យុទ្ធនាការចែកថ្នាំ លៀនហ័រ ឈីងវីន ជាអំណោយរបស់ប្រទេសចិន ជូនដល់រាជរដ្ឋាភិបាលកម្ពុជា សម្រាប់ចែកជូនដល់ប្រជាពលរដ្ឋកំពុងរស់នៅក្នុងតំបន់ក្រហមនៃក្រុងសៀមរាប រួមមាន ៖ ភូមិសាស្រ្តសង្កាត់ស្លក្រាម , សង្កាត់ស្វាយដង្គំ , សង្កាត់គោកចក , សង្កាត់ជ្រាវ , ភូមិតាវៀន ក្នុងសង្កាត់សាលាកំរើក និង ភូមិព្រៃធំ ភូមិស្រង៉ែ ក្នុងសង្កាត់ស្រង៉ែ ត្រូវបានរដ្ឋបាលខេត្តសៀមរាប ប្រកាសឲ្យអនុវត្តកាលពីថ្ងៃទី១៩ ខែកញ្ញា ឆ្នាំ២០២១នេះ បន្ទាប់ពីឱសថទាំងនេះ ត្រូវ បានបញ្ជូនមកដល់ខេត្តសៀមរាប តាមរយៈនៃការបែងចែករបស់ក្រសួងសុខាភិបាល ។
លោក ទិត សុខុម ប្រធានភូមិត្រពាំងសេះ នៃសង្កាត់គោកចក ក្រុងសៀមរាប បានឲ្យដឹងថា ខណៈពេលដែលលោកបានដឹកនាំក្រុមការងារ ក្នុងយុទ្ធនាការចែកឱសថទាំងនេះ តាមខ្នងផ្ទះជូនដល់ដៃប្រជាពលរដ្ឋដោយផ្ទាល់ អ្នកជំនាញវេជ្ជសាស្ត្រនៃមន្ទីរសុខាភិបាលខេត្ត បានពន្យល់បញ្ជាក់ថា ឱសថនេះជាប្រភេទថ្នាំព្យាបាលជំងឺដែលមានអាការៈក្តៅខ្លួន ក្អក ឈឺបំពង់ក និងការពារការរលាកសួតជាដើម អាចថាជាថ្នាំព្យាបាលជម្ងឺផ្តាសាយ ដែលអាការៈទាំងនេះ វាដូចគ្នាទៅនឹងអាការៈសង្ស័យនៃជំងឺកូវីដ-១៩ វាមិនមែនជាថ្នាំព្យាបាលជំងឺកូវីដ-១៩នោះទេ តែវាមានគុណប្រយោជន៍ដល់ការកាត់បន្ថយហានីភ័យ នៃការឆ្លងជំងឺកូវីដ-១៩ក្នុងសហគមន៍។
លោក ទិត សុខុម បានឲ្យដឹងទៀតថា យុទ្ធនាការនេះគឺជាសកម្មភាពតែមួយក្នុងតំបន់ក្រហមនៃក្រុងសៀមរាប ដែលពិតជាត្រូវបានខិតខំជំរុញការចែកថ្នាំនេះនៅបណ្តាគ្រប់ភូមិ-សង្កាត់ទាំងអស់ ឲ្យបានលឿន ឆាប់រហ័សដល់ដៃប្រជាពលរដ្ឋអ្នកប្រើប្រាស់ ហើយតាមរយៈនៃការផ្តល់ឱសថនេះ ក្នុងនាមប្រជាពលរដ្ឋ លោកសង្ឃឹមថា តំបន់ក្រហមនឹងត្រូវដកចេញពីក្រុងសៀមរាបក្នុងពេលឆាប់ៗនេះ ហើយអ្វីដែលចងចាំមិនអាចបំភ្លេចបាន គឺឧបការគុណដ៏ធំធេងសម្តេចតេជោប្រមុខនៃរាជរដ្ឋាភិបាលកម្ពុជា ជាស្ថាបនិកយុទ្ធសាស្រ្តកម្ពុជា ប្រយុទ្ធប្រឆាំងជំងឺកូវីដ-១៩ ។
លោកស្រី លី វណ្ណៈ មន្រ្តីមន្ទីរសុខាភិបាលនៃរដ្ឋបាលខេត្តសៀមរាប បានឲ្យដឹងថា ឱសថ លៀនហ័រ ឈីងវីននេះ ត្រូវបាននាំបញ្ចេញពីឃ្លាំងឱសថរបស់មន្ទីរសុខាភិបាលនៃរដ្ឋបាលខេត្ត ទៅកាន់មូលដ្ឋានគោលដៅតាំងតែពីថ្ងៃទី១៧ ខែកញ្ញា ឆ្នាំ២០២១ម៉្លេះ ហើយស្រុកពួក អាចជាគោលដៅបញ្ជូនឱសថទាំងនេះផងដែរ ។
គួររំលឹកថា ក្នុងឱកាសបើកយុទ្ធនាការចាក់វ៉ាក់សាំងបង្ការជំងឺកូវីដ-១៩ ជូនកុមារអាយុ ៦ឆ្នាំ ដល់១២ឆ្នាំ នៅវិមានសន្តិភាព កាលពីព្រឹកព្រឹកថ្ងៃទី១៧ ខែកញ្ញា ឆ្នាំ២០២១នេះ សម្តេចតេជោ ហ៊ុន សែន នាយករដ្ឋមន្ត្រីកម្ពុជា បានមានប្រសាសន៍ថា សម្រាប់សង្កាត់ចំនួន៤ ស្ថិតក្នុងក្រុងសៀមរាប ខេត្តសៀមរាប ដែលត្រូវបានកំណត់ជាតំបន់ក្រហមនោះ គឺមិនបាច់ធ្វើតេស្តលើប្រជាពលរដ្ឋរកមេរោគកូវីដ-១៩ទេ ដោយត្រូវដាក់ថ្នាំព្យាបាលឲ្យគាត់ពិសារថ្នាំហ្នឹងទៅ ព្រោះពេលនេះបានដឹកជញ្ជូនទៅហើយ ដោយចាត់ទុកថា ពួកគាត់សង្ស័យមានមេរោគកូវីដ-១៩នេះ ហើយរង់ចាំក្នុងរយៈពេលមួយសប្ដាហ៍ក្រោយ សឹមរៀបចំការយកសំណាកធ្វើតេស្តរកមេរោគកូវីដ-១៩ពីពួកគាត់ ពីព្រោះពួកគាត់គ្មានរោគសញ្ញាអ្វីសោះ លើកលែងតែពួកគាត់មានរោគសញ្ញាឈឺ ចាំយកមកពេទ្យ៕
អត្ថបទ និង រូបថត ៖ លោក ងិន គឹមឡេង
កែសម្រួលអត្ថបទ ៖ លោក លីវ សាន្ត
