នៅព្រឹកថ្ងៃទី១៧ ខែកញ្ញា ឆ្នាំ២០២១ លោក ទា គឹមសុទ្ធ ប្រធានមន្ទីរកសិកម្ម រុក្ខាប្រមាញ់ និងនេសាទខេត្តសៀមរាប ទទួលបន្ទុកក្រុមការងារស្រាវជ្រាវកូវីដ-១៩ ក្នុងសង្កាត់ជ្រាវ ក្រុង/សៀមរាប និងលោក ព្រំ វិច ប្រធានការិយាល័យផលិតកម្ម និងបសុព្យាបាលនៃមន្ទីរកសិកម្ម រុក្ខាប្រមាញ់ និងនេសាទខេត្ត រួមជាមួយមន្ត្រីជំនាញក្រោមឱវាទ សហការជាមួយអាជ្ញាធរសង្កាត់ជ្រាវ ក្រុងសៀមរាប បានចុះបាញ់ថ្នាំជិវសុវត្ថិភាពសម្លាប់មេរោគ នៅតាមផ្សារទាំង៤ ក្នុងសង្កាត់ជ្រាវរួមមាន៖ ផ្សារជ្រាវ ផ្សារខ្នារ ផ្សារបុស្សក្រឡាញ់ និងផ្សារកែងមេម៉ាយ និងនៅសាលាសង្កាត់ រួមនឹងទីប្រជុំជនក្នុងសង្កាត់ជ្រាវផងដែរ។
លោកទា គឹមសុទ្ធ មានប្រសាសន៍ថា ការបាញថ្នាំជីវសុវត្ថិភាពក្នុងមូលដ្ឋាននេះ គឺអនុវត្តតាមការណែនាំពីវិធានការការពារទប់ស្កាត់ជំងឺកូវីដ-១៩ របស់រដ្ឋបាលខេត្តសៀមរាប ក្រោមការចង្អុលបង្ហាញយ៉ាងមុតមាំរបស់ ឯកឧត្តម ទៀ សីហា អភិបាលនៃគណៈអភិបាលខេត្ត និងជាប្រធានគណៈបញ្ជាការឯកភាពរដ្ឋបាលខេត្ត ដើម្បីរួមគ្នាទប់ស្កាត់ការឆ្លងរាលដាលជំងឺកូវី-១៩ ចូលក្នុងសហគមន៍ ខណៈដែលស្ថានភាពកូវីដក្នុងខេត្ត ពិសេសក្រុងសៀមរាបបន្តកើនឡើងគួរឱ្យព្រួយបារម្ភ។
លោកប្រធានមន្ទីរ បន្ថែមថា ក្នុងនាមក្រុមការងារស្រាវជ្រាវកូវីដ-១៩ ក្នុងសង្កាត់ជ្រាវលោកនឹងបន្តសហការគ្នាជាប្រចាំជាមួយសមត្ថកិច្ច និងអាជ្ញាធរមូលដ្ឋាន ក្រុមការងារយុវជនសង្កាត់ ដើម្បីធ្វើការណែនាំអប់រំ ពន្យល់ដល់ ប្រជាពលរដ្ឋឱ្យពួកគាត់អនុវត្តឱ្យបានខ្ជាប់ខ្ជួននូវសេចក្តីណែនាំ របស់ក្រសួងសុខាភិបាល និងវិធានការរបស់រាជរដ្ឋាភិបាល ៣ការពារ និង៣កុំ ក្នុងការទប់ស្កាត់ដល់ការឆ្លងជំងឺកូវីដ-១៩ ។ ក្នុងនោះក៏សូមស្នើដល់ពលរដ្ឋត្រូវប្រកាន់ខ្ជាប់នូវការរក្សា សំអាតអនាម័យស្អាត ត្រូវពាក់ម៉ាស់ឱ្យបានត្រឹមត្រូវ លាងដៃជាមួយសាប៊ូ អាល់កុលឬជែល និងត្រូវរក្សាគម្លាតសុវត្ថិភាពសង្គមជាដើម និងអនុវត្ត៣កុំ គឺកុំចូលទៅទីកន្លែងបិទជិតខ្វះខ្យល់ចេញចូល និងប្រើម៉ាស៊ីនត្រជាក់ច្រើន កុំទី២ កុំទៅទីដែលមានមនុស្សច្រើនកុះករ និងកុំទី៣ កុំប៉ះពាល់គ្នា ជួបជុំគ្នាច្រើនជាដើម៕
អត្ថបទ និង រូបភាព៖ លោក យូ វង្ស
