សមាគមនារីកម្ពុជាដើម្បីសន្តិភាពនិងអភិវឌ្ឍន៍ នៃក្រសួងព័ត៌មាន នៅរសៀលថ្ងៃទី២៤ ខែសីហា ឆ្នាំ២០២១ បានបើកសិក្ខាសាលាស្តីពីការបញ្ជ្រាបការយល់ដឹងដើម្បីការពារ និងទប់ស្កាត់ការរីករាលដា នៃជំងឺកូវីដ-១៩ ក្រោមអធិបតីភាព លោកជំទាវ ច័ន្ទ ធី រដ្ឋលេខាធិការក្រសួងព័ត៌មាន និងជាអនុប្រធានអចិន្ត្រៃយ៍ និងលោកជំទាវ ខៀវ ទេព រង្ស៊ី កាញារីទ្ធ ប្រធានកិតិ្តយស សមាគមនារីកម្ពុជាដើម្បីសន្តិភាព និងអភិវឌ្ឍន៏នៃក្រសួងព័ត៌មាន សិក្ខាសាលានេះធ្វើឡើងដោយមានការចូលរួមផ្ទាល់ និងតាមរយៈប្រពន្ធ័វិឌីអូ ដោយមានការចូលរួមពីថ្នាក់ដឹកនាំសមាជិកសមាជិកាសមាគមនារីកម្ពុជាដើម្បីសន្តិភាព និងអភិវឌ្ឍន៏នៃក្រសួងព័ត៌មានតាមបណ្តាខេត្ត និងរាជធានី។
បើតាមលោកជំទាវ ឡងឌី សាន់ណារ៉ា អនុរដ្ឋលេខាធិការ និងជាប្រធានប្រតិបត្តិ សមាគមនារីកម្ពុជាដើម្បីសន្តិភាព និងអភិវឌ្ឍន៏នៃក្រសួងព័ត៌មាន បានបញ្ជាក់ថា ក្នុងឆ្នាំ២០២១នេះ គឺជាពេលវេលដ៏លំបាកដែលថ្នាក់ដឹកនាំ មន្ត្រីរាជការ កងកម្លាំង ប្រដាប់អាវុធ គ្រូពេទ្យ អាជ្ញាធរ ក៏ដូចប្រជាពលរដ្ធបាននឹងកំពុងប្រឹងតស៊ូទប់ទល់ នឹងបញ្ហាប្រឈមដែលបង្កដោយការរាតត្បាតនៃជំងឺកូវីដ-១៩ និងមេរោគបផ្លែងថ្មី ហើយពេលនេះក៏ជាពេលវេលាមួយដ៏សមស្រប ដែលត្រូវផ្តល់កម្លាំងចិត្ត ពង្រឹងស្មារតី និងដាស់ទឿន ក្រើនរំលឹកអំពី ការទប់ស្កាត់ និងប្រយុទ្ធប្រឆាំងនិងជំងឺកូវិដ ដោយប្រកាន់ខ្ជាប់តាមវិធានការណ៍សុខាភិបាល និងការណែនាំរបស់ប្រមុខរាជរដ្ឋាភិបាល បានដាក់ចុះ។ ដោយមានការចង្អុលបង្ហាញ ពីឯកឧត្តមរដ្ឋមន្ត្រីក្រសួងព័ត៌មាន និងក្រោមការយកចិត្តទុកដាក់ពីលោក ជំទាវប្រធានកិត្តយស បានផ្តល់នូវជំនឿចិត្ត ក្នុងការរៀបចំសិក្ខាសាលានេះឡើង ដើម្បីចូលរួមជាមួយរាជរដ្ឋាភិបាល ក្នុងការទប់ស្កាត់ជំងឺកូវីដ-១៩ និងមេរោគបំលែងថ្មី Delta ។
