កាលពីពេលថ្មីៗនេះ មន្ត្រីសង្ឃសាលាគណខេត្តសៀមរាប ដឹកនាំដោយព្រះសច្ចានុបាល ភទ្ទកោ នឿម វុទ្ធី ព្រះរាជាគណ:ថ្នាក់កិត្តិយស និងជាព្រះចៅអធិការវត្តបារាយមហានទីរតនារាមហៅវត្តស្វាយរមៀត រួមជាមួយព្រះរាជាគណ: ព្រះចៅអធិការ និងព្រះថេរានុត្ថេរៈ មួយចំនួនទៀត នៅក្រុងសៀមរាប និងស្រុកប្រាសាទបាគង បាននិមន្តចុះសួរសុខទុក្ខ ដល់គ្រួសារមួយដែលសម្រាលកូនភ្លោះ៣នាក់ នៅភូមិគោកធ្លក ឃុំកណ្តែក ស្រុកប្រាសាទបាគង និងបាននាំទៅជាមួយនូវទេយ្យវត្ថុមួយចំនួនមាន អង្ករ ១០០គ.ក្រ, មី ៥កេះ, ទឹកបរិសុទ្ធ ២កេះ, ទឹកត្រី ២យួរ, ទឹកស៊ីអ៉ីវ ២យួរ, ត្រីខ ១យួរ, ទឹកដោះគោ ៤កំប៉ុង, ស្ករស ៣គ.ក្រ, អំបិល ២គ.ក្រ, បច្ច័យ ៥៧០,០០០រៀល។ កូនលើកទី៣ ភ្លោះ ប្រុសទាំង៣នាក់ បានសម្រាលកាលពីវេលាម៉ោង១០ និង៤០នាទីព្រឹក នាថ្ងៃទី២៩ ខែសីហា ឆ្នាំ២០២១ នៅមន្ទីរពេទ្យព្រះបាទជ័យវរ្ម័នទី៧ ដែលមានឪពុកឈ្មោះ ចិន ទ្រា អាយុ៣០ឆ្នាំ និងម្តាយឈ្មោះ សុខ សៅ អាយុ៣៣ឆ្នាំ ។គ្រួសារនេះមានមុខរបរធ្វើស្រែ មានកូនសរុបទាំងអស់៥នាក់ ស្រី១ប្រុស៤ ។ ឪពុកកូនភ្លោះ បង្ហាញនូវក្តីរំភើបរីករាយ និងត្រេកអរឥតឧបមានូវការយកចិត្តទុកដាក់សួរសុខទុក្ខពីសំណាក់ថ្នាក់ដឹកនាំ កាកបាទក្រហមកម្ពុជា សាខាកាកបាទក្រហមកម្ពុជាខេត្តសៀមរាប ថ្នាក់ដឹកនាំខេត្ត និងព្រះសង្ឃ ដែលបាននិមន្ត និងអញ្ជើញមកសួរសុខទុក្ខព្រមទាំងបាននាំយកអំណោយជាសម្ភារ: ថវិកា និងគ្រឿងឧបភោគបរិភោគ ជាបន្តបន្ទាប់ផងដែរ ខណ:ពេលមុនសម្រាលកូនទាំងបីនេះ គ្រួសារគាត់ពិតជាជួបការលំបាកផ្នែកជីវភាពពិតប្រាកដមែន ។
លោកចិន ទ្រា បានមានប្រសាសន៍ថា៖ ក្រោយពីកូនគាត់ទាំងបីសម្រាលរួចមក ក្រុមការងារសហភាពសហព័ន្ឋយុវជនកម្ពុជាខេត្ត, សាខាកាកបាទក្រហមកម្ពុជាខេត្ត សៀមរាប នាំយកអំណោយជាសម្ភារ: និងគ្រឿងឧបភោគបរិភោគ ជាបន្តបន្ទាប់ ជាពិសេសនៅថ្ងៃទី០៤ខែសីហាឆ្នាំ២០២១សាខាកាកបាទក្រហមកម្ពុជាខេត្ត បាននាំយកអំណោយដ៏ថ្លៃថ្លារបស់សម្ដេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា និងសម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ប្រធានកាកបាទក្រហមកម្ពុជា រួមមាន អង្ករចំនួន ៥០គ.ក្រ ,ទឹកដោះគោចំនួន ២កេស , ស្ករសចំនួន ៥គ.ក្រ , ក្រម៉ាចំនួន២ , សារ៉ុងចំនួន២ និងថវិកាចំនួន៥លានរៀល។
