គណៈកម្មការផ្សព្វផ្សាយ និងព័ត៌មាននៃក្រសួងព័ត៌មាន បានបើកកិច្ចប្រជុំក្រុមការងាររៀបចំព្រឹត្តការណ៏អមស្តីពី វេទិកានិពន្ធនាយកសារព័ត៌មាន អាស៊ី-អឺរ៉ុប លើកទី១០ នៅព្រឹកថ្ងៃទី០២ ខែកញ្ញា ឆ្នាំ២០២១ ដោយមានការចូលរួមប្រជុំផ្ទាល់ និងតាមប្រពន្ធ័Zoom ក្រោមវត្តមាន ប្រធានអង្គប្រជុំ ឯកឧត្តម មាស សុភ័ណ្ឌ អនុរដ្ឋលេខាធិការក្រសួងព័ត៌មាន និងជាអនុប្រធានគណៈកម្មការរៀបចំព្រឹត្តិការណ៍អម នៃកិច្ចប្រជុំកំពូលអាស៊ី-អឺរ៉ុប លើកទី១៣។
កិច្ចប្រជុំផ្ទៃក្នុងនាឱកាសនេះ បានលើកឡើងនូវកិច្ចការងារនានាសម្រាប់រៀបចំវេទិកានិពន្ធនាយកសារព័ត៌មានលើកទី១០ ដែលគ្រោងធ្វើនៅក្នុងខែវិច្ឆិកា ខាងមុខនេះ ហើយកិច្ចប្រជុំក៏បានពិនិត្យមើលទៅលើវឌ្ឍនៈភាពការងារក្នុងផ្នែកនីមួយៗសម្រាប់រៀបចំវេទិកាតុមូល ដោយព្រាងជាខ្លឹមសារ ការត្រៀមទីកន្លែង ការសម្របសម្រួល ការចូលរួម របស់អ្នកសារព័ត៌មានក្នុងស្រុក ។ កិច្ចប្រជុំក៏បានផ្តោតជាសំខាន់លើការផ្សព្វផ្សាយ នូវកម្មវិធីបើក និងបិទ កិច្ចប្រជុំកំពូលអាស៊ី-អឺរ៉ុប ASEM លើកទី១៣ ដោយក្នុងការងារនេះ អគ្គនាយកដ្ឋានទូរទស្សន៏ជាតិកម្ពុជា វិទ្យុជាតិកម្ពុជា និងទីភ្នាក់ងារសារព័ត៌មានកម្ពុជា AKP បានត្រៀមរួចរាល់ ហើយធ្វើការផលិត សិក្សាស្រាវជ្រាវអត្ថបទ ខ្លឹមសារ រូបភាព ទាក់ទងកិច្ចប្រជុំកំពូលអាស៊ី-អឺរ៉ុប លើកទី១៣ រយះពេល ២ថ្ងៃនេះផងដែរ។
ដូច្នេះជាជំហានទៅមុខទៀតក្រុមការ ងាររបស់ក្រសួងព័ត៌មាន បាននឹងកំពុងពន្លឿនកិច្ចការមួយចំនួនជាមួយ មូលនិធិអាស៊ី-អឺរ៉ុប ដើម្បីផ្លាស់ប្តូរព័ត៌មាន ក៏ដូចជាធ្វើបច្ចុប្បន្នភាពនៃការត្រៀមលក្ខណៈ សម្រាប់រៀបចំព្រឹត្តការណ៏ និពន្ធនាយកសារព័ត៌មានលើកទី១០ ។
