ថ្លែងក្នុងពិធីបិទសិក្ខាសាលាស្តីពីការបញ្ជ្រាបការយល់ដឹងដើម្បីការពារ និងទប់ស្កាត់ការរីករាលដាលនៃជំងឺកូវីដ-១៩ រៀបចំឡើងដោយសមាគមនារីកម្ពុជា ដើម្បីសន្តិភាព និងអភិវឌ្ឍន៍នៃក្រសួងព័ត៌មាន ឯកឧត្តម ខៀវ កាញារីទ្ធ រដ្ឋមន្រ្តីក្រសួងព័ត៌មាន បានលើកឡើងពីលក្ខណ:ពិសេសដែលកម្ពុជាបានដោះស្រាយ គឺដោយសារការប្រឹងប្រែងរបស់ប្រមុខរាជរដ្ឋាភិបាល សម្តេចតេជោនាយករដ្ឋមន្រ្តី ហ៊ុន សែន ដោយក្នុងនោះកម្ពុជាមានវ៉ាក់សាំងបង្ការជំងឺកូវីដ-១៩ គ្រប់គ្រាន់សម្រាប់ចាក់ជូន ហើយប្រទេសខ្លះទោះបីមានលុយក៏ដោយតែមិនអាចរកទិញវ៉ាក់សាំង បានគ្រប់មកចាក់នោះដែរ។
គួរជម្រាបថា នៅក្នុងអង្គសិក្ខាសាលាដែលប្រារព្ធនៅថ្ងៃទី២៤ ខែសីហា ឆ្នាំ២០២១ វាគ្មិនសំខាន់ៗ ដែលបានអញ្ជើញចូលរួមបានធ្វើបទបង្ហាញដោយលោកជំទាវ ខៀវ ទេពរង្ស៊ី កាញារីទ្ធ ឱសថបណ្ឌិត អតីតព្រឹទ្ធបុរសមហាវិទ្យាល័យឱសថសាស្ត្រ និងជាសាស្ត្រាចារ្យមហាបរិញ្ញា នៃសកលវិទ្យាល័យវិទ្យាសាស្ត្រសុខាភិបាល និងជាប្រធានកិត្តិយសនៃសមាគមនារីសាខា ក្រសួងព័ត៌មាន បានពន្យល់បកស្រាយនូវរាល់វិធានការ ការពារ ទប់ស្កាត់ ការព្យាបាល និងវិធីសាស្រ្តនានាជាច្រើន ជាពិសេសការលើកទឹកចិត្តដល់គ្រួសារបងប្អូនដែលឆ្លងជំងឺកូវីដហើយ ត្រូវតែប្រឹងប្រែងអនុវត្តន៏តាមការណែនាំរបស់ក្រសួងសុខាភិបាល និងការហាត់ប្រាណជាប់ជាប្រចាំ និងកុំអោយមានការបាក់ទឹកចិត្តអោយសោះ។ ជាមួយនោះអង្គសិក្ខាសាលា ក៏មានការបកស្រាយសំណួរ និងចម្លើយដោយ លោកជំទាវ ខៀវ ទេព រង្សី កាញារីទ្ធ និងលោកជំទាវ វេជ្ជបណ្ឌិត ឈឹម ការ៉ែនណា ទីប្រឹក្សាសម្តេចវិបុលសេនា ភក្តី សាយ ឈុំ ប្រធានព្រឹទ្ធសភា ហើយលោកជំទាវ ក៏ជាសមាជិកកិត្តិយសសមាគមនារីកម្ពុជាដើម្បីសន្តិភាព និងអភិវឌ្ឍន៍នៃក្រសួងព័ត៌មាន។
នៅក្នុងឱកាសនោះដែរ មន្រ្តីក្រសួងព័ត៌មានម្នាក់ដែលបានឆ្លងជំងឺកូវីដ-១៩ បានបង្ហាញពីអារម្មណ៏ផ្ទាល់ខ្លួន និងអាការះផ្សេងៗ នៅមុនពេលកើត និងពេលកើតក្នុងពេលព្យាបាល ក្នុងនោះ គឺត្រូវលេបថ្នាំអោយបានទៀងទាត់ ហាត់ប្រាណ បរិភោគ អាហារអោយ បានច្រើនមានកំលាំងរឹងមាំ ពិសេសបានទទួលការលើកទឹកចិត្តពីបងប្អូន និងថ្នាក់ដឹកនាំមន្រ្តីដែលបំពេញការងារជាមួយគ្នារហូតបានជាសះស្បើយ។
