នៅព្រឹកថ្ងៃទី១៧ ខែកញ្ញា ឆ្នាំ២០២១នេះ ឯកឧត្តម ខៀវ កាញារីទ្ធ រដ្ឋមន្ត្រីក្រសួងព័ត៌មាន បានផ្តល់ម៉ាស៊ីនផ្សាយវិទ្យុFM ចំនួន១គ្រឿង ដែលមានកម្លាំងផ្សាយ 5KW ជូនដល់មន្ទីរព័ត៌មានខេត្តសៀមរាប ដើម្បីជំនួសម៉ាស៊ីនផ្សាយចាស់ទៅហើយ។
ពិធីប្រគល់ម៉ាស៊ីនផ្សាយវិទ្យុFMនេះ បានប្រព្រឹត្តទៅទីស្ដីការក្រសួងព័ត៌មាន ក្រោមអធិបតីភាពដ៏ខ្ពស់ខ្ពស់ឯកឧត្តម ខៀវ កាញារីទ្ធ រដ្ឋមន្ត្រីក្រសួងព័ត៌មាន ដោយមានការអញ្ជើញចូលរួមពីសំណាក់ឯកឧត្ដម លោកជំទាវ លោក លោកស្រី ជារដ្ឋលេខាធិការ អនុរដ្ឋលេខាធិការ និង មន្ត្រីអ្នកមុខអ្នកការសំខាន់ៗមួយចំនួន នៃក្រសួងព័ត៌មាន ព្រមទាំងថ្នាក់ដឹកនាំ និង មន្ត្រីរាជការ នៃមន្ទីរព័ត៌មានខេត្តសៀមរាប ។
ក្នុងឱកាសនោះឯកឧត្ដម លីវ សុខុន ទីប្រឹក្សាក្រសួងព័ត៌មាន និង ជាប្រធានមន្ទីរព័ត៌មានខេត្តសៀមរាប បានថ្លែងនូវអំណរគុណយ៉ាងជ្រាលជ្រៅជាទីបំផុតចំពោះ ឯកឧត្តម ខៀវ កាញារីទ្ធ រដ្ឋមន្ត្រីក្រសួងព័ត៌មាន ដែលឯកឧត្តម តែងតែយកបញ្ញាញាណគិតគូរស្វះស្វែងរកដៃគូ ដើម្បីកៀងគររកជំនួយជាឧបករណ៍ សម្ភារបច្ចេកទេស សម្រាប់បម្រើឲ្យវិស័យព័ត៌មាន ក្នុងការជួយកាត់បន្ថយចំណាយថវិការដ្ឋបានយ៉ាងច្រើន ដែលសកម្មភាពដ៏ប្រពៃថ្លៃថ្លារបស់ឯកឧត្តមរដ្ឋមន្ត្រី ស្តែងឲ្យឃើញថា បានយកចិត្តទុកដាក់ អស់ពីកម្លាំងកាយចិត្ត ក្នុងការអភិវឌ្ឍ វិស័យព័ត៌មានឲ្យមានការរីកចម្រើន និងសម្បូរបែបជាលំដាប់ ដែលរយៈកាលកន្លងមក ដូចជាការផ្តល់គ្រឿងឧបករណ៍ សម្ភារបច្ចេកទេស ព័ត៌មានវិទ្យាដល់មន្ទីរព័ត៌មានរាជធានី-ខេត្តទាំងអស់ ហើយជាក់ស្តែងនាពេលនេះ បានផ្តល់ម៉ាស៊ីនផ្សាយវិទ្យុFM ចំនួន១គ្រឿង ដែលមានកម្លាំងផ្សាយ 5KW ម៉ាក់ Seil ផលិតនៅប្រទេសអ៊ីតាលី ដល់មន្ទីរព័ត៌មានខេត្តសៀមរាប ។
ព័ត៌មានជាតិ ថ្មីៗ
ឯកឧត្ដម លីវ សុខុន បានបន្តថា ការផ្តល់អំណោយម៉ាស៊ីនផ្សាយវិទ្យុនាពេលនេះ គឺជាការគិតគូរដ៏ខ្ពង់ខ្ពស់ឯកឧត្តមរដ្ឋមន្ត្រីក្រសួងព័ត៌មាន ហើយមន្ទីរព័ត៌មានខេត្តសៀមរាប និងខិតខំបំពេញការងារឱ្យអស់ពីកម្លាំងកាយចិត្ត ដើម្បីលើវិស័យព័ត៌មាន និងធ្វើជាស្ពានចំលងរវាងអាជ្ញាធរ ទៅប្រជាពលរដ្ឋ។
ឯកឧត្តម ខៀវ កាញារីទ្ធ រដ្ឋមន្ត្រីក្រសួងព័ត៌មាន មានប្រសាសន៍ថា ម៉ាស៊ីនផ្សាយវិទ្យុFM ចំនួន១គ្រឿង ដែលបានប្រគល់ជូនមន្ទីរព័ត៌មានខេត្តសៀមរាប គឺជាអំណោយរបស់ អ្នកឧកញ៉ាបណ្ឌិត យូសាម៉េត អគ្គនាយកក្រុមហ៊ុន ECON Group.ltd និងជាអគ្គនាយកវិទ្យុឯករាជ្យ ជូនមកឯកឧត្តម សម្រាប់ផ្ដល់ជូនដល់មន្ទីរព័ត៌មានខេត្ត ដើម្បីបំរើដល់ការផ្សព្វផ្សាយ ។ ឯកឧត្តម បន្តថា ដោយសង្កេតឃើញខេត្តសៀមរាប ជាខេត្តមួយដែលមានសក្តាអនុពលខ្លាំងលើវិស័យទេសចរណ៍ ដូច្នេះការផ្សព្វផ្សាយគឺជារឿងសំខាន់ ដើម្បីបំរើឱ្យប្រជាពលរដ្ឋដែលរស់នៅក្នុងតំបន់ ខណៈម៉ាស៊ីនផ្សាយវិទ្យុក្នុងខេត្តនេះ បច្ចុប្បន្នមានសភាពចាស់ទ្រុតទ្រោម។
គួររំលឹកថា នេះជាលើកទី២ហើយ ដែលឯកឧត្តម ខៀវ កាញារីទ្ធ រដ្ឋមន្ត្រីក្រសួងព័ត៌មាន បានផ្តល់ម៉ាស៊ីនផ្សាយវិទ្យុFM ដល់មន្ទីរព័ត៌មានខេត្តសៀមរាប ខណៈលើកទី១ នៅក្នុងអំឡុងឆ្នាំ២០១០ ឯកឧត្តមរដ្ឋមន្ត្រីក្រសួងព័ត៌មាន បានផ្តល់ម៉ាស៊ីនផ្សាយវិទ្យុFM ចំនួន១គ្រឿង ដែលមានកម្លាំងផ្សាយ 5KW ផលិតនៅប្រទេសអាមេរិច ដល់មន្ទីរព័ត៌មានខេត្តសៀមរាប ដែលជាជំនួយរបស់សាធារណរដ្ឋសង្គមនិយមវៀតណាម ហើយបានដាក់ឲ្យដំណើរការផ្សាយជាផ្លូវការ នៅថ្ងៃទី១១ ខែមករា ឆ្នាំ២០១១មក រហូតដល់បច្ចប្បន្ននេះ ម៉ាស៊ីនផ្សាយនេះ មានការខូចខាតច្រើន ដែលដំណើរការផ្សាយបានកម្លាំងតែ 2KW ប៉ុណ្ណោះ ៕
