កាលពីរសៀលថ្ងៃទី០២ ខែកញ្ញា ឆ្នាំ២០២១ម្សិលមិញនេះ ព្រះចៅអធិការ និងព្រះគ្រូសូត្រនៃវត្តមួយចំនួនក្នុងស្រុកប្រាសាទបាគង និងក្រុងសៀមរាប បាននាំយកអំណោយជាគ្រឿងឧបភោគបរិភោគ និង ថវិកា ដែលជាអំណោយរួមគ្នារវាងព្រះសង្ឃ និង សប្បុរសជនពីក្រៅប្រទេសតាមរយៈលោក Andreas G. Flober ជាជនជាតិ អាល្លឺម៉ង់ និងភរិយា ជូនដល់គ្រួសារប្រជាពលរដ្ឋជួបការលំបាកផ្នែកជីវភាព ចំនួន៣៣គ្រួសារចំណុះជើងវត្តល្វា ស្ថិតក្នុងឃុំកំពង់ឃ្លាំង ស្រុកសូទ្រនិគម ខេត្តសៀមរាប ដោយក្នុងមួយគ្រួសារទទួលបាន អង្ករចំនួន ១៥គីឡូក្រាម , ទឹកត្រីចំនួន ១យួរ , ទឹកស៊ីអ៊ីវចំនួន ១យួរ , មីចំនួន១កេស និង ថវិកាចំនួន២ម៉ឺនរៀល ព្រមទាំងអាជីករម្នាក់ក្នុងខេត្ត ឧបត្ថម្ភក្នុងមួយគ្រួសារទទួលបាន ប្រហិតត្រីចំនួនកន្លះគីឡូក្រាម និងសម្លៀកបំពាក់១កំប្លេផងដែរ ។
ព្រះគ្រូធម្មសិរីញាណ ឡម លឿម នាយកប្រតិបត្តិសមាគមជីវិត និង ក្តីសង្ឃឹម មានសង្ឃដីកាថា អំណោយជាគ្រឿងឧបភោគបរិភោគ និងថវិកា ដែលបានផ្ដល់ជូននាពេលនេះ គឺបានមកពីការចូលរួមបរិច្ចាគពីសប្បុរសជនដែលជាមិត្តភក្តិរបស់ លោក Andreas G. Flober ដែលមករស់នៅក្នុងស្រុកខ្មែរជាង១៥ឆ្នាំហើយ ហើយគាត់ជាអ្នកបដិបត្តិ និង បង្រៀនសមាធិ និងមួយផ្នែកបានមកពីការចូលរួមរបស់ព្រះចៅអធិការ និងគ្រូសូត្រនៃវត្តមួយចំនួនក្នុងក្រុងសៀមរាប និង ចៅអធិការវត្តប្រាសាទគោកចាន់ វត្តប្រាសាទលលៃ ស្រុកប្រាសាទបាគងផងដែរ ។
លោក Andreas G. Flober មានប្រសាសន៍ថា ស្ថិតក្នុងស្ថានភាពដ៍លំបាកដោយសារវិបត្តិនៃជំងឺកូវីដ-១៩ បងប្អូនត្រូវចេះសម្របខ្លួនរស់នៅតាមបែបគន្លងថ្មី និងរកដំណោះស្រាយដើម្បីជីវភាពរស់នៅ ឱ្យដូចឬឱ្យប្រសើរជាងមុនពេលមានការឆ្លងដោយជំងឺកូវី-១៩ និងរស់នៅឱ្យមានអនាម័យ តាមរយៈការសម្អាតបរិស្ថានឱ្យបានស្អាតជុំវិញលំនៅឋាន និងទូទាំងសហគមន៍ ដោយបញ្ឈប់ឬកាត់បន្ថយការដុត និងការបោះចោលនូវសំណល់ថង់ផ្លាស្ទីក និងកាកសំណល់រឹង មិនរលាយផ្សេងៗចូលទៅក្នុងទន្លេ ពីព្រោះផ្សែងឬកាកសំណល់ចេញពីផ្លាស្ទីកទាំងនោះ វាបណ្តាលឱ្យខូចប្រព័ន្ឋខ្យល់ដង្ហើម និងប្រព័ន្ឋការពារក្នុងសរីរាង្គរបស់យើង ដែលនាំឱ្យរាងកាយរបស់យើងចុះខ្សោយ មិនអាចទប់ទល់នឹងមេរោគឆ្លងនានាបានឡើយ ។
មានសង្ឃដីកាក្នុងឱកាសនោះដែរ ព្រះគ្រូធម្មភិរក្ខិតវង្ស ពៅ ធេង ព្រះអនុគណស្រុក និង ជាព្រះចៅអធិការវត្តប្រាសាទបន្ទាយស្រី ស្រុកសូទ្រនិគម បានចាត់ទុកការផ្តល់អំណោយនេះ អាចជួយសម្រួលការលំបាកខ្វះខាតក្នុងជីវភាពគ្រួសារបានមួយគ្រាដែរ ហើយនេះក៏បានបង្ហាញនូវការផ្តល់ឱ្យគ្នាទៅវិញទៅមកនូវក្តីស្រឡាញ់រាប់អាន និង មេត្តាករុណា ដល់គ្នាទៅវិញទៅមករវាងព្រះសង្ឃ សប្បុរសជន និងបងប្អូនជួបការលំបាក ក្នុងកាលៈទេសៈដែលយើងទាំងអស់គ្នាកំពុងជួបនូវបញ្ហាប្រឈមនឹងជំងឺកូវីដ-១៩ ។
ព្រះគ្រូធម្មភិរក្ខិតវង្ស ពៅ ធេង មានសង្ឃដីកាទៀតថា បច្ចុប្បន្ននេះ ការឆ្លងរាលដាលជំងឺកូវីដ-១៩ នៅក្នុងខេត្តសៀមរាប ជាពិសេសនៅក្នុងឃុំកំពង់ឃ្លាំងយើងនេះ នៅតែកើតមានឡើងនៅឡើយ ដូច្នេះ ដើម្បីការពារនិងទប់ស្កាត់នូវការឆ្លងរីករាលដាលនៃជងឺនេះ ញាតិញោមទាំងអស់គ្នា ត្រូវយកចិត្តទុកដាក់ អនុវត្តឱ្យបានត្រឹមត្រូវនូវការណែនាំរបស់ក្រសួងសុខាភិបាល និងវិធានការរបស់រាជរដ្ឋាភិបាល ៣កុំនិង៣ការពារ ឲ្យបានខ្ជាប់ខ្ជួនជានិច្ច ៕
អត្ថបទ និង រូបភាព៖ លោក យូ វង្ស
កែសម្រួលអត្ថបទ ៖ លោក លីវ សាន្ត
