ដើម្បីលើកតម្លៃសំណង់បុរាណឱ្យមានភាពស្រស់ស្អាត និងភាពរឹងមាំឡើងវិញ ក្រុមការងារជំនាញអាជ្ញាធរជាតិអប្សរាបានធ្វើការជួសជុល ពង្រឹងរចនាសម្ព័នខឿនរួតទី៣ ជ្រុងនិរតីឡើងវិញ ដែលការជួសជុលនេះ បានធ្វើឡើងចាប់តាំងពីដើមឆ្នាំ២០២១មក ដោយរហូតមកដល់ពេលនេះអ្នកជំនាញបានបញ្ចប់ការងារជួសជុលខឿនរួតទី៣ ជ្រុងនិរតីនៃប្រាសាទបាយ័ន្តនោះដោយជោគជ័យហើយ។
បើតាមកញ្ញា ម៉េង សុវណ្ណលីលីន ស្ថាបត្យករនៃនាយកដ្ឋានអភិរក្សប្រាសាទក្នុងឧទ្យានអង្គរ និងបុរាណវិទ្យាបង្ការ និងជាក្រុមការងារជួសជុលរួតទី៣ នៃប្រាសាទបាយ័ន្ត បានឱ្យដឹងនៅរសៀលថ្ងៃទី២៥ ខែសីហានេះថា ក្នុងដំណើការជួសជុលនេះ ក្រុមការងារផ្តោតសំខាន់ទៅលើជញ្ជាំងខឿនរបស់រួតទី៣ ជ្រុងនិរតីនេះតែម្តង បន្ទាប់មករើថ្មភក់ និងថ្មបាយក្រៀមនៅកន្លែងដែលក្រៀក ហែកចេញពីគ្នារួច ហើយអ្នកជំនាញបានយកទៅរៀបឡើងវិញ តាមលក្ខណៈដើម និងបានធ្វើតេស្តពិនិត្យ លើគុណភាពដីរបស់គ្រឹះបុរាណ ខណៈដែលការងារជួសជុលនេះ ក៏ត្រូវបានប្រើប្រាស់ថ្មថ្មីខ្លះៗ ដើម្បីជំនួសថ្មចាស់ ដែលបានខូចខាត។
ស្ថាបត្យកររូបនេះបញ្ជាក់ថា នៅក្នុងពេលជួសជុលនេះដែរ ក្រុមការងារបានជួបប្រទះបញ្ហាប្រឈមមួយចំនួនន ដោយត្រូវប្រើប្រាស់កម្លាំងមនុស្សសុទ្ធសាធទាំងការរើ និងជញ្ជូនថ្ម មិនអាចប្រើប្រាស់គ្រឿងយន្តបាន ព្រោះអាចនាំឱ្យមានហានិភ័យទៅដល់ប្រាសាទទាំងមូល។ ចំពោះការជួសជុលនេះដែរ ក្រុមអ្នកជំនាញ បានសហការជាមួយស្ថាប័ន JASA ប្រទេសជប៉ុន ដែលបានចាប់ផ្តើមការងារជួសជុល និងពង្រឹងរចនាសម្ព័ន្ធខឿននៅរួតទី៣ នៃប្រាសាទបាយ័ន្តឡើងវិញ កាលពីអំឡុងខែកុម្ភៈ ដើមឆ្នាំ២០២១មកម្ល៉េះ បន្ទាប់ពីពិនិត្យឃើញថា រួតទី៣ របស់ប្រាសាទមានការទ្រុឌទ្រោមជាច្រើនកន្លែង ដែលត្រូវទាមទារឱ្យមានការជួសជុល ដើម្បីថែទាំនិងអភិរក្សប្រាសាទបុរាណ ឱ្យនៅគង់វង្សសម្រាប់ផលប្រយោជន៍ដល់កូនចៅជំនាន់។
សូមជម្រាបថា ប្រាសាទបាយ័ន្តមានទីតាំងស្ថិតនៅចំកណ្តាលនៃរាជធានីអង្គរធំ ប្រាសាទនេះកសាងនៅចុងសតវត្សរ៍ទី១២ និងដើមសតវត្សរ៍ទី១៣ ដោយព្រះបាទជ័យវរ្ម័នទី៧។ តួប៉មនីមួយៗនៃប្រាសាទនេះ មានមុខបួនដែលមានកំពូល៤៩ និងកំពូលក្លោងទ្វារចូល៥ទៀត សរុបទាំងអស់ ៥៤កំពូល ដែលតំណាងឲ្យខេត្តក្រុងខ្មែរទាំង៥៤ នៅសម័យកាលនោះ។ កន្លងមកដោយសារកត្តាអាយុកាល អាកាសធាតុ និងដើមឈើជុំវិញនោះ បានធ្វើឱ្យរចនាសម្ព័ន្ធខឿននៅរួតទី៣ នៃប្រាសាទបានរងការខូចខាត ជាពិសេសកត្តាទឹកបានហូរច្រោះចូលរចនាសម្ព័ន្ធ ដែលនាំយកល្បាយខ្សាច់ចេញ នាំឱ្យមានបញ្ហានៅតាមជ្រុងកែងក្រៀកចេញពីគ្នា ដែលអាចប៉ះពាល់ដល់ខឿនរួតទី៣ និងសំណង់ប្រាសាទទាំងមូល ទើបក្រុមអ្នកជំនាញធ្វើការជួសជុលអោយមានភាពស្រស់ស្អាតទាក់ទាញអ្នកទេសចរណ៍ផងដែរ៕
អត្ថបទ នង រូបភាព៖ លោក ឈិត សាវី
កែសម្រួល៖ លោក អ៊ុន ណារាជ្យ
