នៅថ្ងៃទី០៥ ខែកញ្ញា ឆ្នាំ២០២១នេះ មន្ត្រីសង្ឃ ក្រុងសៀមរាប ខេត្តសៀមរាប និមន្តដឹកនាំដោយព្រះវិជ័យរង្សីបណ្ឌិត ឡាច លាង ព្រះរាជាគណ:ថ្នាក់កិត្តិយសព្រះធម្មធរគណខេត្តសៀមរាប ជាព្រះអនុគណក្រុងសៀមរាប និងជាព្រះចៅអធិការវត្តវប្រាសាទរង្សី ហៅវត្តថ្មី ក្នុងក្រុងសៀមរាប និងមន្ត្រីសង្ឃ រួមនឹងសប្បុរសជន បាននាំយកទេយ្យទាន គ្រឿងឧបភោគបរិភោគ និងថវិកាមួយចំនួន ប្រគល់ជូនដល់ប្រជាពលរដ្ឋ ដែលកំពុងធ្វើចត្តាឡីស័ក និងមានជីវភាពខ្វះខាតប្រចាំថ្ងៃ ចំនួន ៤៥គ្រួសារ នៅភូមិល្វា និងភូមិកំបោរ ឃុំមោង ស្រុកស្រុកស្រីស្នំ ដោយក្នុងមួយគ្រួសារៗទទួលបាន ៖ មីចំនួន ១កេស, អង្ករចំនួន ២០គ.ក្រ, ទឹកស៊ីអុីវចំនួន ១យួរ, ទឹកត្រីចំនួន ១យួរ និងបច្ច័យចំនួន ១ម៉ឹនរៀល ។ នៅក្នុងពិធីប្រគល់អំណោយនោះ ដោយមានការសម្របសម្រួលពីអាជ្ញាធរស្រុកស្រីស្នំ ដឹកនាំដោយលោកស្រី ចាន់ សួយ អភិបាលរងស្រុក មន្ត្រីសាលាស្រុក និងអាជ្ញាធរឃុំមោង ។
ព្រះវិជ័យរង្សីបណ្ឌិត ឡាច លាង មានសង្ឃដីកា ថា អំណោយទាំងនេះ បានមកពីសទ្ឋាជ្រះថ្លារបស់ឧបាសក ឧបាសិកា ពុទ្ធបរិស័ទជិតឆ្ងាយ យកមកប្រគេនដល់ព្រះសង្ឃ រយ:កាលកន្លងមក ហើយព្រះសង្ឃលៃលកសន្សំទុក ដើម្បីសម្រាប់ធ្វើការចែករំលែកជូនដល់គ្រួសារជួបការលំបាកក្នុងជីវភាព នៅគ្រប់ទីកន្លែង ជាក់ស្តែងពេលនេះ បានបន្តយកមកចែកជូនបងប្អូនប្រជាពលរដ្ឋ ដែលកំពុងធ្វើចត្តាឡីស័ក នៅឃុំមោងនៅផ្ទាល់ផងដែរ។ ព្រះអង្គបានបន្តសង្ឃដីកាថា សកម្មភាពនេះ គឺជាការឆ្លើយតបទៅនឹង សេចក្តីត្រូវការចាំបាច់ និងការចូលរួមសម្រាលទុក្ខលំបាកមួយរដ្ឋាភិបាល និងអាជ្ញាធរខេត្តសៀមរាប ក្នុងវិបត្តិជំងឺកូវីដ-១៩ ដែលកំពុងតែរីករាលដាលយ៉ាងខ្លាំង ទាំងនៅក្នុងប្រទេសកម្ពុជា ក៏ដូចជានៅលើពិភពលោកផងដែរ។ ព្រះអង្គឡាច លាង បន្តសង្ឃដីកាទៀតថា ទុក្ខលំបាក ភាពខ្វះខាតរបស់ពុទ្ធបរិស័ទ ក៏ដូចជាទុក្ខលំបាករបស់ព្រះសង្ឃដែរ ពីព្រោះថា ព្រះសង្ឃទទួលបានការគាំទ្រគ្រប់បែបយ៉ាងរួមទាំងចង្ហាន់ផងដែរ ក៏ដោយសារពុទ្ធបរិស័ទចំណុះជើងវត្ត ។ ព្រះអង្គបានអំពាវនាវដល់បងប្អូនប្រជាពលរដ្ឋទាំងអស់ត្រូវមានការប្រុងប្រយ័ត្នជាប់ជាប្រចាំ ការពារខ្លួនកុំឲ្យបន្តមានឆ្លងជំងឺកូវីត-១៩ នេះតទៅទៀត ជាពិសេសត្រូវអនុវត្តវិធានការ របស់រាជរដ្ឋាភិបាលកម្ពុជា ៣ការពារ ៣កុំ ឲ្យបានខ្ជាប់ខ្ជួន និងសេចក្តីណែនាំរបស់ក្រសួងសុខាភិបាល។
ក្នុងនាមអាជ្ញាធរស្រុក លោកស្រី ចាន់ សួយ បានក្រាបបង្គំថ្វាយ អំណរព្រះគុណ ដល់ព្រះតេជគុណឡាច លាងនិងសប្បុរសជន ដែលបាននាំយកអំណោយជាគ្រឿងឧបភោគបរិភោគ និងថវិកា មកជូនដល់ប្រជាពលរដ្ឋ ក្នុងមូលដ្ឋានស្រុកស្រីស្នំនាពេលនេះ ដើម្បីការជួយសម្រាលជីវភាពដល់គ្រួសារទីទ័លក្រ ក្នុងវិបត្តិ នៃជំងឺកូវីដ-១៩។ អំណោយមនុស្សធម៌នេះ ជាគុណបំណាច់ដ៏ធំធេងណាស់សម្រាប់ប្រជាពលរដ្ឋ ដែលមានជីវភាពខ្វះខាតគឺអាចជួយសម្រាលនូវភាពខ្វះខាតបានមួយរយ:ពេលផងដែរ ។ លោកស្រី ក៏បានអំពាវនាវដល់សប្បុរសជនដទៃទៀត មេត្តាបន្តផ្តល់អំណោយជាមនុស្សធម៌ ឲ្យបានច្រើនបន្តទៀត ដើម្បីអាជ្ញាធរស្រុកមានលទ្ធភាព ផ្គត់ផ្គង់ និងចែកជូនដល់ប្រជាពលរដ្ឋ ដែលមានការខ្វះខាតជីវភាព ក្នុងការជួយសម្រាលទុក្ខលំបាកនៅក្នុងវិបត្តិជំងឺកូវីដ-១៩នេះ៕
ប្រភព:រដ្ឋបាលស្រុកស្រីស្នំ កែសម្រួលដោយ លីវសុខុន!!!
