ក្រសួងអប់រំឡាវបានប្រកាសពីការកំណត់ពេលបើកសាលារៀនឡើងវិញទូទាំងប្រទេសនៅខែក្រោយ ចាប់ពីថ្ងៃទី០១ ខែកញ្ញាតទៅ។
តាមសេចក្តីជូនដំណឹងបានបញ្ជាក់ថា នាយកសាលាក៏ដូចជាគ្រូបង្រៀន និងបុគ្គលិកនៅក្នុងគ្រឹះស្ថានអប់រំទូទៅនៅទូទាំងប្រទេសឡាវ ត្រូវទទួលការចាក់វ៉ាក់សាំងការពារជំងឺកូវីដ-១៩ ចំនួន ២ដូស មុនពេលបើកសាលារៀន។ ក្នុងម៉ោងសិក្សានាយកសាលា គ្រូបង្រៀន និងសិស្សត្រូវពាក់ម៉ាស់ លាងដៃជាមួយសាប៊ូ ឬទឹកអនាម័យ និងរក្សាគម្លាតសង្គមយ៉ាងតិច ១ម៉ែត្រ។ ប៉ុន្តែសាលារៀនដែលត្រូវបានប្រើជាមជ្ឈមណ្ឌលធ្វើចត្តាឡីស័ករបស់រដ្ឋ ដើម្បីជួយសម្រួលដល់ពលករឡាវមកពីប្រទេសថៃ ក៏ដូចជាសាលារៀនដែលមានទីតាំងនៅតំបន់ក្រហម នឹងមិនអាចបើកដំណើរការបានទេនៅក្នុងខែកញ្ញា ។
សូមជម្រាបថា នៅសប្តាហ៍ទី៤ ខែសីហា សាលារៀនគួរតែត្រៀមខ្លួនដើម្បីផ្តល់កាលវិភាគបង្រៀនដល់គ្រូរបស់ពួកគេ ក៏ដូចជាគាំទ្រដល់ការចុះឈ្មោះសិស្សសាលា សម្រាប់ឆ្នាំសិក្សាបច្ចុប្បន្ន។ ស្របពេលជាមួយគ្នានេះ អាជ្ញាធរក៏បានស្នើឲ្យមាតាបិតាសហការ ក្នុងការបញ្ជូនកូនៗ របស់ពួកគេទៅសាលារៀន ក៏ដូចជាស្វែងយល់ និងជឿជាក់លើវិធានការណ៍បង្ការ និងទប់ស្កាត់ជំងឺកូវីដ-១៩ របស់សាលា ដើម្បីការពារការរីករាលដាលឆ្លងកូវីដក្នុងសហគមន៍៕
