នៅព្រឹកថ្ងៃទី០៦ ខែកញ្ញា ឆ្នាំ២០២១នេះ ក្រុមប្រឹក្សាអាណត្ដិទី៣ បានរៀបចំកិច្ចប្រជុំសាមញ្ញលើកទី២៨ របស់ខ្លូន ដើម្បីលើកឡើងពីបញ្ហាប្រឈម មួយចំនួននៅក្នុងខេត្ដនេះ ។ កិច្ចប្រជុំនេះ ធ្វើឡើងតាមវីដេអូ Zoom ក្រោមអធិបតីភាពឯកឧត្តម អ៊ាន ឃុន ប្រធានក្រុមប្រឹក្សាខេត្ត និង ឯកឧត្ត ទៀ សីហា អភិបាល នៃគណ:អភិបាលខេត្តសៀមរាប រួមជាមួយសមាជិក សមាជិកាក្រុមប្រឹក្សាខេត្ត ព្រមទាំងមន្ត្រីរាជការ ស្ថានប័ណពាក់ព័ន្ធជុំវិញខេត្តជាច្រើនរូបបានអញ្ជើញចូលរួមផងដែរ។
នៅក្នុងកិច្ចប្រជុំនេះ សមាជិក សមាជិកាក្រុមប្រឹក្សាខេត្តមួយចំនួនលើកឡើងពីបញ្ហាប្រឈមមួយចំនួនរួមមាន ការជួសជុលកំណាត់ផ្លូវជាតិលេខ៦ពីស្ដុបសុខា ដល់វង្វង់មូលព្រលានយន្ដហោះអន្ដរជាតិសៀមរាប ការដាក់ស្លាកសញ្ញាចរាចរណ៍នៅគម្រោងស្ថាបនាផ្លូវ ៣៨ខ្សែនៅក្នុងក្រុងសៀមរាប ការធ្វើអត្ដសញ្ញាប័ណ្ណជូនប្រជាពលរដ្ឋអោយទាន់តម្រូវការរបស់ប្រជាពលរដ្ឋ និងលើកឡើងពីការព្យាបាលជំងឹកូវីដ-១៩ ជាសះស្បើយហើយ មានការរើជំងឺឡើងវិញ ។ ក្នុងការលើកឡើងពីបញ្ហាទាំងនេះ ក៏មានការឆ្លើយបំភ្លឺភ្លាមៗពីមន្រ្តីជំនាញជូនះអង្គប្រជុំផងដែរ ។
ឯកឧត្ត ទៀ សីហា អភិបាលខេត្តសៀមរាប មានប្រសាសន៍លើកឡើងថា ការលើកយកបញ្ហាទាំងអស់នេះដាក់ចូលក្នុងកិច្ចប្រជុំគឺជាយោបល់ល្អៗ ដើម្បីរួមគ្នាដោះស្រាយស្វែងរកការរីកចម្រើនសម្រាប់ខេត្តរបស់យើង។ ជាមួយគ្នានោះ ឯកឧត្តម ក៏បានលើកឡើងពីការចាក់វ៉ាក់សាំង ជូនដល់ប្រជាពលរដ្ឋ ដែលមានអាយុ១២ឆ្នាំ ដល់១៧ឆ្នាំ ឲ្យបានល្អប្រសើរ និងគ្រប់គ្នា ដើម្បីត្រៀមបើកសាលារៀនឡើងវិញ។ ការត្រៀមបើកសាលារៀនឡើងវិញនេះ តម្រូវឲ្យ កុមារ និងយុវវ័យ ត្រូវទទួលបានវ៉ាក់សាំងបង្ការជំងឺកូវីដ-១៩ អោយបានគ្រប់គ្នាមុន ទើបអនុញ្ញាតឱ្យចូលរៀនឡើងវិញ។
