សមាគមចលនាយុវជនកម្ពុជាក្រុម១៥៧សាខាខេត្តសៀមរាប ប្រគល់អំណោយជូនគ្រួសារក្រីក្រនៅសង្កាត់ស្វាយដង្គំ

ពិធីនេះបានប្រាព្ឋឡើងនៅក្នុងបរិវេណវត្តចក ស្ថិតក្នុងភូមិស្វាយព្រៃ សង្កាត់ស្វាយដង្គំ ក្រុងសៀមរាប ក្រោមអធិបតី ពីលោក នួន ពុទ្ឋារ៉ា អភិបាលក្រុងសៀមរាប ដោយមានការចូលរួមពីសំណាក់លោក លោកស្រី ជាមន្ត្រីនៃរដ្ឋបាលក្រុង រួមទាំងអាជ្ញាធរសង្កាត់ និង ភូមិផងដែរ ។

លោក សឹង្ហ សំរិទ្ធិ អនុប្រធានសមាគមនចលនាយុវជនកម្ពុជាក្រុម ១៥៧ សាខាខេត្តសៀមរាប បានមានប្រសាសន៍ថា ៖ អំណោយទាំងនេះបានមកពីការកៀរគរ និងចូលរួមរបស់ថ្នាក់ដឹកនាំ និងសមាជិកសមាជិកាក្នុងសមាគម សម្រាប់ទុកបម្រុងចែករំលែកជូនដល់គ្រួសារតាមមូលដ្ឋានានា ដែលកំពុងជួបប្រទះនូវការខ្វះខាតជាក់ស្តែង ហើយតាមរយៈនៃកិច្ចសហការផ្ទាល់ជាមួយអាជ្ញាធរមូលដ្ឋាន បានធ្វើការស្រង់ទិន្នន័យច្បាស់លាស់ ដោយជ្រើសរើសយកតែគ្រួសារណាដែលជួបការលំបាកខ្វះខាតជាក់ស្តែង ខណៈកន្លងមក សមាគមបានធ្វើសកម្មភាពសប្បុរសធម៌ជាច្រើន ក្នុងការផ្ដល់អំណោយជូនដល់អាជ្ញាធរខេត្ត , អាជ្ញាធរក្រុង ស្រុក និងឃុំសង្កាត់ និងបងប្អូនប្រជាពលរដ្ឋក្រីក្រ នៅក្នុងវិបត្តិជំងឺកូវីដ-១៩នេះ ក្នុងគោលបំណងពីការរួមសាមគ្គីគ្នា និង ចូលរួមជាមួយរាជរដ្ឋាភិបាលកម្ពុជា ដើម្បីជួយដល់ពលរដ្ឋនៅក្នុងកាលៈទេសៈដ៏លំបាកនេះ ។

ថ្លែងប្រសាសន៍ក្នុងឱកាសនោះ លោក នួន ពុទ្ឋារ៉ា អភិបាលក្រុងសៀមរាប បានសម្តែងនូវក្តីសោមនស្សរីករាយ ចំពោះទឹកចិត្តដ៏ឧត្តុង្គឧត្តម របស់សមាគមចលនាយុវជនកម្ពុជាក្រុម១៥៧ សាខាខេត្តសៀមរាប ដែលបាននាំយកអំណោយមកប្រគល់ជូនគ្រួសារខ្វះខាតផ្នែកជីវភាព ទាំងពេលនេះក៏ដូចជាកន្លងមក ក្នុងពេលដែលពលរដ្ឋក្នុងតំបន់នេះកំពុងប្រឈមជាមួយការលំបាកដោយសារវិបត្តិជំងឺកូវីដ-១៩ ហើយនេះក៏ជាការចូលរួមចំណែកជាមួយរាជរដ្ឋាភិបាល ក៏ដូចជារដ្ឋបាលក្រុង រដ្ឋបាលខេត្តសៀមរាប ក៏ដូចជាអាជ្ញាធរមូលដ្ឋានផងដែរ ក្នុងការយកចិត្តទុកដាក់គិតគូរពីសុខទុក្ខដល់បងប្អូនប្រជាពលរដ្ឋ ។

លោក នួន ពុទ្ឋារ៉ា មានប្រសាសន៍ទៀតថា៖ ប្រទេសកម្ពុជាក្រោមការដឹកនាំរបស់សម្ដេចតេជោ ហ៊ុន សែន សម្ដេចបានខិតខំក្នុងការជួយសង្រ្គោះអាយុជីវិត ប្រជាពលរដ្ឋកម្ពុជាឲ្យរួចផុតពីការលំបាក និងការរស់នៅប្រកបដោយសុខសន្តិភាព និងសេរីភាព ជាពិសេសការចូលរួមប្រយុទ្ធប្រឆាំង និងទប់ស្កាត់ជំងឺកូវីដ-១៩ តាមរយៈនៃការស្វែងរកវ៉ាក់សាំងមកពីបណ្តាប្រទេសនានា សម្រាប់ចាក់ជូនប្រជាពលរដ្ឋដោយឥតគិតថ្លៃ រួមជាមួយនឹងការខិតខំបន្តកិច្ចអភិវឌ្ឍប្រទេសជាតិឱ្យរីកចម្រើនឥតឈប់ឈរ ទោះបីស្ថិតក្នុងបរិបទជំងឺកូវីដ-១៩ក្តី ដូច្នេះក្នុងឱកាសនេះ សូមអំពាវនាវដល់បងប្អូនប្រជាពលរដ្ឋគ្រប់ទីកន្លែងទាំងអស់ក្នុងក្រុងសៀមរាប ឱ្យប្រុងប្រយ័ត្ននិងគិតគូរពីសុខភាពឱ្យបានខ្ពស់ ចៀសវាងឆ្លងជំងឺផ្សេងៗនារដូវវស្សានេះ ជាពិសេសការការពារការឆ្លងជំងឺកូវីដ-១៩ តាមរយៈការចូលរួមអនុវត្តឱ្យបានខ្ជាប់ខ្ជួនតាមវិធានការណែនាំរបស់រាជរដ្ឋាភិបាល គឺ៣ការពារ ៣កុំ និង ការអនុវត្តតាមវិធានការ និងសេចក្តីណែនាំនានារបស់ក្រសួងសុខាភិបាលឲ្យបានគ្រប់ៗគ្នា ៕

អត្ថបទ និង រូបថត ៖ លោក យូ វង្ស

កែសម្រួលអត្ថបទ ៖ លោក លីវ សាន្ត