឹកថ្ងៃទី២៣ ខែសីហា ឆ្នំា២០២១នេះ ឯកឧត្ដម ស ថាវី អនុប្រធានក្រុមការងារចុះជួយស្រុកអង្គរធំ និងជាអនុរដ្ឋលេខាធិការ ក្រសួងការពារជាតិ បាននាំយកអំណោយគ្រឿងឧបភោគបរិភោគ របស់សម្ដេចពិជ័យសេនា ទៀ បាញ់ ឧបនាយករដ្ឋមន្ដ្រី រដ្ឋមន្ដ្រីក្រសួងការពាតិជាតិ និងជាប្រធានក្រុមការងាររាជរដ្ឋាភិបាលចុះជួយ ខេត្តសៀមរាប ចែកជូនប្រជាពលរដ្ឋចំនួន ១០០គ្រួសារ រស់នៅក្នុងភូមិតាប្រុក ឃុំលាងដៃ ស្រុកអង្គរធំ ខេត្ដសៀមរាប ដោយក្នុងមួយគ្រួសារទទួលបាន៖ អង្ករ ២៥គីឡូក្រាម, ទឹកស៊ីអ៊ីវ ១យួរ, ទឹកត្រី ១យួរ, ទឹកសុទ្ធ ១យួរ និងពងមាន់ ១០គ្រាប់។
ឯកឧត្ដម ស ថាវី មានប្រសាសន៍ថា អំណោយនាពេលនេះ គឺជាអំណោយសម្ដេចពិជ័យសេនា ទៀ បាញ់ និងសប្បុរសជននានា ដែរបានប្រគល់មកក្រុមការងារដើម្បីយកមកទៅចែកជូនបងប្អូនប្រជាពលរដ្ឋដែលកំពុងមានការខ្វះខាតក្នុងជីវភាពប្រចាំថ្ងៃ អំឡុងពេលពួកគាត់ជួបបញ្ហាជំងឹកូវីដ-១៩។ ចំពោះអំណោយដែរផ្ដល់ជូនដល់បងប្អូននេះ គឺមិនមានការរើសអើន ប្រកាន់វណ្ណៈ ពូជសាស្រ្ត ពណ៌សម្បុរ ជំនឿ សាសនា ឬនិន្នាការនយោបាយណាមួយឡើយ ដែលនេះបង្ហាញថា រាជរដ្ឋាភិបាលបានយកចិត្ដទុកដាក់ដល់ប្រជាពលរដ្ឋ ដែលកំពុងជួបបញ្ហាខ្វះខាតក្នុងស្ថានភាពនៃជំងឺកូវីដ-១៩ ។ ជាមួយគ្នានោះដែរទោះជាបងប្អូនទទួលបានអំណោយនេះមែន តែមិនអាចផ្ដល់ជូនប្រជាពលរដ្ឋបានរហូតនោះទេ គឺបងប្អូនត្រូវខិតខំប្រឹងប្រែងរករបរខ្លួនឯងខ្លះ ទើបជីវភាពគ្រួសាររីកចំរើន។
ឯកឧត្ដមបានបញ្ជាក់ថា ក្រុមការងារទាំងអស់គ្នាសន្យាជួយជំរុញដល់អាជ្ញាធរខេត្ដសៀមរាប ឱ្យពន្លឿនក្នុងការជួសជុលផ្លូវ និងបណ្ដាញភ្លើងចូលភូមិប្រជាពលរដ្ឋមួយចំនួន ដែលមិនទាន់មានភ្លើងប្រើប្រាស់គ្រប់ៗគ្នា ដើម្បីមូលដ្ឋានយើងកាន់តែរីកចម្រើន។ ជាមួយនោះ ឯកឧត្ដមក៍បានណែនាំដល់ប្រជាពលរដ្ឋទាំងអស់គ្នា អ្នកដែរមិនទាន់ការចាក់វ៉ាក់សាំងការពារជំងឺកូវីដ-១៩ ត្រូវទៅចាក់ឲ្យបានគ្រប់ៗគ្នា ជាពិសេសអាណាព្យាបាលគ្រប់រូប ក៏ត្រូវបញ្ជូនកុមារដែលគ្រប់អាយុចាប់ពី១២ឆ្នាំ ទៅ១៨ឆ្នាំ ទៅចាក់វ៉ាក់សាំងបង្ការជំងឺកូវីដ-១៩ អោយបានគ្រប់គ្នា និងត្រូវចូលរួមអនុវត្តជាប្រចាំនូវវិធានការការពាររបស់រាជរដ្ឋាភិបាល និងការណែនាំរបស់ក្រសួងសុខាភិបាលឱ្យបានខ្ជាប់ខ្ជួនផងដែរ៕
អត្ថបទ និងរូបភាព៖ លោក ឈិត សាវី
កែសម្រួល៖ លោក អ៊ុន ណារាជ្យ