ឯកឧត្តម បានអំពាវនាវឱ្យបងប្អូនប្រជាពលរដ្ឋរស់នៅក្នុងខេត្តសៀមរាប សូមចូលរួម នឹងបង្កើនការប្រុងប្រយ័ត្នខ្ពស់ ក្នុងការអនុវត្តវិធានការការពារជាពិសេសគឺ.៣.ការពារ .៣.កុំ និងត្រូវអនុវត្តកាតព្វកិច្ចពាក់ម៉ាស និងកាតព្វកិច្ចរក្សាគម្លាតសុវត្ថិភាព ត្រូវអនុវត្តវិធានការរដ្ឋបាលខេត្ត និងវិធានការឲ្យធ្វើចត្តាឡីស័ករយ:ពេល១៤ ជាកំហិត។ ចំពោះបុគ្គលទាំងឡាយណាដែលប្រព្រឹត្តល្មើសនឹងវិធានការនេះ នឹងប្រឈមការពិន័យអន្តការណ៍ ឬផ្តន្ទាទោសតាមច្បាប់ និងលិខិតបទដ្ឋានគតិយុត្តជាធរ ទៅលើប្រជាពលរដ្ឋណាប្រព្រឹត្តខុសពីគោលការណ៍ណែនាំរបស់ក្រសួងសុខាភិបាល ក្នុងការចូលរួមទប់ស្កាត់ជំងឹកូវីដ-១៩។ ឯកឧត្ដម ក៏បានស្នើសុំ ដល់អាជ្ញាធរមូលដ្ឋានចូលរួមទប់ស្កាត់ការកាប់បំផ្លាញព្រៃឈើ និងព្រៃលិចទឹកនៅបឹងទន្លេសាបផងដែរ ដែលឯកឧត្ដមថា សមត្ថកិច្ចត្រូវអនុវត្ដតាមផ្លូវច្បាប់ចំពោះប្រជាពលរដ្ឋណាកាប់ឆ្កាព្រៃលិចទឹក ធ្វើកម្មសិទ្ធិផ្ទាល់ខ្លួន និងចាប់ខ្លួនមេខ្លោងយកមកសាកសួរឱ្យខាងតែបាន។
សូមជម្រាបថា កិច្ចប្រជុំសាមញ្ញលើកទី២៨ របស់ក្រុមប្រឹក្សាខេត្ដសៀមរាបអាណត្ដិទី៣នេះ មានរបៀបវារ:ចំនួន រួមមាន៖ ១- ពិនិត្យ ពិភាក្សា និងអនុម័តលើសេចក្តីព្រាងកំណត់ហេតុកិច្ចប្រជុំសាមញ្ញលើកទី២៧ របស់ក្រុមប្រឹក្សាខេត្តសៀមរាប អាណត្តិទី៣ កាលពីថ្ងៃទី០៥ ខែសីហា ឆ្នាំ២០២១។ ២- ពិនិត្យ ពិភាក្សា និងអនុម័តលើសេចក្តីព្រាងកំណត់ហេតុកិច្ចប្រជុំវិសាមញ្ញលើកទី២៧ របស់ក្រុមប្រឹក្សាខេត្តសៀមរាប អាណត្តិទី៣ កាលពីថ្ងៃទី២៣ ខែសីហា ឆ្នាំ២០២១។ ៣- ពិនិត្យ ពិភាក្សា និងអនុម័តលើសេចក្តីព្រាងរបាយការណ៍ប្រចាំខែសីហា ឆ្នាំ២០២១ ស្ដីពីការអនុវត្តការងាររបស់រដ្ឋបាលខេត្តសៀមរាប។ ៤- ពិនិត្យ ពិភាក្សានិងអនុម័តលើសំណើរសុំបន្ដអាណត្ដិទី២ របស់អភិបាលរងក្រុងស្រុកចំនួន១៧រូប។ ៥-បញ្ហាផ្សេងៗ ៕
អត្ថបទ និងរូបភាព:លោកបូ សាវី កែសម្រួលដោយលីវ សុខុន!!!
