នៅរសៀលថ្ងៃទី១៧ ខែកញ្ញា ឆ្នាំ២០២១ ព្រះគ្រូធម្មវិសុទ្ឋិរង្សី ឡាច ចន្ថា ព្រះចៅអធិការវត្តដំណាក់ រួមជាមួយគណៈកម្មការវត្តដឹកនាំដោយ ឧបាសក ង៉ែត យ៉ិន ព្រមទាំងមានការនិមន្ត និងអញ្ជើញចូលរួមពី ព្រះសមុហ៍គណខេត្ត ព្រះរាជាគណៈ និងជាព្រះចៅអធិការវត្ត ចំនួន៤ ក្នុងក្រុងសៀមរាប លោក សាម ឡន ចៅសង្កាត់សាលាកំរើក រួមជាមួយក្រុមការងារសង្កាត់ផងដែរ ។
ព្រះគ្រូធម្មវិសុទ្ឋិរង្សី ឡាច ចន្ថា មានសង្ឃដីកាថា៖ សម្ភារដែលយកមកចែកជូននេះគឺទទួលបានពីសប្បុរសជន និងញាតិញោមជិតឆ្ងាយយកមកប្រគេន ហើយព្រះសង្ឃ និងគណៈកម្មការវត្តបានបែងចែកទុកជូនចំនួន ៣៥គ្រួសារ ស្ថិតក្នុងភូមិ ចំនួន៧ ក្នុងសង្កាត់សាលាកំរើក ជាគ្រួសារដែលកំពុងជាប់ចត្តាឡីស័កនិងត្រូវបានបិទខ្ទប់លំនៅឋានជាបណ្តោះអាសន្ន ពួកគាត់មិនអាចចេញទៅណាបានដោយសារសមាជិកគ្រួសារខ្លះមានឆ្លងជំងឺកូវីដ-១៩ និងខ្លះទៀតប៉ះពាល់ដោយផ្ទាល់ឬដោយប្រយោលជាមួយអ្នកឆ្លងជំងឺនោះ ។
អំណោយជាគ្រឿងឧបភោគបរិភោគ ក្នុងមួយគ្រួសារទទួលបាន អង្ករ៥០គ.ក្រ ទឹកសុទ្ឋ១កេស មី១កេស ត្រីខ៤កំប៉ុង ទឹកស៊ីអ៉ីវ១យួរ ទឹកត្រី១យួរ អំបិល១គ.ក្រ ស្ករស១គ.ក្រ និងថវិកា ៥ម៉ឺនរៀល ។
លោក សាម ឡន ចៅសង្កាត់សាលាកំរើកក្រុងសៀមរាប បានមានប្រសាសន៍ថ្លែងអំណរព្រះគុណនូវការយកព្រះទ័យទុកដាក់របស់ព្រះសង្ឃ និងគណៈកម្មការវត្តនេះ សម្រាប់ជួយសម្រួលដោះស្រាយការលំបាកដល់បងប្អូនប្រជាពលរដ្ឋដែលត្រូវបានបិទខ្ទប់ និងមិនអាចចេញទៅណាបានដោយសារតែវិបត្តិនៃជំងឺកូវីដ-១៩ ស្របពេលបងប្អូនប្រជាពលរដ្ឋក្នុងសង្កាត់នេះមួយចំនួនពួកគាត់ពិតជាជួបការលំបាកក្នុងជីវភាពមែន ទាំងការងារ និងកិច្ចការជួញដូរផ្សេងៗ របស់ពួកគាត់ខ្លះត្រូវបានផ្អាក ឬមិនដំណើរការ ចំណូលគ្រួសារតិច ជាដើម ។ តែយ៉ាងណាក៍សង្កាត់នេះ ទទួលបានស្បៀងអាហារពីសប្បុរសជននានាទោះតិចក្តីច្រើនក្តី យកមកឧបត្ថម្ភជូនដល់ពួកគាត់ដែរជាបន្តបន្ទាប់ ម្តងគ្រួសារនេះម្តងគ្រួសារនោះ ជាដើម។
លោកចៅសង្កាត់ បានណែនាំដល់គ្រួសារកំពុងជាប់ចត្តាឡីស័កសូមអនុវត្តឱ្យបានខ្ជាប់ខ្ជួនទៅតាមការកំណត់ កុំចេញទៅណារហេតរហូតចៀសវាងមានបញ្ហាផ្សេងៗ ។ ព្រះគ្រូមុនីបញ្ញាញាណ ស៊ុម ពិសិទ្ធិ ព្រះសមុហ៍គណខេត្ត និងជាព្រះចៅអធិការវត្តប្រាសាទចន្ទរង្សី ហៅវត្តគោកចាន់ ឃុំអំពិល ស្រុកប្រាសាទបាគង បានបង្ហាញនូវព្រះទ័យព្រួបារម្ភសុខទុក្ខរបស់បងប្អូនប្រជាពលរដ្ឋក្នុងទូទាំងខេត្តសៀមរាបជាមួយនឹងការប្រឈមទៅនឹងវិបត្តិជំងឺកូវីដ-១៩ ទុក្ខលំបាករបស់ប្រជាពុទ្ឋបរិស័ទក៍ជាទុក្ខលំបាករបស់ព្រះសង្ឃដែរ ព្រោះថា ព្រះសង្ឃអាស្រ័យភោជន និងចតុបច្ច័យពីប្រជាពុទ្ឋបរិស័ បើពួកគាត់ជួបទុក្ខលំបាកហើយព្រះសង្ឃក៍មិនអាចនៅស្ងៀមបានគឺតែងតែប្រមូលគៀរគរសម្ភារស្បៀងអាហារយកមកចែកជូនទៅតាមលទ្ឋភាពដែលក្រុមព្រះសង្ឃមាន ។
ព្រះអង្គបានអំពាវនាវឱ្យប្រជាពលរដ្ឋរួមគ្នាអនុវត្តឱ្យបានខ្ជាប់ខ្ជួននូវសេចក្តីណែនាំរបស់រដ្ឋបាលខេត្ត សេចក្តីអំពាវនាវនានា របស់ក្រសួងសុខាភិបាល និងវិធានការរបស់រាជរដ្ឋាភិបាល ៣ការពារ និង៣កុំ ក្នុងការទប់ស្កាត់ដល់ការឆ្លងជំងឺកូវីដ១៩ ត្រូវប្រកាន់ខ្ជាប់នូវការរក្សា សំអាតអនាម័យស្អាត ត្រូវពាក់ម៉ាស់ឱ្យបានត្រឹមត្រូវ លាងដៃជាមួយសាប៊ូ អាល់កុល ឬជែល និងត្រូវរក្សាគម្លាតសុវត្ថិភាពសង្គម ជាដើម ។
អត្ថបទ និងរូបភាព៖ លោក យូ វង្ស