បន្ទាប់ពីបូកសរុបលទ្ធផលនៃអង្គសិក្ខាសាលារួចមក ឯកឧត្តមរដ្ឋមន្រ្តី ខៀវ កាញារីទ្ធ មានប្រសាសន៏ វាយតំលៃខ្ពស់ចំពោះសមាគមនារីក្រសួងព័ត៌មាន ដែលមានគំនិតរៀបចំជាសិក្ខាសាលានេះឡើង ដើម្បីអោយទាំងអស់គ្នាបានយល់កាន់តែច្បាស់ ថាជំងឺកូវីដ-១៩ នេះវាយ៉ាងមិច ហើយធ្វើការជៀសអោយបានកុំអោយាឆ្លង។ ទន្ទឹមនេះក៏ជាបទពិសោធន៏ទទួលបាន ហើយផ្សព្វផ្សាយអោយអ្នកនៅជុំវិញខ្លួនយើង បានយល់ពីការឆ្លងនៃជំងឺកូវីដ និងវិធានការ ការពារ ព្យាបាល ក្នុងកំរិតស្រាលដោយខ្លួនឯង។ កម្ពុជា មានមេដឹកនាំល្អ និងដោយសារភាពឈ្លាសវៃ របស់សម្តេចតេជោនាយករដ្ឋមន្រ្តី ហ៊ុន សែន និងមានទំនាក់ទំនងល្អជាបុគ្គល និងជាអន្តរជាតិ ទើបកម្ពុជាទទួលបានវ៉ាក់សាំងជំនួយផង និងទិញផង ដើម្បីយកមកចាក់បានយ៉ាងច្រើនដល់ប្រជាជន រហូតឥឡូវនេះ កំពុងចាក់ដូសទី៣ ដល់ក្រុមជួរមុខបន្ថែមទៀត។ នៅលើពិភពមានតែប្រទេស២ប៉ុណ្ណោះ ដែលបានចាក់វ៉ាក់សាំងជូនប្រជាជន បានច្រើនជាងគេ គឺប្រទេសអ៊ីស្រាអែល និងប្រទេសកម្ពុជា ដែលបានទិញវ៉ាក់សាំងបានលឿន និងរហស័ជាងគេ។ ឯកឧត្តមរដ្ឋមន្រ្តី បានជម្រាបជូនដែរថា ក្រៅពីទិញវ៉ាក់សាំងមកចាក់ជូនប្រជាជន ប្រមុខរាជរដ្ឋាភិបាលបានចំណាយថវិកាអស់រាប់រយលានដុល្លា ក្នុងការជួយឧបត្តម្ភដល់កម្មករកម្មការនី រោងចក្រកាត់ដេរ ដែលជួបការលំបាក រួមទាំងប្រជាពលរដ្ឋដែលជួបបញ្ហាជីវភាពខ្វះខាតដោយសារវិប្បត្តិជំងឺកូវីដ នាពេលកន្លងមកនេះផងដែរ។
ឆ្លៀតក្នុងឱកាសនោះដែរ ឯកឧត្តមខៀវ កាញារីទ្ធ បានសំដែងនូវការកោតសរសើរចំពោះថ្នាក់ដឹកនាំ មន្រ្តីរាជការ គ្រប់លំដាប់ថ្នាក់នៃក្រសួងព័ត៌មាន និងតាមបណ្តា មន្ទីរព័ត៌មានរាជធានីខេត្ត ដែលបានប្រឹងប្រែងរួមគ្នាទប់ស្កាត់ការឆ្លងរីករាលដាលជំងឺកូវីដ ដោយក្នុងនោះ ឯកឧត្តមបានរៀបចំចងក្រងសៀវភៅរបស់ក្រសួងព័ត៌មានមួយ ដែលនិយាយអំពីយុទ្ធនាការប្រយុទ្ធតទល់ និងជំងឺកូវីដ-១៩ ដែលចង់បញ្ជាក់ថា មិនមែនត្រឹមតែក្រុមគ្រូពេទ្យអាវសនោះទេ គឺមានការចូលរួមពីគ្រប់ផ្នែកទាំងអស់នៃក្រសួងព័ត៌មាន និងអ្នកសារព័ត៌មានផងដែរ។
ជាការផ្តល់ជាកិត្តិយសលើកទឹកចិត្ត ដល់ថ្នាក់ដឹកនាំ និងវាគ្មិនដែលបានចូលរួមក្នុងសិក្ខាសាលានាឱកាសនេះ ឯកឧត្តមរដ្ឋមន្រ្តី ខៀវ កាញារីទ្ធ បានជូនបាច់ផ្កា និងលិខិតថ្លែងអំណរគុណ ជូនលោកជំទាវ ខៀវ ទេព រង្ស៊ី កាញារីទ្ធ ប្រធានកិត្តិយសសមាគមនារីកម្ពុជាដើម្បីសន្តិភាព និងអភិវឌ្ឍន៏នៃក្រសួងព័ត៌មាន និងលោក ជំទាវ ឆៃ ច័ន្ទរិទ្ធីសូលីដា, លោកជំទាវ សន ម៉ារ៉ាដា, លោកជំទាវ ឈឹម គានណា, លោកជំទាវ ឡងឌី សាន់ណារ៉ា និងលោកជំទាវ ម៉ម ដាត្ថាលីណែត ៕
