នៅព្រឹកថ្ងៃទី០៨ ខែកញ្ញា ឆ្នាំ២០២១នេះ ឯកឧត្តម អែល សៀត សមាជិកក្រុមប្រឹក្សាខេត្តសៀមរាប និងជាអនុប្រធានសាសនាឥស្លាមខេត្ត និងលោកស្រី ងិន មុំ ប្រធានក្រុមប្រឹក្សាស្រុកសូទ្រនិគម ព្រមទាំងក្រុមកាងារនៃរដ្ឋបាលស្រុកសូទ្រនិគម រួមជាមួយក្រុមការងារសម្ព័ន្ធយុវជនមូស្លីមកម្ពុជាខេត្តសៀមរាប បានចុះសួរសុខទុក្ខ និងនាំយកអំណោយជាគ្រឿងឧបភោគបរិភោគ និងថវិកា ប្រគល់ជូនដល់ក្រុមគ្រួសារជាសាសនិកឥស្លាម ដែលសមាជិកគ្រួសារចំនួន១៤នាក់ ដែលវិជ្ជមានជំងឺកូវីដ-១៩ ហើយកំពុងតែសម្រាកព្យាបាលជំងឺកូវីដ-១៩ នៅក្នុងមណ្ឌលវិទ្យាល័យដំដែក និង អ្នកពាក់ព័ន្ធចំនួន២នាក់ទៀត កំពុងតែធ្វើចត្តាឡីស័ក្តនៅផ្ទះ ដែលអំណោយទាំងនោះមាន ៖ ថវិកាចំនួន ៣០ម៉ឺនរៀល , អង្ករចំនួន ៥០គីឡូក្រាម , ត្រីខចំនួន ៤យួរ , មីចំនួន ២កេស , ទឹកត្រីចំនួន ១យួរ , ប៊ីចេងចំនួន ២គីឡូក្រាម , អំបិលចំនួន ២គីឡូក្រាម , ស្ករសចំនួន ៥គីឡូក្រាម , ទឹកបរិសុទ្ធចំនួន ៣០យួរ , ទឹកអាកុលចំនួន ៥លីត្រ និងម៉ាស់ចំនួន ៣ប្រអប់ ។
ឯកឧត្តម អែល សៀត បានមានប្រសាសន៍ថា បើទោះបីក្នុងរយៈពេលនេះ បងប្អូនសាសនិកឥស្លាមបាននឹងកំពុងសម្រាកព្យាបាលនិង ធ្វើចត្តាឡីស័កក៏ពិតមែន ប៉ុន្តែថ្នាក់ដឹកនាំនិងអាជ្ញាធរ តែងតែមានការព្រួយបារម្ភយកចិត្តទុកដាក់គិតគូរចំពោះបងប្អូនជាប្រចាំគ្រប់ពេលវេលា ក្នុងស្ថានភាពដែលពិភពលោក ក៏ដូចជាប្រទេសកម្ពុជាយើង កំពុងរងការយាយីដោយជំងឺកូវីដ-១៩ ដ៏កាចសាហាវនេះក៏ដោយ ដូច្នេះក្នុងរយៈពេលនេះ សូមបងប្អូនមេត្តាទ្រាំអត់ធ្មត់ និង ថែរក្សាសុខភាព ដោយអនុវត្តឲ្យបានល្អ តាមការណែនាំរបស់គ្រូពេទ្យក៏ដូចជាវិធានការរបស់ក្រសួងសុខាភិបាល ហើយបើមានអាការៈប្រែប្រួលបែបណាមួយនោះ សូមប្រញាប់ទំនាក់ទំនងមកក្រុមគ្រូពេទ្យដើម្បីជួយដល់បងប្អូនជាបន្ទាន់។
ក្នុងឱកាសនោះដែរ ក្នុងនាមថ្នាក់ដឹកនាំសាសនិកឥស្លាមក្នុងខេត្តសៀមរាប ឯកឧត្តម អែល សៀត បានថ្លែងអំណរគុណចំពោះអាជ្ញាធរស្រុកសូទ្រនិគម ដែលបានយកចិត្តទុកដាក់ក្នុងការផ្គត់ផ្គង់អាហារ ចំពោះបងប្អូនដែលកំពុងតែធ្វើចត្តាឡីស័ក្ត និងសម្រាកព្យាបាល ជាពិសេសក៏បានយកចិត្តទុកដាក់ដល់បងប្អូនសាសនិកឥស្លាម ដែលមិនបរិភោគអាហាររួម ដែលត្រូវរៀបចំជូនដោយឡែកនោះ។
ព័ត៌មានជាតិ ថ្មីៗ
មានប្រសាសន៍ក្នុងឱកាសនោះផងដែរ លោកស្រី ងិន មុំ ប្រធានក្រុមប្រឹក្សាស្រុកសូទ្រនិគម បានផ្តាំផ្ញើបន្តទៅដល់បងប្អូនសាសនិកឥស្លាម ត្រូវជឿទុកចិត្តលើក្រុមគ្រូពេទ្យ និង អាជ្ញាធរគ្រប់លំដាប់ថ្នាក់ ព្រោះពួកគាត់មិនបោះបង់យើងចោលនោះទេ ទោះក្នុងស្ថានភាពយ៉ាងណាក៏ដោយ ប៉ុន្តែប្រការសំខាន់នោះ គឺត្រូវតែអនុវត្តឲ្យបានខ្ជាប់ខ្ជួន នូវវិធានការនានារបស់ក្រសួងសុខាភិបាល និងវិធានការនានារបស់រាចរដ្ឋាភិបាល ៣ការពារ ៣កុំ ពិសេសត្រូវថែរក្សាសុខភាព លាងដៃជាមួយសាប៊ូ អាកុល ពាក់ម៉ាស និងរក្សាគម្លាតបុគ្គល ដើម្បីយើងរួមគ្នាប្រយុទ្ធបង្ការទប់ស្កាត់ជំងឺកូវីដ-១៩ ដែលជាសត្រូវអត់ស្រមោល កុំឱ្យបន្តឆ្លងចូលក្នុងក្រុមគ្រួសារ ក្នុងសហគមន៍ក្នុងប្រទេសយើងបន្តទៀត ៕
អត្ថបទ និង រូបថត ៖ លោក ទ្រា ពន្លឺ
កែសម្រួលអត្ថបទ ៖ លោក លីវ សាន្ត
