ដោយមានការយកចិត្តទុកដាក់ខ្ពស់ពីសំណាក់ឯកឧត្តម អ្នកឧកញ៉ា សៀង ណាំ ប្រធានកិត្តិយសសាខាកាកបាទខេត្ត និងឯកឧត្តម ទៀ សីហា ប្រធានគណៈកម្មធិការ សាខាកាកបាទក្រហមកម្ពុជាខេត្ត នាព្រឹកថ្ងៃទី២៤ ខែសីហា ឆ្នាំ២០២១នេះ លោកជំទាវ មាស សន អនុប្រធានកិត្តិយសសាខាកាកបាទក្រហមខេត្តសៀមរាប បាននាំយកនូវទេយ្យវត្ថុ គ្រឿង ឧបភោគបរិភោគ និងបច្ច័យប្រគេនចំពោះព្រះសង្ឃក្នុងវត្តចំនួន១១ ក្នុងខេត្តសៀមរាប រួមមាន៖ ១.វត្តរាជបូណ៌ ស្ថិតក្នុងក្រុងសៀមរាប, ២.វត្តយាង ស្ថិតក្នុងស្រុកពួក, ៣.វត្តទេវៈ ស្ថិតក្នុងស្រុកបន្ទាយស្រី, ៤.វត្តគោកចាន់ ស្ថិតក្នុងស្រុកប្រាសាទបាគង, ៥.វត្តវេឡុវ័នដោកពោយគោកក្រោល ស្ថិតក្នុងស្រុកស្រីស្នំ, ៦.វត្តដំណាក់ស្ដេច ស្ថិតក្នុងស្រុកអង្គរជុំ, ៧.វត្តសុវណ្ណ បូទុម ស្ថិតក្នុងស្រុកវ៉ារិន, ៨.វត្តស្លាត ស្ថិតក្នុងស្រុកអង្គរធំ, ៩.វត្តមុទ្យាន ស្ថិតក្នុងស្រុកសូទ្រនិគម, ១០.វត្តគោកធ្លក ស្ថិតក្នុងស្រុកជីក្រែង និង ១១.វត្តបឹងមាលា ស្ថិតក្នុងស្រុកស្វាយលើ ដែលកម្មវិធីប្រគេនទេយ្យវត្ថុនេះ បានរៀបចំឡើងនៅក្នុងវត្តរាជបូណ៍ ក្រុងសៀមរាប។
លោកជំទាវ មាស សន បានមានប្រសាសន៍ថា ការប្រគេនទេយ្យវត្ថុ គ្រឿងឧបភោគបរិភោគ និងបច្ច័យនេះ ដោយឃើញពីការលំបាករបស់ព្រះសង្ស ដែរមិនអាចចេញបិណ្ឌបាត្រនៅក្នុងបរិបទកូវីដ-១៩ និងដោយមើលឃើញថាមានប្រជាពលរដ្ឋនៅខេត្តសៀមរាប ភាគច្រើនត្រូវធ្វើចត្តាឡីស័កតាមផ្ទះ ហើយមិនបានចេញក្រៅ និងមិនបានយកចង្ហាន់ទៅប្រគេនព្រះសង្ឃ ដែលគង់ក្នុងវត្តដូចធម្មតា ខណៈដែលពុទ្ធបរិស័ទកំពុងប្រឈមនឹងការលំបាកផ្នែកសេដ្ឋកិច្ច ដោយជំងឺកូវីដ-១៩ នៅតែបន្តឆ្លងរាលដាលឥតស្រាកស្រាន្តនៅឡើយ ដែលធ្វើឲ្យវត្តអារាមទាំងឡាយខ្វះខាតចង្ហាន់ ភេសជ្ជៈ និងបច្ច័យ ជាពិសេសវត្តដែលបានបើកសាលាពុទ្ធិកសិក្សាតែម្តង។ ក្នុងនោះសាខាកាកបាទក្រហមកម្ពុជាខេត្តនឹងបន្តប្រគេនទៀនព្រះវស្សា ទេយ្យវត្ថុ គ្រឿង ឧបភោគ បរិភោគ និងបច្ច័យ ជាបន្តបន្ទាប់ដល់វត្តចំនួន១០ទៀតនៅក្នុងក្រុងសៀមរាបដែលបានបើកសាលាពុទ្ធកសិក្សាផងដែរ។
