លោក ម៉ៅ សុខនី មន្រ្តីបច្ចេកទេសនៃនាយកដ្ឋានអភិរក្សប្រាសាទក្នុងឧទ្យានអង្គរនិងបុរាណវិទ្យាបង្ការ បានឱ្យដឹងនៅថ្ងៃទី១៥ ខែកញ្ញានេះថា អាជ្ញាធរជាតិអប្សរា បានចាប់ផ្តើមការងារជួសជុលពង្រឹងរចនាសម្ព័ន្ធកំាជណ្តើច្រាំងកសិន្ធុ ផ្នែកខាងត្បូងស្ពានហាល នៃប្រាសាទអង្គរវត្ត ចាប់ពីដើមខែសីហា ឆ្នាំ២០២១នេះមក ក្នុងគោលបំណង លើកតម្លៃសំណង់បុរាណឱ្យនៅគង់វង្ស រក្សាទឹកទុកដើម្បីទ្រទ្រុងភាពរឹងមាំរបស់គ្រឹះប្រាសាទ និងបង្កើនសោភ័ណ្ឌភាពស្រស់ស្អាតបន្ថែមនៃប្រាសាទអង្គរវត្ត បន្ទាប់ពីបញ្ចប់គម្រោងសិក្សារយៈពេល២ឆ្នាំមក។
លោក ម៉ៅ សុខនី បានឱ្យដឹងទៀតថា គម្រោងជួសជុលពង្រឹងរចនាសម្ព័ន្ធកសិន្ធុរផ្នែកខាងត្បូង មានប្រវែងសរុប២០០ម៉ែត្រ ដោយប្រើប្រាស់ពេលវេលាជួសជុលរយៈបេល0៣ឆ្នាំ ដោយបានចែកចេញជា៣ដំណាក់កាលធំៗ គឺ ៖ ទី១. ការពង្រឹងរចនាសម្ព័ន្ធចាស់ ដោយចាក់បេតុងកាំជណ្តើរបន្ថែមនៅគ្រឹះខាងក្រោម និងកែសម្រួលផ្នែកស្រុតខ្លះៗ , ទី២. ធ្វើការជួសជុលនៅផ្នែកកាំជណ្តើរ ដែលរលួសខ្លះឬបាត់បង់រូបរាងដើមផ្នែកមធ្យម និងទី៣. ធ្វើការជួសជុលកាំជណ្តើដែលខូចខាតទ្រុងទ្រាយដើម ដែលបានជួសជុលតាំងពីជំនាន់បារាំងមក ខណៈ បច្ចុប្បន្នក្រុមការងារកំពុងធ្វើការកល់ទ្របេតុងដែលបាក់ៗ បន្ទាប់មក ធ្វើទំនប់ប្រវែង៨០ម៉ែត្រ ដើម្បីបូមទឹកចេញ ចាប់ផ្តើមការងារសិក្សាបុរាណវិទ្យា ពិនិត្យស្ថានភាពគ្រឹះខាងក្រោម និងអនុវត្តការងារពង្រឹងគ្រឹះតែម្តង។
សូមរំឭកថា ច្រាំងកសិន្ទុប្រាសាទអង្គរវត្តនេះ ក៏ធ្លាប់មានប្រវត្តិបានធ្វើការជួសជុលជាច្រើនដងរួចមកហើយ ដោយសាលាបារាំងចុងបូព៌ា អ្នកជំនាញការអ៊ីតាលី និងអ្នកជំនាញការប្រទេសឥណ្ឌា។រហូតមកដល់បច្ចុប្បន្នអាជ្ញាធរជាតិអប្សរា បានយកចិត្តទុកដាក់យ៉ាងខ្លាំង លើការងារអភិរក្សនិងជួសជុលប្រាំង្គប្រាសាទនិងកសិន្ធុ ដើម្បីអភិរក្សសំណង់បុរាណខ្មែរ ឱ្យរឹងមាំយូរអង្វែង និងលើកតម្លៃសោភ័ណភាព សំណង់បេតិកភណ្ឌឱ្យមានភាពស្រស់ស្អាតជាទីទាក់ទាញភ្ញៀវទេសចរមកកម្សាន្ត ។
ប្រាសាទអង្គរវត្ត ត្រូវបានសាងសង់ នៅដើមសតវត្សទី១២ ដោយព្រះបាទសូរ្យវរ្ម័នទី២ ដើម្បីឧទ្ទិសដល់ព្រហ្មញ្ញសាសនា។ នៅជុំវិញប្រាសាទ គូទឹកឬកសិន្ធុ ព័ទ្ធជុំវិញ ដោយកសិន្ធុទឹកនេះ ក៏មានទំនាក់ទំនងយ៉ាងសំខាន់ជាមួយប្រាសាទ ជាពិសេសការជួយទ្រទ្រង់គ្រឹះខាងក្រោម រក្សាលំនឹងប្រាសាទ ឱ្យនៅស្ថិតស្ថេរយូរអង្វែង ប៉ុន្តែដោយសារកត្តាអាយុកាល អាកាសធាតុ ដើមឈើដុះជុំវិញ បានធ្វើឱ្យកាំជណ្តើនៃច្រាំងកសិន្ធុរលួសចេញពីគ្នា បានរងការខូចខាតជាខ្លាំង ៕
អត្ថបទ និងរូបថត ៖ លោក ជា ស្រស់ ,ងិន គីមឡេង
កែសម្រួលអត្ថបទ ៖ លោក លីវ សាន្ត
