កាលពីរសៀលថ្ងៃទី២៥ ខែសីហា ឆ្នាំ២០២១ម្សិលមិញនេះ លោក មេត លន អ្នកសម្របសម្រួលកម្មវិធីនៃ អង្គការអន្តរជាតិទេសន្តរប្រវេសន៍ប្រចាំខេត្តសៀមរាប ហៅកាត់ថា IOM និង សហការី បាននាំយកអំណោយរបស់គម្រោងឆ្លើយតបបន្ទាន់ដើម្បីសុខភាពពលករចំណូលស្រុករបស់អង្គការ មានជាសម្ភារប្រើប្រាស់ប្រចាំថ្ងៃដើម្បីសុខភាព ចំនួន ១.០០០ឃីត ដែលក្នុងឃីតនីមួយៗ មានចំនួន១៥មុខ ដូចជា ៖ កន្ទេល , មុង , ភួយ , អាវយឺត , ម៉ាស់ , អាល់កុលទឹក , ជែលអាកុល , ដបបាញ់អាល់កុល , ច្រាស់និងថ្នាំដុសធ្មេញ , សាប៊ូដុសខ្លួន និង សាប៊ូកក់សក់ មកប្រគល់ជូនដល់រដ្ឋបាលខេត្តសៀមរាប ក្រោមវត្តមានលោកស្រី យូ សុភា អភិបាលរងខេត្ត និងជាតំណាងដ៏ខ្ពង់ខ្ពស់ឯកឧត្តម ទៀ សីហា អភិបាលនៃគណៈអភិបាលខេត្តសៀមរាប សម្រាប់ឧបត្ថម្ភដល់ពលករកម្ពុជាទើបវិលត្រឡប់មកពីប្រទេសថៃ ហើយកំពុងស្នាក់នៅតាមមណ្ឌលចត្តាឡីស័កចំនួន៣ក្នុងក្រុងសៀមរាប ។
លោក មេត លន អ្នកសម្របសម្រួលកម្មវិធី នៃអង្គការ IOM ប្រចាំខេត្តសៀមរាប មានប្រសាសន៍ថា អំណោយទាំងងស់នេះ ជាគម្រោងឆ្លើយតបបន្ទាន់ដើម្បីសុខភាពពលករចំណូលស្រុករបស់អង្គការ ហើយអំណោយដែលប្រគល់ជូនដល់រដ្ឋបាលខេត្តសៀមរាបនាពេលនេះ គឺដើមី្បចូលរួមចំណែកជាមួយរាជរដ្ឋាភិបាល ក៏ដូចអាជ្ញាធរខេត្ត ក្នុងការប្រយុទ្ធប្រឆាំង និងកាត់ផ្តាច់ខ្សែចម្លងនៃជំងឺកូវីដ-១៩ ក្នុងខេត្តសៀមរាប សម្រាប់ឧបត្ថម្ភបន្តដល់ពលករកម្ពុជាទើបវិលត្រឡប់មកពីប្រទេសថៃ ហើយកំពុងស្នាក់នៅតាមដានសុខភាព តាមមណ្ឌលចត្តាឡីស័កក្នុងក្រុងសៀមរាប ។
លោក មេត លន មានប្រសាសន៍ទៀតថា អង្គការIOM មានគម្រោងជាច្រើន ដែលជាគម្រោងរួមគ្នារវាងរាជរដ្ឋាភិបាលកម្ពុជានិងអង្គការសហប្រជាជាតិ ក្នុងការប្រយុទ្ឋប្រឆាំងជំងឺកូវីដ-១៩ និងការដោះស្រាយផលប៉ះពាល់សេដ្ឋកិច្ច សង្គម ដោយវិបត្តិកូវីដ-១៩ ដែលបានអនុវត្តក្នុងខេត្តគោលដៅចំនួន៣ មានខេត្តសៀមរាប, ខេត្តបាត់ដំបង និងខេត្តបន្ទាយមានជ័យ ហើយនៅចំពោះមុខនេះ អង្គការនឹងបន្តធ្វើការផ្សព្វផ្សាយនៅតាមសហគមន៍ , បន្តផ្តល់កញ្ចប់អនាម័យ និង អាហារក្រៀមទៅពលករ រួមមានការជួយពង្រឹងទៅលើជីវភាពអ្នកចំណូលស្រុក។
