លោក ក្រុស សារ៉ាត់ ប្រធានមន្ទីរសុខាភិបាល នៃរដ្ឋបាលខេត្តសៀមរាប បានមានប្រសាសន៍ថា មន្ទីរពិសោធន៍វិភាគសំណាករកវីរ៉ុសកូវីដ-១៩ ដែលមានទីតាំងស្ថិតនៅក្នុងមន្ទីពេទ្យបង្អែកខេត្តសៀមរាប សម្រាប់វិភាគលើវត្ថុសំណាក ស្រាវជ្រាវរកវីរ៉ុសកូវីដ-១៩ ដែលមន្ទីរបង្អែកខេត្តសៀមរាបសាងសង់ថ្មីយ៉ាងប្រញ៉ាប់ប្រញ៉ាល់ក្នុងផែនការបន្ទាន់ ក្រោមការប្រើប្រាស់ថវិកាធនាគារពិភពលោក តាមរយៈក្រសួងសុខាភិបាល ដែលគ្រោងនឹងដាក់ឲ្យប្រើប្រាស់ជាផ្លូវការនៅក្នុងខែកញ្ញាឆ្នាំ២០២១ខាងមុខនេះ ត្រូវបានដាក់ឲ្យដំណើរការមុនការគ្រោងទុកហើយនៅក្នុងខែសីហានេះ បន្ទាប់ពីបានបំពាក់សម្ភារឧបករណ៍ និងដំណើរការសាកល្បងកាលនៅក្នុងអំឡុងខែកក្កដាកន្លងមកនេះ ហើយមន្ទីរពិសោធន៍មួយនេះ មានគុណភាពខ្ពស់ក្នុងការបង្ហាញលទ្ធផលវិភាគ និងមានសមត្ថភាពប្រតិបត្តិការក្រោម ១.០០០ សំណាកក្នុងមួយថ្ងៃ ។
លោក ក្រុស សារ៉ាត់ មានប្រសាសន៍យ៉ាងដូច្នេះ នៅក្នុងសេចក្ដីរាយការណ៍ជូនឯកឧត្តមសាស្រ្តាចារ្យ ម៉ម ប៊ុនហេង រដ្ឋមន្រ្តីក្រសួងសុខាភិបាល ក្នុងឱកាសចុះត្រួតពិនិត្យកិច្ចដំណើរការរបស់មន្ទីរពិសោធន៍នេះ ។
ក្នុងឱកាសនោះដែរ ឯកឧត្តមសាស្រ្តាចារ្យ ម៉ម ប៊ុនហេង បានសម្ដែងនូវក្តីមោទនភាពចំពោះការខិតខំប្រឹងនេះ សម្រាប់ខេត្តសៀមរាប ដោយមិនចាំបាច់បញ្ជូនវត្ថុសំណាកមកភ្នំពេញទៀតនោះឡើយ បើទោះបីពុំទាន់មានសមត្ថភាពវិភាគរកវីរ៉ុសបន្លែងថ្មីក៏ដោយ ដែលទាំងនេះគឺជាលទ្ធភាពនៃការឆ្លើយតបទាន់ពេលវេលា ចំពោះដំណោះស្រាយកកស្ទះ ការធ្វើវិភាគសំណាករកអ្នកជំងឺ៕
អត្ថបទ និង រូបភាព៖ លោក ងិន គឹមឡេង
កែសម្រួលអត្ថបទ ៖ លោក លីវ សាន្ត
