នាថ្ងៃទី០៧ ខែកញ្ញា ឆ្នាំ២០២១ រដ្ឋបាលខេត្តសៀមរាប បានបើកកិច្ចប្រជុំផ្សព្វផ្សាយសមាសភាពក្រុមការងារឆ្លើយតបជាពហុវិស័យ ចំពោះអំពើហិង្សាទាក់ទងនឹងយេនឌ័រ តាមប្រពន្ធ័វីដេអូ បញ្ជូនរូបភាព និងសំឡេង កម្មវិធី ZOOM ក្រោមអធិបតីភាពលោកជំទាវ ស៊ិន ណម សមាជិកក្រុមប្រឹក្សាខេត្ត និងជាប្រធានកិត្តិយសក្រុមការងារឆ្លើយតបជាពហុវិស័យ ចំពោះអំពើហិង្សាទាក់ទងនឹងយេនឌ័រខេត្តសៀមរាប , លោកស្រីយូ សុភា អភិបាលរងខេត្ត និងជាប្រធានក្រុមការងារឆ្លើយតបជាពហុវិស័យ ចំពោះអំពើហិង្សាទាក់ទងនឹងយេនឌ័រខេត្តសៀមរាប និង ប្រតិភូតំណាងក្រសួងកិច្ចការនារី ដោយមានការអញ្ជើញចូលរួមពីសំណាក់ឯកឧត្តម លោកជំទាវ លោក លោកស្រី ជាសមាជិក សមាជិកាក្រុមការងារ មកពីបណ្ដាស្ថាប័ន មន្ទីរ អង្គភាព អភិបាលរងក្រុង ស្រុកទទួលបន្ទុកស្ត្រី និងមន្ត្រីពាក់ព័ន្ធជាច្រើនរូប។
លោកស្រី យូ សុភា អភិបាលរងខេត្តសៀមរាប បានមានប្រសាសន៍ថា គោលបំណងសំខាន់នៃកិច្ចប្រជុំនេះ គឺដើម្បីរៀបចំជាផែនការសកម្មភាព សម្រាប់អនុវត្តប្រកបដោយប្រសិទ្ធភាព សម្រាប់ការទប់ស្កាត់អំពើហិង្សាទាក់ទងនឹងយេនឌ័រនេះ ព្រោះថា ខេត្តសៀមរាប ជាខេត្តដែលនាំមុខគេក្នុងវិស័យទេសចរណ៍ ដូច្នេះការរំលោភបំពានពាក់ព័ន្ធនឹងយេនឌ័រនេះក៏កើតមានដែរ ដែលការណ៍នេះ យើងត្រូវតែរួមគ្នាដើម្បីទប់ស្កាត់ឲ្យមានភាពល្អប្រសើរ ។
លោកស្រី យូ សុភា មានប្រសាសន៍បន្ថែមថា កន្លងមក ខេត្តសៀមរាប ត្រូវបានក្រសួងកិច្ចការនារីជ្រើសរើសជាខេត្តគំរូ នៅក្នុងការទប់ស្កាត់អំពើហង្សាពាក់ព័ន្ធនឹងយេនឌ័រនេះ ដូច្នេះដើម្បីរក្សាបាននូវកិត្តិនាមនេះ តាមរយៈនៃកិច្ចប្រជុំនេះ សូមឲ្យគ្រប់ភាគីពាក់ព័ន្ធទាំងអស់ ត្រូវរួមគ្នាទប់ស្កាត់អំពើហិង្សាដែលពាក់ព័ន្ធនឹងយេនឌ័រ គ្រប់ទម្រង់ដូចជាអំពើហិង្សាក្នុងគ្រួសារ , ការរំលោភផ្លូវភេទ និងការជួញដូរស្រ្តី និងកុមារជាដើម ជាពិសេសនៅតាមបណ្តាក្រុងស្រុកទាំង១២របស់ខេត្ត ត្រូវរៀបចំឲ្យមានក្រុមការងារនេះ ដើម្បីបង្កើនប្រសិទ្ធភាពការងារ ៕
អត្ថបទ ៖ លោក ជា ស្រស់
កែសម្រួលអត្ថបទ ៖ លោក លីវ សាន្ត