មានប្រសាសន៍ក្នុងឱកាសនេះ ក្នុងនាមឯកឧត្តម ទៀ សីហា អភិបាលនៃគណៈអភិបាលខេត្តសៀមរាប លោកស្រី យូ សុភា អភិបាលរងខេត្ត បានថ្លែងនូវកោតសរសើរចំពោះកិច្ចសហការល្អរបស់អង្គការ IOM ជាមួយអាជ្ញាធរខេត្ត និងអាជ្ញាធរមូលដ្ឋានគ្រប់លំដាប់ថ្នាក់ ដើម្បីរួមគ្នាក្នុងការបង្ការ និងការពារជំងឺកូវីដ-១៩ កុំឲ្យមានការឆ្លងទៅអ្នកដទៃ និងសហគមន៍ហើយការផ្ដល់អំណោយនាពេលនេះ គឺបានបង្ហាញពីទឹកចិត្តយ៉ាងល្អប្រពៃជាវប្បធម៌នៃការចែករំលែក ចេះជួយគ្នាក្នុងគ្រាដែលជួបទុក្ខលំបាក និងជាការជួយទាន់ពេលវេលា និងចំគោលដៅហើយសកម្មភាពនេះ ជាការចូលរួមចំណែកយ៉ាងសកម្មជាមួយរដ្ឋបាលខេត្ត ដូចជារាជរដ្ឋាភិបាល ក្នុងការងារមនុស្សធម៌ និងការងារប្រយុទ្ធប្រឆាំង និងទប់ស្កាត់ជំងឺកូវីដ-១៩។ ជាមួយគ្នានោះ រាជរដ្ឋាភិបាលកម្ពុជា ដូចជាអាជ្ញាធរខេត្តគឺមានការយកចិត្តទុកដាក់ខ្ពស់ចំពោះបងប្អូនប្រជាពលរដ្ឋយើងដែរត្រឡប់មកពីក្រៅប្រទេស ទាំងការធ្វើដំណើរ ការហូបចុកប្រចាំថ្ងៃ សម្ភារៈប្រើប្រាស់ បញ្ហាសុខភាព ជាពិសេសកន្លែងសម្រាប់បងប្អូនស្នាក់នៅសម្រាប់ចត្ថាឡីស័កផងដែរ។
លោកស្រី យូ សុភា មានប្រសាសន៍ទៀតថា បច្ចុប្បន្ននេះ ការឆ្លងរាលដាលជំងឺកូវីដ-១៩ នៅក្នុងភូមិសាស្រ្តខេត្តសៀមរាប នៅកើតមានឡើងនៅឡើយ ដូច្នេះក្នុងឱកាសនេះ សូមអំពាវនាវដល់បងប្អូនប្រជាពលរដ្ឋទាំងអស់ ចូលរួមជាមួយថ្នាក់ដឹកនាំ មន្ត្រីរាជការ កងកម្លាំងប្រដាប់អាវុធ និង ព្រះសង្ឃក្នុងទូទាំងខេត្ត ក្នុងប្រយុទ្ឋប្រឆាំង និង ទប់ស្កាត់ ការឆ្លងរាលដាលជំងឺកូវីដ-១៩នេះ ជាពិសេសត្រូវគោរពប្រតិបត្តិឲ្យបានខ្ជាប់ខ្ជួននូវវិធានការ ៣កុំ ៣ការពារ និង២ចូលរួមរបស់រាជរដ្ឋាភិបាល និង វិធានការនានារបស់ក្រសួងសុខាភិបាល៕
អត្ថបទ និង រូបភាព ៖ លោក យូ វង្ស និង លោក ងិន គឹមឡេង
កែសម្រួលអត្ថបទ ៖ លោក លីវ សាន្ត
