ឯកឧត្ដមឧត្តមសេនីយ៍ឯក ពៅ ស៊ា នាយកមជ្ឈមណ្ឌលអភិវឌ្ឍន៍យោធិនពិការ សម្តេចតេជោហ៊ុន សែន គូលែន៣១៧សៀមរាប បានឲ្យដឹងថា ការចាក់វ៉ាក់សាំងការពារជំងឺកូវីដ-១៩ ដូសទី៣ ឬដូសជំរុញ សម្រាប់បងប្អូនយោធិនពិការរស់នៅក្នុងមជ្ឈមណ្ឌលនេះ ត្រូវបានបែងចែកជាពីរវគ្គ គឺវគ្គទី១ បានចាប់ដំណើរការកាលពីថ្ងៃទី១៣ ខែសីហា ឆ្នាំ២០២១នេះ ហើយបានបញ្ចប់ទៅហើយដែរ ដែលបានចាក់ជូនបងប្អូនជាយោធិនពិការ និងក្រុមគ្រួសារបានជាង៣៧០នាក់ និង វគ្គទី២ បានចាប់ដំណើរការនៅថ្ងៃទី០៣ ខែកញ្ញា ឆ្នាំ២០២១នេះ ដោយត្រូវចាក់ជូនបងប្អូនដែលនៅសេសសល់ប្រមាណជាង២០០នាក់ទៀត ។
ឯកឧត្ដមឧត្តមសេនីយ៍ឯក ពៅ ស៊ា មានប្រសាសន៍ទៀតថា ជាមួយនឹងលទ្ធផលនៃការចាក់វ៉ាក់សាំងការពារជំងឺកូវីដ-១៩ ដូសទី៣ ជូនបងប្អូនដែលជាយោធិនពិការ នាពេលនេះ គឺជាការយកចិត្តទុក្ខដាក់ខ្ពស់របស់ប្រមុខរាជរដ្ឋាភិបាលកម្ពុជា ដែលមានសម្ដេចតេជោ ហ៊ុន សែន ជានាយករដ្ឋមន្ត្រី ក៏ដូចជាថ្នាក់ដឹកនាំក្រសួងការពារជាតិ ដែលមានសម្ដេច ពិជ័យសេនា ទៀ បាញ់ ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ មកលើសុខមាលភាពប្រជាពលលរដ្ឋ ជាពិសេសយោធិនពិការ និងក្រុមគ្រួសារ ដូច្នេះ ក្នុងនាមយោធិនពិការទាំងអស់ក្នុងមជ្ឈមណ្ឌល សូមថ្លែងអំណរគុណយ៉ាងជ្រាលជ្រៅបំផុតចំពោះសម្ដេចតេជោ ហ៊ុន សែន និង សម្ដេចពិជ័យសេនា ទៀ បាញ់ និង សូមបួងសួងដល់វត្ថុស័ក្ដិសិទ្ធិក្នុងលោក ជួយតាមថែរក្សាសម្ដេចទាំងពីរ និង ជួបប្រទះនឹងពុទ្ធទាំង៤ប្រការ គឹអាយុ វណ្ណៈ សុខៈ និង ពលៈកុំបីឃ្លាងឃ្លាតឡើយ ។
ឯកឧត្ដមឧត្តមសេនីយ៍ឯក ពៅ ស៊ា មានប្រសាសន៍បន្ថែមទៀតថា បើទោះបីបច្ចុប្បន្ននេះ មានបងប្អូនក្នុងមជ្ឈមណ្ឌលចំនួន០២នាក់ មានវិជ្ជមានជំងឺកូវី-១៩ក៏ពិតមែន ប៉ុន្តែបងប្អូនយោធិនពិការទាំងអស់ បាននឹងកំពុងរួមគ្នាការពារនិងទប់ស្កាត់នូវការឆ្លងរីករាលដាលនៃជងឺនេះ យ៉ាងយកចិត្តទុកដាក់បំផុត ដោយអនុវត្តតាមការណែនាំរបស់ក្រសួងសុខាភិបាល និងវិធានការរបស់រាជរដ្ឋាភិបាល ៣កុំនិង៣ការពារ បានខ្ជាប់ខ្ជួនជានិច្ច ៕
ព័ត៌មានជាតិ ថ្មីៗ
អត្ថបទ និង រូបភាព៖ លោក ជា ស្រស់
កែសម្រួលអត្ថបទ ៖ លោក លីវ សាន្ត
