នៅថ្ងៃទី២៣ ខែសីហា ឆ្នាំ២០២១នេះ ព្រះតេជគុណ តង់ តន ព្រះរាជាគណៈថ្នាក់ក្តិយសនៃព្រះរាជាណាចក្រកម្ពុជា និងជាព្រះគ្រូចៅអធិការវត្តព្រះព្រហ្មរ័ត្ន បានផ្តល់ជូននូវអំណោយមួយចំនួនដល់រដ្ឋបាលសង្កាត់ទឹកវិល ក្រុងសៀមរាប ដើម្បីយកទៅចែកប្រគល់ជូនទៅក្រុមគ្រួសារដែលមានសមាជិកឆ្លងជំងឺកូវីដ-១៩ ក៏ដូចជាប្រជាពលរដ្ឋកំពុងស្ថិតនៅក្នុងបិទខ្ទប់។ អំណោយទាំងនោះមាន៖ អង្ករ ៣៥០ គីឡូក្រាម, ទឹកបរិសុទ្ធ ៥០យួរ, អំបិល ២០គីឡូក្រាម, ស្ករស ១៥គីឡូក្រាម, ទឹកត្រី ១០យួរ, ទឹកស៊ីអ៊ីវ ១០យួរ, ទឹកផ្លែឈើ ៥កេស, ត្រីខ ១កេស, សាប៊ូ ៣០កញ្ចប់, ថ្នាំដុសធ្មេញ ៣០, មី ៤០កេស និងថវិកាចំនួន ១លានរៀលផងដែរ។
ព្រះតេជគុណ តង់ តន មានសង្ឃដិកាថា អំណោយដែលប្រប្រគល់ជូនទាំងនេះ គឺជាអំណោយបានមកពីការប្រគេនរបស់ប្រជាពុទ្ឋបរិស័ទក្នុងពិធីបុណ្យផ្សេងៗ ហើយព្រះសង្សបានប្រមែប្រមូលសន្សំទុកសម្រាប់ចែកជូនគ្រួសារ ឬអាជ្ញាធរមូលដ្ឋានណានីមួយដែលជួបហានិភ័យដោយប្រការផ្សេងៗ សម្រាប់ដោះស្រាយការលំបាកមួយគ្រាៗ ព្រោះថា ការលំបាករបស់អាជ្ញាធរមូលដ្ឋាន និងបងប្អូនប្រជាពុទ្ឋបរិស័ទក៍ជាការលំបាករបស់ព្រះសង្ឃដែរ ដូច្នេះហើយក្នុងនាមមិត្តរួមជាតិ មិត្តរួមសាសន៍ គឺតែងតែជួយគិតគូរ និងផ្តល់ជូនគ្នាទៅវិញទៅមកទៅតាមលទ្ឋភាពដែលក្រុមព្រះសង្ឃមាន។ ក្នុងនោះចាប់តាំងពីសកលលោក ក៏ដូចជាប្រទេសកម្ពុជាបានជួបនូវវិបត្តិដោយសារជំងឺកូវីដ-១៩ ឆ្លងចូលសហគមន៍មក សាលាគណខេត្តក៍ដូចជាចៅអធិការវត្តនានា ក្នុងទូទាំងខេត្ត តែងតែគិតគូរពីសុខទុក្ខ និងការលំបាករបស់បងប្អូនប្រជាពលរដ្ឋ និងបានសហការគ្នាកៀងគររកជំនួយសប្បុរសធម៌ពីសប្បុរសជនជិតឆ្ងាយ ដើម្បីយកមកចែកជូនគ្រួសារខ្វះខាតជួបការលំបាកផ្នែកជីវភាពប្រចាំថ្ងៃ ដែលសកម្មភាពនេះ ចាត់ទុកជាការចូលរួមជួយសម្រាលការលំបាកមួយគ្រាៗ ស្របតាមពុទ្ឋឱវាទរបស់ព្រះសម្មាសម្ពុទ្ឋបរមគ្រូនៃយើង ដែលបានត្រាស់ទូន្មានទុក ឱ្យយើងទាំងអស់គ្នាត្រូវចេះរួមសុខរួមទុក្ខ ជួយទុក្ខធុរៈ សង្គ្រោះ និងសម្រាលទុក្ខលំបាកគ្នាទៅវិញទៅមក ស្របពេលពិភពលោកក៍ដូចជាប្រទេសកម្ពុជាកំពុងជួបនូវទុក្ខលំបាកយ៉ាងក្រៃលែងដោយសារវិបត្តិនៃជំងឺកូវីដ-១៩ កំពុងឆ្លងរាលដាល។
ក្នុងនោះដែរព្រះអង្គក៏បានអំពាវនាវដល់ប្រជាពុទ្ឋបរិស័ទ និងមហាជនទូទៅទាំងអស់ កុំមានក្តីប្រមាថ និងកុំធ្វេសប្រហែស និងមិនត្រូវភ្លេចទេ គឺចូលរួមគោរពប្រតិបត្តិឲ្យបានខ្ជាប់ខ្ជួននូវវិធានការ ៣កុំ ៣ការពារ និង ២ចូលរួមរបស់រាជរដ្ឋាភិបាល និងការណែនាំវិធានការនានារបស់ ក្រសួងសុខាភិបាល។
លោកស្រី ជា ភឿយ សមាជិកក្រុមប្រឹក្សាសង្កាត់ទឹកវិល បានថ្លែងអំណរព្រះគុណនូវការយកព្រះទ័យទុកដាក់របស់ព្រះតេជគុណ តង់ តន និងមន្ត្រីសង្ឃនៃសាលាគណខេត្តទាំងអស់ ដែលជារឿយៗតែងតែគិតគូរពីសុខទុក្ខរបស់បងប្អូនប្រជាពលរដ្ឋ និងអាជ្ញាធរមូលដ្ឋានដែលជួបការលំបាក និងហត់នឿយដោយសារតែជួបបញ្ហាជំងឺកូវីដ-១៩ ចំពោះអំណោយជាគ្រឿងឧបភោគបរិភោគដែលទទួលបាននេះ អាជ្ញាធរនឹងចែកជូនផ្ទាល់ដល់គ្រួសារដែលកំពុងបិទខ្ទប់លំនៅឋានក្នុងទូទាំងសង្កាត់នេះ។ ជាមួយនោះក្នុងនាមក្រុមប្រឹក្សា និងអាជ្ញាធរសង្កាត់ទឹកវិល នឹងបន្តសហការគ្នាជាប្រចាំជាមួយសមត្ថកិច្ចមូលដ្ឋានធ្វើការណែនាំ អប់រំ ពន្យល់ ដល់ប្រជាពលរដ្ឋឱ្យពួកគាត់អនុវត្តឱ្យបានខ្ជាប់ខ្ជួននូវសេចក្តីណែនាំ របស់ក្រសួងសុខាភិបាល និងវិធានការរបស់រាជរដ្ឋាភិបាល ៣ការពារ និង៣កុំ ក្នុងការទប់ស្កាត់ដល់ការឆ្លងជំងឺកូវីដ-១៩ ហើយប្រសិនបើមានសង្ស័យ ឬមានសុខភាពមិនប្រក្រតីសូមប្រញ៉ាប់រាយការណ៍ទៅអាជ្ញាធរមូលដ្ឋានជាបន្ទាន់ ដើម្បីធ្វើការពិនិត្យ និងតាមដានសុខភាពរបស់បងប្អូន៕
អត្ថបទ និងរូបភាព៖ លោក យូ វង្ស
កែសម្រួល៖ លោក អ៊ុន ណារាជ្យ
