មានប្រសាសន៍ក្នុងឱកាសនាំយកនូវរថយន្តពេទ្យសង្គ្រោះបន្ទាន់ ចំនួន ០១ គ្រឿង រួមទាំងសំភារៈបរិក្ខាពេទ្យ ជូនដល់មន្ទីរសុខាភិបាល ស្រុកប្រតិបត្តិ កោះសូទិន នៅព្រឹកថ្ងៃទី០៩ ខែកញ្ញា ឆ្នាំ២០២១នេះ ឯកឧត្តម ខៀវ កាញារីទ្ធ រដ្ឋមន្ត្រីក្រសួងព័ត៌មាន និងជាប្រធានក្រុមការងាររាជរដ្ឋាភិបាលកម្ពុជា ចុះមូលដា្ឋនស្រុក កោះសូទិន ខេត្តកំពង់ចាម ឯកឧត្តម បានលើកឡើងថា សម្រាប់នៅក្នុងបណ្តាប្រទេសអាស៊ាន កម្ពុជាជាប់ចំណាត់ថ្នាក់ទី២ បន្ទាប់ពីប្រទេសសឹង្ហបុរី តែគិតពីចំនួនប្រជាជន ដែលបានចាក់វ៉ាក់សាំងដូសទី៣ ច្រើនជាងគេ គឺប្រទេសកម្ពុជា នៅលេខរៀងទី១ វិញ។
ឯកឧត្តមរដ្ឋមន្ត្រី មានប្រសាសន៍ទៀតថា នេះគឺជាការយកចិត្តទុកដាក់របស់ប្រមុខរាជរដ្ឋាភិបាកកម្ពុជា ក្នុងការលើកកម្ពស់ និងថែរក្សាសុខភាពរបស់ប្រជាពលរដ្ឋ នៅទូទាំងប្រទេស។ ក្រៅពីសិទ្ធិរស់នៅ សិទ្ធិប្រកបរបរ សិទ្ធិសិក្សារៀនសូត្រ គឺសិទ្ធិទទួលបានការថែទាំសុខភាពជាការចាំបាច់បំផុតព្រោះថា បើសិនជាប្រទេសជាតិមួយមានភាពរឹងមាំ អាស្រ័យដោយប្រជាជានមានសុខភាពល្អ និងមានចំណេះដឹងខ្ពង់ខ្ពស់ ដែលទាំងនេះ គឺជាគោលការណ៏ចម្បងរបស់ប្រមុខរាជរដ្ឋាភិបាល។ ឯកឧត្តមបានរំលឹកដែរថា កាលពីកំឡុងឆ្នាំ១៩៧៩ និង ១៩៨០ គឺ កម្ពុជាមានគោលការណ៏៤ រួមមាន ទឹក ភ្លើង ផ្លូវ មនុស្ស ប៉ុន្តែចាប់ផ្តើមពីសតវត្សទី២១ នេះវិញ បានប្តូរយកមនុស្សមុន ទឹក ភ្លើង ផ្លូវក្រោយវិញ ហើយបានដាក់ចេញនូវគោលការណ៏បណ្តុះបណ្តាលធនធានមនុស្សជាសំខាន់ ក្នុងនោះខាងផ្នែកសុខាភិបាលបានតូនាទីមិនអាចខ្វះបាន សម្រាប់ពិនិត្យព្យាបាលជូនប្រជាពលរដ្ឋ។ សម្រាប់ការចាក់បានដល់ប្រជាជនប្រមាណ ៨០ ទៅ៩០ ភាគរយ ទើបអាចធានាបានកុំអោយការរីករាលដាលនៃការឆ្លងកូវីដ បំលែងថ្មី Delta បាន។ តែយ៉ាងណា ទោះបីជាយ៉ាងណា ការចាក់លើកទី២ និងលើកទី៣ ហើយក៏ដោយ គឺគ្រប់បណ្តាប្រទេសទាំងអស់នៅតែអនុវត្តន៏តាមវិធានសុខាភិបាលដដែល ក្នុងនោះប្រទេសកម្ពុជាដាក់ចេញគោលការណ៍ ៣កុំ និង៣ការពារ។
ក្នុងឱកាសនេះដែរ ឯកឧត្តមរដ្ឋមន្រ្តី ខៀវ កាញារីទ្ធ បានផ្តល់ថវិកាចំនួន ១លាន ២សែន ១ម៉ឺន ៥ពាន់រៀល សម្រាប់ស្រុកកោះសូទិន ទុកទិញគ្រឿងឧបភោគបរិភោគ ជូនដល់ប្រជាពលរដ្ឋកំពុងធ្វើចត្តាឡីស័ក ៩គ្រួសារ ក្នុងឃុំល្វេ និងឃុំព្រែកតានង់។ ជាមួយនេះឯកឧត្តម ក៏បានប្រគល់ជូននូវប័ណ្ណសរសើរដល់ក្រុមគ្រូពេទ្យចំនួន ៥០នាក់ ដែលបានចូលរួមក្នុងយុទ្ធនាការចាក់វ៉ាក់សាំងបង្ការជំងឺកូវីដ-១៩ ជូនដល់ប្រជាពលរដ្ឋក្នុងស្រុកកោះសូទិន ខេត្តកំពង់ចាម។ ក្រៅពីការផ្តល់អំណោយជាឡានពេទ្យ សង្គ្រោះបន្ទាន់ ដែលបំពាក់បរិក្ខាគ្រប់គ្រាន់នេះហើយ ឯកឧត្តម រដ្ឋមន្រ្តី ខៀវ កាញារីទ្ធ បានផ្តល់ជូនជា ប្រេងម៉ាស៊ូតចំនួន ៥០០លីត្រ សម្រាប់ចាក់ឡានពេទ្យដឹកអ្នជំងឺ, ជូនថវិកាចំនួន ៨លានរៀល សម្រាប់ទិញបរិក្ខាពេទ្យធ្មេញ, ផ្តល់ជូនសម្លៀកបំពាក់ពេទ្យការពារកូវីដ ចំនួន ៦០០សម្រាប់, ម៉ាស ចំនួន ២ម៉ឺនម៉ាស, ស្រោមដៃពេទ្យ ១,២០០, ថ្នាំវីតាមីន ២០កំប៉ុង, សេរ៉ូមប្រៃ និងផ្អែម ១០០កំប្លោក, និងសៀវភៅសរសេរ ៩០ក្បាល។ ក្រុមគ្រួពេទ្យ អញ្ជើញចូលរួម ចំនួន ៣២នាក់ ក្នុងម្នាក់ ៥ម៉ឺនរៀល, កងកំលាំងនគរ អាវុធហត្ថ និងយោធាស្រុកកោះសូទិន សរុប ៦០ម៉ឺនរៀល៕
