លោក ភឿន សុឃីម អនុប្រធាននាយកដ្ឋានគ្រប់គ្រងទឹកនៃអាជ្ញាធរជាតិអប្សរា បានឲ្យដឹងថា អាជ្ញាធរជាតិអប្សរា បាននឹងកំពុងធ្វើការសាងសង់ស្ពានបេតុងថ្មីចំនួន២កន្លែង ក្នុងស្រុកពួក ដើម្បីងាយស្រួលជូនដល់ប្រជាពលរដ្ឋក្នុងការធ្វើដំណើរប្រចាំថ្ងៃ គឺ ៖ ស្ពានទី១. មានបណ្ដោយប្រវែង២៦ម៉ែត្រ និង ទទឹងប្រវែង៤ម៉ែត្រ ស្ថិតនៅក្នុងភូមិរហាល ឃុំដូនកែវ និង ស្ពានទី២. មានបណ្ដោយប្រវែង២២ម៉ែត្រ និង ទទឹងប្រវែង៤ម៉ែត្រ ស្ថិតនៅចំណុចឆ្លងស្ទឹងព្រះស្រុក ក្នុងភូមិស្ទឹងព្រះស្រុក ឃុំល្វា ជំនួសស្ពានចាស់ដែលសាងសង់ពីឈើ ហើយមានសភាពទ្រុឌទ្រោមខ្លាំង ដែលប្រជាពលរដ្ឋមិនអាចដឹកទំនិញធន់ធ្ងន់ឆ្លងកាត់បាន ពោលគឺអាចឆ្លងកាត់បានតែថ្មើរជើង ម៉ូតូ និង កង់ប៉ុណ្ណោះ ជាពិសេសស្ពានទាំងនោះឆ្លងកាត់ប្រឡាយរំដោះទឹកជំនន់ ដែលអាជ្ញាធរជាតិអប្សរា បានស្ដារចេញពីស្ទឹងសៀមរាប ដើម្បីរំដោះទឹកជំនន់មិនឱ្យជន់លិចទីក្រុងសៀមរាបកន្លងមក ។
លោក ភឿន សុឃីម បានឲ្យដឹងទៀតថា ការសាងសង់ស្ពានថ្មីជំនួសស្ពានចាស់នេះ បានធ្វើឡើងតាំងពីពាក់កណ្ដាលខែកក្កដាមកម៉្លេះ ហើយគ្រោងបញ្ចប់រួចរាល់នៅចុងខែកញ្ញា ឆ្នាំ២០២១នេះ បើទោះបីមានការជួបបញ្ហាជំងឺកូវីដ-១៩ក្ដី ប៉ុន្ដែការសាងសង់ស្ពាននេះ មិនមានផលប៉ះពាល់នោះឡើយ ព្រោះស្ពានទាំង២នេះក្រៅពីមានសារៈសំខាន់ជួយសម្រួលដល់ការធ្វើចរាចរណ៍របស់ប្រជាជនក្នុងឃុំដូនកែវ និងឃុំល្វា វាក៏ជួយដល់ការគ្រប់គ្រងទឹកឱ្យមានប្រសិទ្ធភាព ក្នុងការរំដោះទឹកជំនន់ពីតំបន់អង្គរ ជាពិសេសទៅទៀតស្ពានឆ្លងប្រឡាយនេះ ក៏ជារក្សាទឹកសម្រាប់ស្រោចស្រពស្រូវប្រជាពលរដ្ឋផដែរ ។
គួររំលឹកថា ក្រៅពីការសាងសង់ស្ពានបេតុងថ្មី២កន្លែងនៅស្រុកពួកនេះ អាជ្ញាធរជាតិអប្សរាក៏បានកំពុងដំណើរការសាងសង់ស្ពានប្រភេទបេតុងចំនួន២កន្លែង លើកំណាត់ផ្លូវកង់នៅក្នុងរមណីយដ្ឋានអង្គរផងដែរ ក្នុងនោះ ៖ ស្ពានទី១ មានប្រវែង១៥០ម៉ែត្រ ស្ថិតក្នុងភូមិមណ្ឌល៣ សង្កាត់ស្លក្រាម ក្រុងសៀមរាប និង ស្ពានទី២ មានប្រវែង២៥ម៉ែត្រ ស្ថិតក្នុងភូមិរហាល សង្កាត់នគរធំ ក្រុងសៀមរាប ហើយក្រោយពេលបញ្ចប់ការសាងសង់ស្ពានលើកំណាត់ផ្លូវកង់ទាំងពីរនេះ នឹងរួមចំណែកយ៉ាងសំខាន់ក្នុងការលើកកម្ពស់វិស័យទេសចរណ៍ រួមទាំងបានផ្តល់បទពិសោធន៍ថ្មីបន្ថែមទៀតដល់អ្នកទស្សនា និងអ្នកនិយមមធ្យោបាយធ្វើដំណើរដោយកង់ ជាពិសេសសម្រួលដល់ការធ្វើដំណើរ របស់បងប្អូនប្រជាពលរដ្ឋ និងសិស្សានុសិស្សជាដើម ៕
អត្ថបទ និង រូបថត ៖ លោក ឈិត សាវី
កែសម្រួលអត្ថបទ ៖ លោក លីវ សាន្ត