លោកជំទាវ ចន្ទ័ ធី បានមានប្រសាសន៍ថា មកដល់ពេលនេះជំងឺកូវីដ-១៩ បានឆក់យកជីវិតមនុស្សអស់រាប់លាននាក់ និងបង្កឲ្យមានឱនភាពសេដ្ឋកិច្ច ព្រមទាំងវិបត្តិ សុខភាពសាធារណៈយ៉ាងធ្ងន់ធ្ងរទូទាំងពិភពលោក។ ប្រឈមមុខនឹងសភាពការដ៏អាក្រក់នេះ រាជរដ្ឋាភិបាលកម្ពុជាដែលមានសម្ដេចតេជោ ហ៊ុន សែន បានរិះរកនូវគ្រប់វិធីសាស្ត្រ និងវិធានការណ៍ចាំបាច់និងទាន់ពេលវេលា ដើម្បីការពារ ទប់ស្កាត់ នូវការឆ្លងរីករាលដាលនូវជំងឺដ៏កាចសាហាវគ្មានថ្នាំព្យាបាលនេះ។ ដើម្បីប្រសិទ្ធភាព នៃការអនុវត្ត វិធានការទាំងនេះ រាជរដ្ឋាភិបាលក៏បានរៀបចំបន្ទាន់នូវវិធានច្បាប់នានា ក្នុងការទប់ស្កាត់នូវការឆ្លងរីករាលដាលជំងឺកូវីដ-១៩នេះ។ ទន្ទឹមគ្នានេះដែរ គ្រប់ស្ថាប័នទាំងរដ្ឋ និងស្ថាប័នឯកជន ព្រមទាំងប្រជាពលរដ្ឋបានចូលរួមអនុវត្តន៍យ៉ាងសកម្មនូវវិធានការ ៣ការពារ ៣កុំ គោរពតាមអនុសាសន៍ដ៏ខ្ពង់ខ្ពស់របស់ សម្តេចតេជោ នាយករដ្ឋមន្ត្រី។ តាមរយះនេះ ក្រសួងព័ត៌មានបានដើរតួនាទីសំខាន់ក្នុងការផ្សព្វផ្សាយនិងចែករំលែកព័ត៌មាន ជូនដល់មហាជន។ ដូចនេះ ហើយសិក្ខាសាលាថ្ងៃនេះមានគោលបំណងចែករំលែកចំណេះដឹងបន្ថែមជូនដល់ស្ត្រីអ្នកសារព័ត៌មាន ដើម្បីយកទៅអនុវត្តក្នុងការរស់នៅប្រចាំថ្ងៃក្នុងបរិបទកូវីដ-១៩នេះ ព្រមទាំងអាចយកទៅតាក់តែងសរសេរក្នុងអត្ថបទសារព័ត៌មានរបស់ខ្លួន ផ្សព្វផ្សាយជា ប្រយោជន៍ដល់សាធារណជនទូទៅទៀតផង។
នៅក្នុងអង្គសិក្ខានេះដែរ លោកជំទាវ ខៀវ ទេព រង្ស៊ី កាញារីទ្ធ បានធ្វើបទបង្ហាញទាក់ទងពីប្រវត្តិនៃការកើតមានមេរោគកូវីដ និងមានវិធានការការពារកុំអោយមានការឆ្លង តាមរយះវិធានការ ៣ កុំ ៣ ការពារ ។ កូវីដ-១៩ ត្រូវបានរីករាលដាលតាមរយះ ផ្លូវដង្ហើមតាមដំណក់ទឹកតូចៗដែលចេញពីច្រមុះ និងមាត់របស់មនុស្សដែលមានផ្ទុកវីរុស កូវីដ ដោយសារការនិយាយ ក្អក ដកដង្ហើម និងកណ្តាស់ពុំពាក់ម៉ាស។ កូវីដជានិច្ចកាលឆ្លងពីមុស្សម្នាក់ទៅមនុស្សម្នាក់ ដោយមានទំនាក់ទំនងនៅជិត ប្រហែល ១.៥ ម៉ែត្រ នៅជាមួយអ្នកជំងឺកូវីដ រយះពេលយូរអាចឆ្លងតាមរយះខ្យល់បរិយាកាសជាដើម។ លោកជំទាវ បានផ្តល់ជាមតិយោបល់នានាជាច្រើនដល់សមាជិកសមាជិកា សិក្ខាកាមនៃអង្គសិក្ខាសាលា តាមការបញ្ជ្រាបការយល់ដឹង ដើម្បីការពារ និងទប់ស្កាត់ការរីករាលដាលនៃជំងឺកូវីដ និងការបំប្លែងថ្មីរបស់វា៕
