ប្រជាពលរដ្ឋដែលលក់ដូរនៅខាងមុខប្រាសាទអង្គរវត្ដ បានប្រតិកម្មតបជាមួយនឹងអ្នករិះគន់ និងប្រព័ន្ធផ្សព្វផ្សាយតាមបណ្ដាញសង្គមហ្វេសប៊ុក ដែលមានឈ្មោះថា ឌឺខេមបូឌាដេលីខ្មែរ (Cambodia Daily Khmer) ថា ជាជនអគតិ ហើយការផ្សព្វផ្សាយព័ត៌មានបំភ្លើស និងជាព័ត៌មានខ្វះការយល់ដឹង ដែលថាអាជ្ញាធរជាតិអប្សរាកាប់បំផ្លាញដើមឈើធ្វើអាជីវកម្មនោះ។
កាលពីថ្ងៃទី១៥ ខែកញ្ញា ឆ្នាំ២០២១នេះ ផេកហ្វេសប៊ុក The Cambodia Daily Khmer បានផ្សព្វផ្សាយថា ដើមឈើទាលធំៗមានអាយុកាលរាប់រយឆ្នាំ ដុះក្នុងតំបន់ឧទ្យានអង្គរទល់មុខប្រាសាទអង្គរវត្ត ដែលទាក់ទាញភ្ញៀវទេសចរនោះ កំពុងប្រឈមងាប់ជាបណ្តើរៗ ដោយសារដាក់ថ្នាំពុល និងមានដើមឈើខ្លះទៀត ត្រូវគេកាប់ដោយស្របច្បាប់។
ករណីនេះប្រជាពលរដ្ឋជាអាជីវករលក់ដូរនៅខាងមុខអង្គរវត្ដក្បែដើមឈើនោះ បានលើកឡើងថា ការផ្សព្វផ្សាយព័ត៌មានបែបនេះ ជាព័ត៌មានបំភ្លើសខ្វះការពិត ដែលមានចរិតញុះញង់ឱ្យមានការភាន់ច្រឡំ ព្រោះថា ដើមឈើដែលអាជ្ញាធរជាតិអប្សរា បានកាប់ចោលនោះ វាមានស្ថានភាពងាប់ ហើយខ្លាចមានគ្រោះថ្នាក់ដល់អ្នកលក់ដូរ និងកូនចៅរបស់ពួកគាត់ខាងក្រោដើមឈើ ព្រមទាំងខ្លាចមានហានីភ័យដល់អ្នកទេសចរណ៍ផងដែរ។ ពួកគាត់ថា ដើមឈើនោះ មិនមានការដាក់ថ្នាំសម្លាប់ និងកាប់ធ្វើអាជីវកម្មនោះទេ ដូចការលើកឡើងនោះទេ គឺកាប់ចោលដើម្បីបញ្ចៀសគ្រោះថ្នាក់ដល់មនុស្សតែប៉ុណ្ណោះ។
ព័ត៌មានជាតិ ថ្មីៗ
ពួកគាត់បានប្រតិកម្មថា ការផ្សព្វផ្សាយព័ត៌មានបែបនេះជាព័ត៌មានខ្វះការយល់ដឹង ជាព័ត៌មានក្លែងក្លាយ ហើយព័ត៌មានបែបនេះ មានតែជនអគតិទេដែលហ៊ានយកទៅផ្សាយខ្វះការពិចារណា។ ពួកគាត់បានគាំទ្រការកាប់ដើមឈើងាប់នៅខាងមុខអង្គរចោល ព្រោះខ្លាចមានគ្រោះថ្នាក់ដល់មនុស្ស ជាពិសេសដល់កន្លែងលក់ដូររបស់ពួកគាត់។ពួកគាត់បានលើកឡើងថា ប្រជាពលរដ្ឋពូកែរិះគន់ ត្រូវរិះគន់ ឱ្យមានការស្រាវជ្រាវរកការពិត ដើម្បីយកទៅផ្សព្វផ្សាយឱ្យមានជឿជាក់ពីប្រជាពលរដ្ឋ ផ្ទុយទៅវិញបើរិះគន់ជាន់ពន្លិចនោះទេ ពួកគាត់អស់ជំនឿទៅលើប្រព័ន្ធផ្សព្វផ្សាយបែបនេះហើយ។
ជុំវិញបញ្ហានេះ លោក យិត ចាន់ដារដ្ឋ អគ្គនាយករងនៃអាជ្ញាធរជាតិអប្សរា មានប្រសាសន៍ថា ដើមឈើដែលបានកាប់ចោលនោះ ត្រូវបានថែទាំយ៉ាងមត់ចត់បំផុតដើម្បីឱ្យមានជីវិត ប៉ុន្ដែវាមានអាយុកាលច្រើនឆ្នាំហើយទើបអាជ្ញាធត្រូវកាប់ចោល ដើម្បីបញ្ចៀសគ្រោះថ្នាក់ដល់ភ្ញៀវទេសចរ ហើយការកាប់នេះមានការជូនដំណឹងជាមុន មិនមែនកាប់ធ្វើអាជីវកម្មដូចការរិះគន់របស់បុគ្គលអគតិមួយចំនួន និងការចុះផ្សាយតាមបណ្ដាសង្គមហ្វេសប៊ុករបស់ The Cambodia Daily Khmer នោះទេ។
លោកបានបន្ដថា ដើមឈើនៅខាងមុខអង្គរនោះ មានច្រើនដើមដែលបានមានហានីភ័យដល់ភ្ញៀវទេសចរ សំណង់អគារជាដើម ជាក់ស្ដែងដើមឈើទាលនៅខាងអង្គរវត្ដ ដែលអាចបង្ករគ្រោះថ្នាក់ដល់អ្នកទេសចរណ៍។ លោកបញ្ជាក់ថា ដើមឈើពិតមែនតែជារុក្ខជាតិ ប៉ុន្ដែវាក៍មានជំងឺដូចមនុស្សសត្វដែរ ដែលលោកចាត់ទុការរិះគន់ និងការផ្សព្វផ្សាយតាមហ្វេសប៊ុក The Cambodia Daily Khmer ជាព័ត៌មានបំភ្លើសខ្វះការពិត។
បើតាមលោក យិត ចាន់ដារដ្ឋ ដើមឈើនៅខាងមុខអង្គរក្នុងបរិវេណប៉ាកវី នឹងត្រូវកាត់កាត់ចោលបន្ថែមទៀត ព្រោះវាបានងាប់ ទោះបីអ្នកជំនាញអាជ្ញាធរជាតិខិតខំថែរក្សា យ៉ាងក៍ដោយ ដើម្បីកុំឱ្យមានហានីភ័យដល់អ្នកទេសចរ ក៍ដូចប្រជាពលរដ្ឋអាជីវករផងដែរ៕
អត្ថបទ និង រូបភាព៖ លោក ឈិត សាវី, លោក ជា ស្រស់
