នៅព្រឹកថ្ងៃទី០៦ ខែកញ្ញា ឆ្នាំ២០២១នេះ ព្រះគ្រូវិចិត្រវង្សា ហែម គឹមសាន ព្រះចៅអធិការវត្តប្រាសាទគោកចក និងលោក ទិត ឌីរ៉ា ចៅសង្កាត់គោកចក ក្រុងសៀមរាប ព្រមទាំងមានទាំងលោក លោកស្រី សមាជិកក្រុមប្រឹក្សាសង្កាត់ បាននាំយកនូវគ្រឿងបាឡុងមួយឈុត , អង្ករចំនួន៧៥គីឡូក្រាម , ទឹកត្រី , ទឹកស៊ីអ៊ីវ , មី , ម៉ាស់និងថវិកាមួយចំនួនមកប្រគល់ជូនដល់លោក យ៉ាត សីហៈ ជាប្រជាការពារភូមិខ្វៀន សង្កាត់គោក ដើម្បីចាត់ចែងធ្វើបុណ្យសពភរិយារបស់លោកដែលបានទទួលមរណៈភាពដោយសារគ្រោះថ្នាក់ចរាចរណ៍។
ព្រះគ្រូវិចិត្រវង្សា ហែម គឹមសាន បានមានសង្ឃដីកាថា អំណោយជាគ្រឿងបរិភោគ និងថវិកាទាំងអស់នេះ គឺបានមកពីការប្រគេនរបស់ពុទ្ឋបរិស័ទក្នុងពិធីបុណ្យផ្សេងៗ នាពេលកន្លងមក ហើយក៍បានសន្សំ និងប្រមូលបម្រុងទុកសម្រាប់ចែកជូនគ្រួសារ ឬអាជ្ញាធរមូលដ្ឋានណាដែលជួបហានីភ័យដោយប្រការផ្សេងៗ សម្រាប់ដោះស្រាយការលំបាកមួយគ្រាៗ តាមលទ្ឋភាពដែលព្រះសង្ឃមាន ។
មានប្រសាសន៍ក្នុងឱកាសនោះ លោក ទិត ឌីរ៉ា ក្នុងនាមអាជ្ញាធរសង្កាត់គោកចក បានសម្ដែងនូវការចូលរួមសោកស្តាយ និងចូលរួមរំលែកទុក្ខដ៏សែនក្រៀមក្រំ អាឡោះអាល័យ ជាមួយក្រុមគ្រួសារសាច់ញាតិរបស់លោកយ៉ាត សីហៈ ចំពោះមរណភាពរបស់ភរិយាលោកគឺជាការបាត់បង់ភរិយា ម្តាយ ជាទីគោរពស្រឡាញ់ប្រកបដោយព្រហ្មវិហារធម៌របស់កូនចៅ និងក្រុមគ្រួសារ ព្រមទាំងបានផ្តាំផ្ញើនិងក្រើនរំលឹកដល់ក្រុមគ្រួសារសព ព្រមទាំងប្រជាពលរដ្ឋដែលបានមកចូលរួមបុណ្យសពត្រូវរក្សាគម្លាត ដើម្បីចូលរួមទប់ស្កាត់ជំងឺកូវីដ-១៩ ពិសេសត្រូវអនុវត្តជាប្រចាំនូវវិធានការ របស់រាជរដ្ឋាភិបាល ៣កុំ ៣ការពារ និងសេចក្តីណែនាំផ្សេងៗរបស់ក្រសួងសុខាភិបាល៕
អត្ថបទ និង រូបភាព៖ លោក ទ្រា ពន្លឺ
កែសម្រួលអត្ថបទ ៖ លោក លីវ សាន្ត
