អំណោយសប្បុរសធម៏ រួមមានសាប៊ូចំនួន ២០កេស ទឹកសម្អាតបន្ទប់ ទឹក ១០កេស ទឹកលាងដៃ ២០កេស និងម៉ាស ៥កេស ត្រូវបានលោក ម៉ាន់ ពន្លឺពេជ្រ នាយកគ្រប់គ្រងទូទៅ នៃក្រុមហ៊ុនសាប៊ូ លីប៉ាយ បាននាំយកមកប្រគល់ជូនដល់ឯកឧត្តម ខៀវ កាញារីទ្ធ រដ្ឋមន្រ្តី ក្រសួងព័ត៌មាន នៅព្រឹកថ្ងៃទី១៦ ខែកញ្ញា ឆ្នាំ២០២១ ដើម្បីទុកចែកជូនដល់មន្រ្តីរាជការក្រសួងព័ត៌មាន។
តាមការបញ្ជាក់របស់ លោក ម៉ាន់ ពន្លឺពេជ្រ បានបញ្ជាក់ថា អំណោយទាំងនេះ គឺក្រុមហ៊ុនជូនដល់ឯកឧត្តម រដ្ឋមន្រ្តី ខៀវ កាញារីទ្ធ ទុកធ្វើការប្រើប្រាស់សម្រាប់មន្រ្តី ក្នុងក្រសួងព័ត៌មាន ឬយកទៅចែកជូនដល់ប្រជាពលរដ្ឋ ក្នុងសហគមន៏ដែលអាចប្រើប្រាស់បាន។ លោកនាយកក្រុមហ៊ុន បានធ្វើការបញ្ជាក់ដែរថា នេះមិនមែនជាលើកទី១ ទេដែលក្រុមហ៊ុនសាប៊ូ លី ប៉ាយ នាំយកនូវសាប៊ូ ប្រើប្រាស់ចែកជូនដល់ក្រសួងស្ថាប័នផ្សេងៗទៀត ដូចជា ពេលកន្លមកជូនដល់ក្រសួងកសិកម្ម រុក្ខាប្រមាញ់ និងនេសាទ ក្រសួង អភិវឌ្ឍន៏ជនបទ ក្រសួងពាណិជ្ជកម្ម ហើយសម្រាប់ឱកាសនេះ យកមកជូនដល់ក្រសួងព័ត៌មាន។
លោក ម៉ាន់ ពន្លឺពេជ្រ បានជម្រាបជូនពីគម្រោងជាជំហ៊ានទៅមុខទៀត គឺយកទៅចែកជូនដល់សាលារៀន ក្នុងក្របខណ្ឌទូទាំងប្រទេស រួមទាំងការិយាល័យអប់រំស្រុក ដែលរួមមានសាប៊ូលាងដៃ សាប៊ូម្សៅ ទឹកសម្អាតបន្ទប់ទឹក និងម៉ាសថែមទៀតផងដែរ។ ក្រោមពាក្យស្លោក លីប៉ាយ គិតគូពីសុខភាពប្រជាជនជាធំ ដើម្បីជាការចូលរួមចំណែកជួយដល់កិច្ចការងារសង្គម ពិសេសដើម្បីចូលរួមការបង្ការ និងទប់ស្កាត់ការរីករាលដាលនៃជំងឺកូវីដ-១៩ នៅកម្ពុជាក្នុងឱកាសបើកដំណើរការ គ្រឹះស្ថានសិក្សាសាធារណៈឡើងវិញ ក្រុមហ៊ុនសាប៊ូលីប៉ាយ បានប្រកាសក្នុងការផ្តល់ជូនគ្រឹះស្ថានសិក្សាសាធារណៈទាំងអស់នូវ សាប៊ូលីប៉ាយ សម្រាប់ជូនលោកគ្រូអ្នកគ្រូ សិស្សានុសិស្សបានប្រើប្រាស់។
លោកប្រធានក្រុមហ៊ុន បានអោយដឹងទៀតថា ការនាំចូលរាល់ផលិតផលសាប៊ូ និងសំភារប្រើប្រាស់ទាំងនេះពីប្រទេសចិន មកលក់ក្នុងទីផ្សារប្រទេសកម្ពុជាប្រមាណជិត ២ឆ្នាំមកហើយ ក្រៅពីការរកស៊ីក្នុងសង្គម ក៏ជួយសង្គមវិញផងដែរ ដែលនេះជាទស្សនរបស់ក្រុមហ៊ុន បានប្រកាន់យក។ បច្ចុប្បន្នក្រុមហ៊ុនមានដេប៊ូចែកចាយទូទាំងប្រទេស មានបុគ្គលិកបំពេញការងារគ្រប់ផ្នែកប្រមាណ ជាង៣០០នាក់។
ឯកឧត្តម រដ្ឋមន្រ្តី ខៀវ កាញារីទ្ធ បានថ្លែងអំណរគុណចំពោះ លោក ម៉ាន់ ពន្លឺពេជ្រ នាយកគ្រប់គ្រងទូទៅ របស់ក្រុមហ៊ុន សាប៊ូលីប៉ាយ ដែលបានឧបត្ថម្ភ ទឹកលាងដៃ ២០កេស សាប៊ូ ២០កេស ទឹកសម្អាតបន្ទប់ទឹក ១០កេស និងម៉ាស ៥កេស ជូនដលមន្ត្រីរាជការក្រសួងព័ត៌មាន នាឱកាសនេះ ។ សូមអោយក្រុមហ៊ុនជោគជ័យក្នុងមុខរបររកស៊ី និងចូលរួមចំណែកក្នុងសកម្មភាពមនុស្សធម៏បន្តទៅមុខទៀត៕