ព្រះមហាវិមលធម្ម ពិន សែម សិរីសុវណ្ណោ រាជាគណៈថ្នាក់ទោ និងជាព្រះគ្រូចៅអធិការ វត្តរាជបូណ៌ បានមានសង្ឃដីកាថា ស្ថិតក្នុងដំណាក់កាលមួយដែលព្រះសង្ឃមិនអាចនិមន្តបិណ្ឌបាតនៅក្រៅវត្តបាន ហើយពុទ្ធបរិស័ទក៏មិនសូវហ៊ានមកវត្ត ដោយសារប្រយ័ត្នប្រយែង និងការពារខ្លួនកុំឱ្យឆ្លងជំងឺកូវីដ-១៩ ហើយនៅពេលដែលពុទ្ធបរិស័ទមិនសូវមកវត្តធ្វើបុណ្យប្រគេន ចង្ហាន់ ឬទេយ្យទានច្រើនដូចមុនៗ ហើយជីវភាពប្រចាំថ្ងៃរបស់ព្រះសង្ឃទាំងអស់ ក៏ត្រូវសម្រួលបន្សាំទៅតាមសភាពការណ៍ផងដែរ។ ជាមួយគ្នានេះដែរ ព្រះមហាវិមលធម្ម ពិន សែម ក៍បានសម្ដែងនូវសេចក្ដីរីករាយក្រៃលែង ចំពោះថ្នាក់ដឹកនាំសាខាកាកបាទក្រហមខេត្ត ដែលបានយកចិត្តទុកដាក់ និងបានប្រគេនទេយ្យវត្ថុដល់ព្រះសង្ស នៅតាមវត្តដែលបានបើកសាលាពុទ្ធិកសិក្សានាពេលនេះ ដែលបញ្ជាក់ឲ្យឃើញកាន់តែច្បាស់ ចំពោះទឹកចិត្តជ្រះថ្លា ដែលបានចូលរួមដោយចិត្តជ្រះថ្លា ក្នុងការលើកកម្ពស់វិស័យពុទ្ធសាសនានៅគ្រប់កាលៈទេសៈ ជាពិសេសក្នុងអំឡុងពេលវិបត្តិនៃជំងឺកូវីដ-១៩ នេះ។
សូមជម្រាបថា ទេយ្យវត្ថុដែលបានប្រគេនចំពោះព្រះសង្ឃក្នុងមួយវត្តៗមាន៖ ទៀនវស្សា ១គូរ, អង្ករ ១៥០គីឡូក្រាម, មី ១០កេស, ត្រីខ ១០យួរ, ត្រងៀត ៣គីឡូក្រាម, សាច់ក្រក ៣គីឡូក្រាម, ទឹកត្រី ៥យួរ, ទឹកស៊ីអ៊ីវ ៥យួរ, ទឹកបរិសុទ្ធ ១០យួរ, ប្រេងឆា ៥លីត្រ, ម្សៅស៊ុបខ្ន ៣គីឡូក្រាម, មីសួ ៣គីឡូក្រាម, ស្ករស ៣គីឡូក្រាម, អំបិល ២គីឡូក្រាម, តែ ១គីឡូក្រាម, នំធុង ១ធុង, ម៉ាស់ ៣ប្រអប់, អាស់កុល ៤ដប ,ចង្ហាន់១ស្រាក់ និងបច្ច័យ ៨០ម៉ឺនរៀល៕
អត្ថបទ និង រូបភាព៖ លោក ទ្រា ពន្លឺ
កែសម្រួល៖ លោក អ៊ុន ណារាជ្យ
