ដើម្បីផ្គត់ផ្គង់ព្រះសង្ឃដែលកំពុងជាប់ធ្វើចត្តាឡីស័ក នៅរសៀលថ្ងៃទី០៧ ខែកញ្ញា ឆ្នាំ២០២១ម្សិលមិញនេះ ក្រុមការងារមន្ត្រីសង្ឃសាលាគណខេត្តសៀមរាប ដឹកនាំដោយព្រះវិជ័យរង្សី បណ្ឌិត ឡាច លាង ព្រះរាជាគណៈថ្នាក់កិត្តិយស ព្រះធម្មធរគណខេត្ត ព្រះអនុគណក្រុងសៀមរាប និងជាព្រះចៅអធិការវត្តទេពពោធិវង្ស ចូលរួមដោយព្រះចៅអធិការវត្តមួយចំនួនក្នុងក្រុងសៀមរាប បាននាំយកគ្រឿងឧបភោគបរិភោគ រួមមាន ៖ អង្ករចំនួន ២៥០ គីឡូក្រាម , មីចំនួន ២កេះតូច , ទឹកត្រីចំនួន៦យូរ , ទឹកស៊ីអ៊ីវចំនួន ៤យួរ , ទឹកសុទ្ឋចំនួន ១កេស , ភេសជ្ជៈចំនួន ១កេស និងថវិកាចំនួន៤៣ម៉ឺនរៀល ទៅប្រគេនដល់ព្រះចៅអធិការវត្តប្រាសាទលលៃ ស្ថិតនៅភូមិលលៃ ឃុំបាគង ស្រុកប្រាសាទបាគង ដើម្បីផ្គត់ផ្គង់ដល់ព្រះសង្ឃដែលកំពុងជាប់ធ្វើចត្តាឡីស័ក។
ព្រះសមថមុនី មុត្ត វិបុល ព្រះរាជាគណៈថ្នាក់កិត្តិយស និងជាព្រះចៅអធិការវត្តប្រាសាទលលៃ មានសង្ឃដីកាថា វត្តប្រាសាទលលៃនេះ មានកុដិចំនួន២កន្លែង , មានព្រះសង្ឃចំនួន ៨អង្គ , ដូនជីចំនួន៣នាក់ និងក្មេងវត្តចំនួនម្នាក់ កំពុងជាប់ធ្វើចត្តាឡីស័ក ដោយហាមមិនឱ្យចេញគោចរទៅកាន់ទីដទៃ ព្រោះបានប៉ះពាល់ដោយផ្ទាល់និងដោយប្រយោលជាមួយភិក្ខុមួយអង្គ ដែលមានវិជ្ជមានជំងឺកូវីដ-១៩ កាលពីថ្ងៃទី០៦ ខែកញ្ញា ឆ្នាំ២០២១កន្លងទោនេះ។
ព្រះវិជ័យរង្សី បណ្ឌិត ឡាច លាង ព្រះធម្មធរគណខេត្ត មានសង្ឃដីកាថា គ្រឿងឧបភោគបរិភោគនិងថវុកាបន្តិចបន្តួចនេះ បានមកពីការចូលរួមរបស់ព្រះសង្ឃជាចៅអធិការវត្តមួយចំនួនក្នុងក្រុងសៀមរាប ក្រោយពីទទួលដំណឹងថា មានព្រះសង្ឃឆ្លងជំងឺកូវីដ-១៩ និងមានការបិទការចេញចូលជាបណ្តោះអាសន្នកុដិមួយចំនួន ដូច្នេះ ក្នុងឱកាសនេះ សូមឲ្យព្រះសង្ឃដែលកំពុងធ្វើចត្តាឡីស័កទាំងអស់ ត្រូវតស៊ូ ជំនះ អត់ធ្មត់ អនុវត្ត និងស្នាក់នៅដាច់ដោយឡែកឱ្យខាងតែបាន ក្នុងរយៈពេល១៤ថ្ងៃ តាមការកំណត់ និង ត្រូវអនុវត្តទៅតាមការណែនាំរបស់ក្រុមការងារ និងសេចក្តីណែនាំ របស់ក្រសួងសុខាភិបាល ជាពិសេសវិធានការរបស់រាជរដ្ឋាភិបាល គឺ៣ការពារ ៣កុំ ត្រូវអនុវត្តឲ្យបានខ្ជាប់ខ្ជួន៕
អត្ថបទ និង រូបថត ៖ លោក យូ វង្ស
កែសម្រួលអត្ថបទ ៖ លោក លីវ សាន្ត
