កាលពីព្រឹកថ្ងៃទី០៣ ខែកញ្ញា ឆ្នាំ២០២១នេះ មានរៀបចំបើកកិច្ចប្រជុំមួយតាមប្រព័ន្ធអនឡាញ ស្ដីពីពិនិត្យមើលអំពីវឌ្ឍនភាព ការសិក្សាអំពីបញ្ហាប្រឈម ដំណោះស្រាយ រួមទាំងការឆ្លើយតបចំពោះសំណូមពរ ចំពោះការផ្សាយវិទ្យុមិត្តភាព នៃបណ្តាខេត្តជាប់ព្រំដែនកម្ពុជា-ថៃ ដែលរៀបចំឡើងដោយការិយាល័យព័ត៌មានភូមិភាគទី២ នៃព្រះរាជាណាចក្រថៃ ទំនាក់ទំនងចេញពីខេត្តសុរិន្ទ និងសម្របសម្រួលដោយក្រសួងព័ត៌មាន នៃព្រះរាជាណាចក្រកម្ពុជា ។
ចូលរួមក្នុងកិច្ចប្រជុំនេះ ខាងភាគីកម្ពុជាដឹកនាំដោយឯកឧត្តម តូច ណារ័ត្ន ទីប្រឹក្សាក្រសួងព័ត៌មាន ទទួលបន្ទុកវិទ្យុអេហ្វអ៊ឹមជាតិ និងវិទ្យុអេហ្វអ៊ឹមរាជធានី-ខេត្ត និងជាអន្តរការីនៃកិច្ចប្រជុំ រួមជាមួយឯកឧត្ដម លោក លោកស្រី ជាប្រធានមន្ទីរ និង មន្ត្រីនៃមន្ទីរព័ត៌មានខេត្តជាប់ព្រំដែនកម្ពុជា-ថៃ មានខេត្តឧត្ដរមានជ័យ , ខេត្តព្រះវិហារ និង ខេត្តសៀមរាប និង ខាងភាគីថៃ ដឹកនាំកិច្ចប្រជុំដោយលោក ឌូស៊ីត ស៊ឹងគិរី នាយកការិយាល័យព័ត៌មានភូមិភាគ២ រួមនឹងថ្នាក់ដឹកនាំនៃមន្ទីរព័ត៌មានខេត្តសុរិន្ទ និងខេត្តបូរីរ៉ាំ រួមទាំងមន្រ្តីសំខាន់ៗដែលពាក់ព័ន្ធផងដែរ ។
មានប្រសាសន៍នៅក្នុងកិច្ចប្រជុំនោះ លោក ឌូស៊ីត ស៊ឹងគិរី បានវាយតម្លៃខ្ពស់ចំពោះការខិតខំប្រឹងប្រែងរបស់ស្ថានីយ៍វិទ្យុទាំង៤ រួមមាន ៖ សុរិន្ទ , សៀមរាប , ឧត្តរមានជ័យ និងព្រះវិហារ បានសហការគ្នាយ៉ាងល្អប្រសើរ ក្នុងដំណើរការផ្សព្វផ្សាយព័ត៌មានរបស់ខ្លួន ទាំងការផលិតកម្មវិធី បម្រើឲ្យលើគ្រប់វិស័យ វប្បធម៌ ប្រពៃណី ទេសចរណ៍ បរិស្ថាន កសិកម្ម និងវិស័យសក្តានុពលផ្សេងៗទៀតផងដែរ ហើយជោគជ័យទាំងនេះ ក៏ជាកញ្ចក់ឆ្លុះបង្ហាញអំពីការគាំទ្រយ៉ាងពេញទំហឹងផងដែររបស់ក្រុមការងារសម្រាប់ការអនុវត្ត កម្មវិធីផ្សាយសម្លេងវិទ្យុមិត្តភាព នាំបណ្តាខេត្តជាប់ព្រំដែនកម្ពុជានិងថៃ។
មានប្រសាសន៍នៅក្នុងកិច្ចប្រជុំនោះដែរ ឯកឧត្តម ទូច ណារ័ត្ន បានបញ្ជាក់ថា កិច្ចប្រជុំនេះ បានផ្តោតជាសំខាន់ទៅលើការអភិវឌ្ឍវិស័យទំនាក់ទំនងព័ត៌មាន ការវាយតម្លៃអំពីគុណភាពនៃការផ្សាយ ហើយអ្វីដែលអង្គប្រជុំគិតថា ជាចក្ខុវិស័យដើម្បីការរីកចម្រើនសម្រាប់អនាគតនោះ គឺការទទួលយកសំណូមពរដៃគូ ពង្រឹងបន្ថែមលើផ្នែកបច្ចេកទេស ការបណ្តុះបណ្តាលភាសា ការអភិវឌ្ឍកម្មវិធី បង្កើនភាពទាក់ទាញពីអ្នកស្តាប់។ វិទ្យុ កម្ពុជា-ថៃ គឺជាស្ពាននៃការកសាងសម្ព័ន្ធមេត្រីភាព នៃប្រជាជនទាំង២ ហើយកម្ពុជា រីករាយស្វាគមន៍ចំពោះភាគីថៃ រាល់ដំណើរការនៃកិច្ចប្រជុំដទៃទៀត ដើម្បីការរីកចម្រើនរឹងមាំ ការផ្សាយសម្លេងវិទ្យុមិត្តភាពកម្ពុជា-ថៃ នៃបណ្តាខេត្តជាប់ព្រំដែន។ នៅមានខេត្តមួយចំនួនទៀត ជាគោលដៅសម្រាប់អនាគត ។
គួររំលឹកថា ក្រោមគោលការណ៍អធិបតេយ្យភាព ជាង២ឆ្នាំកន្លងមកនេះ ការផ្សាយវិទ្យុមិត្តភាពកម្ពុជា-ថៃ ( Twin Radio ) នៃបណ្តាខេត្តជាប់ព្រំដែន បានដើរតួនាទីយ៉ាងសំខាន់ ក្នុងការរឹតចំណងសាមគ្គីភាព មិត្តភាព កិច្ចសហប្រតិបត្តិការ និងឈានឆ្ពោះទៅរកការកសាងព្រំដែនសន្តិភាព និងការអភិវឌ្ឍន៍ ៕
អត្ថបទ ៖ លោក ងិន គឹមឡេង
កែសម្រួលអត្ថបទ ៖ លោក លីវ សាន្ត