ព្រះគ្រូ សច្ចានុបាល នឿម វុទ្ឋី ព្រះចៅអធិការវត្តបារាយណ៍មហានទីរតនារាម ហៅវត្តស្វាយរមៀតមានសង្ឃដីកាថា៖ អ្វីដែលជាគោលបំណងដ៏សំខាន់របស់មន្ត្រីសង្ឃ និងចៅអធិការជួបសួរសុខទុក្ខប្រាស្រ័យទាក់ទងជាមួយគ្រួសារមួយនេះ ដោយចង់ដឹងពីសុខភាពទារកទាំងបី និងសុខភាពមាតាក្រោយពីសម្រាលរួច រីឯសម្ភារ:ស្បៀងអាហារ និងថវិកាបន្តិចបន្តួចបានមកពីការចូលរួមពីមន្ត្រីសង្ឃសាលាគណខេត្ត និងព្រះចៅអធិការវត្តមួយចំនួន យកមកប្រគល់ជូននេះគឺជាការសួរសុខទុក្ខ និងបង្ហាញពីទឹកចិត្ត សណ្តោសមេត្តា ករុណា របស់ក្រុមព្រះសង្ឃជាមួយនឹងគ្រួសារដែលទើបសម្រាលកូនភ្លោះដល់ទៅ៣ ដោយសារកន្លងមកលឺថាមានការខ្វះខាតក្នុងជីវភាពជាពិសេសខ្វះទឹកដោះគោកូន។ មួយវិញទៀតគ្រួសារដែលទើបតែសម្រាលកូនរួចនេះ ស្វាមី មិនអាចចេញទៅប្រកបរបរ និងធ្វើស្រែបានដូចធម្មតានោះទេ គឺត្រូវនៅមើលថែទាំងកូន និងភរិយាកំពុងសសៃខ្ចី។
ព្រះអង្គ ក៏បានលើកទឹកចិត្តដល់មា្តយឪពុកទារកឱ្យយកចិត្តទុកដាក់គិតគូពីសុខភាពជាចម្បង ការបរិភោគត្រូវមានអនាម័យជាដើមផង ដើម្បីឱ្យទារកលូតលាស់បានល្អលើសពីនេះ ក៏មិនត្រូវភ្លេចការពារពីការឆ្លងនៃជំងឺកូវីដ-១៩នោះឡើយ គឺត្រូវអនុវត្តឱ្យបានខ្ជាប់ខ្ជួនទៅតាមការណែនាំ របស់ក្រសួងសុខាភិបាល ក៏ដូចជាវិធានការ៣ការពារ និង៣កុំរបស់រាជរដ្ឋាភិបាល គឺ “៣ការពារ” ទី១ដោយការពាក់ម៉ាស់ ២/លាងសំអាតដៃឱ្យបានញឹកញាប់ ៣) រក្សា គម្លាតសុវត្ថិភាពសង្គមបុគ្គលម្នាក់ទៅម្នាក់ឱ្យបានយ៉ាងតិចមួយម៉ែត្រកន្លះឡើងទៅឱ្យបានគ្រប់ៗគ្នា និង”៣កុំ” គឺកុំទី១ កុំចូលទៅទីកន្លែងបិទជិតគ្មានខ្យល់ចេញចូល និងប្រើម៉ាស៊ីនត្រជាក់ច្រើន កុំទី២ កុំទៅទីដែលមានមនុស្សច្រើនកុះករ និងកុំទី៣ កុំប៉ះពាល់គ្នា ជួបជុំគ្នាច្រើនជាដើម៕ អត្ថបទ និងរូបភាព: លោកយូ វង្ស កែសម្រួលដោយ លីវ សុខុន!!! សូមឯកឧត្តមមេត្តាជ្រាប សូមអរគុណ ។
