កាលពីថ្ងៃទី២០ ខែកញ្ញា ឆ្នាំ២០២១ម្សិលមិញនេះ លោក ទា គឹមសុទ្ឋ ប្រធានមន្ទីរកសិកម្ម រុក្ខាប្រមាញ់និងនេសាទខេត្តសៀមរាប បានដឹកនាំមន្ត្រីជំនាញក្រោមឱវាទ ចុះអនុវត្តវិធានជីវៈសុវត្ថិភាព ដោយការបាញ់ថ្នាំសម្លាប់មេរោគ នៅតាមកសិដ្ឋានចិញ្ចឹមសត្វពាហនៈ សត្តឃាតដ្ឋាន និង ក្រោលសត្វនានានៅតាមសហគមន៍ចិញ្ចឹមសត្វពាហនៈក្នុងសង្កាត់ជ្រាវ ក្រុងសៀមរាប។
លោក ព្រំ វិច ប្រធានការិយាល័យផលិតកម្មនិងបសុព្យាបាល នៃមន្ទីរកសិកម្ម រុក្ខាប្រមាញ់ និងនេសាទខេត្តសៀមរាប បានមានប្រសាសន៍ថា ជារៀងរាល់ឆ្នាំនៅពេលរដូវវស្សាចូលមកដល់ហើយនោះ មន្ទីរតែតងតែរៀបចំផែនការចុះបាញ់ថ្នាំសម្លាប់មេរោគសត្វពាហនៈ ដែលជាផ្នែកមួយជួយទប់ស្កាត់នៃជំងឺឆ្លងទៅដល់សត្វ និងការពារសុខភាពសត្វ ដោយសាររដូវវស្សាចូលមកដល់សត្វពាហនៈ និងសត្វចិញ្ចឹមផ្សេងៗងាយរងទទួលនូវការឈឺ និងស្លាប់ដោយសារមេរោគ និងបាក់តេរីផ្សេងៗ ដែលតែងតែបង្កឱ្យសត្វមានសុខភាពខ្សោយ ងាយរងនូវអំងឺឆ្លងផ្សេងៗ ហេតុនេះហើយទាមទារត្រូវធ្វើនូវវិធានការសុវត្ថិភាពដោយការបាញ់ថ្នាំរម្ងាប់មេរោគទាំងនៅតាមក្រោល និងនៅតាមសត្តឃាត្តដ្ឋាននានា ដើម្បីធានាបាននូវសាច់សត្វបោះទៅកាន់ទីផ្សារមានគុណភាព និងមានអនាម័យល្អសម្រាប់អ្នកបរិភោគ។
លោក ព្រំ វិច មានប្រសាសន៍ទៀតថា ការថែទាំសុខភាពសត្វមិនមែនអាស្រ័យលើការបាញ់ថ្នាំតែម្យ៉ាងនេះទេ គឺទាមទារឱ្យអ្នកចិញ្ចឹមសត្វរៀបចំកន្លែងសត្វរស់នៅឱ្យបានស្អាត មានច្បាររបងត្រឹមត្រូវ បោសសំអាត ទ្រុងឬក្រោលជារៀងរាល់ថ្ងៃ ។ល។ ធ្វើយ៉ាងណាឱ្យមានអនាម័យល្អទាំងក្នុងនិងក្រៅក្រោលឬទ្រុង ដើម្បីផ្តល់បរិយាកាសឱ្យសត្វមានសុខភាពល្អចៀសផុតពីជំងឺ ហើយមុនពេលចាប់ផ្តើមបាញ់ថ្នាំសម្លាប់មេរោគនេះ មន្ទីរក៏បានជូនដំណឹង និងជម្រាបដល់បងប្អូនប្រជាកសិករ ឲ្យអនុវត្តវិធានជីវៈសុវត្ថិភាព ព្រោះវាមានសារៈសំខាន់ណាស់ក្នុងដំណើរការចិញ្ចឹមសត្វ ទប់ស្កាត់ ការឆ្លងជំងឺ សម្លាប់ភ្នាក់ងារចម្លងមេរោគ កាត់បន្ថយក្លិន ទីតាំងចិញ្ចឹមស្អាត ធ្វើឲ្យសត្វមានសុខភាពល្អ និងធំធាត់លឿន។
លោកប្រធានការិយាល័យផលិតកម្មនិងបសុព្យាបាល មានប្រសាសន៍បន្ថែមថា យើងមានភ្នាក់ងារសុខភាពសត្វភូមិ ពេទ្យសត្វភូមិ មន្ត្រីបសុពេទ្យស្រុក និងអាជ្ញាធរមូលដ្ឋាន ដែលតែងតែបានទំនាក់ទំនងសហការផ្តល់ឱ្យគ្នាទៅវិញទៅមកនូវព័ត៌មានផ្សេងៗអំពីសត្វ ដូច្នេះប្រសិនបើបងប្អូនអ្នកចិញ្ចឹមសត្វទាំងអស់ មានសត្វឈឺឬស្លាប់ដោយសារជំងឺ សូមប្រញ៉ាប់រាយការណ៍ទៅមន្ត្រីជំនាញនិងអាជ្ញាធរមូលដ្ឋាននៅក្បែរផ្ទះ ហើយបើចង់បានថ្នាំបាញ់សម្លាប់មេរោគនៅតាមកសិដ្ឋាន ក្រោលឬទ្រុងរបស់ខ្លួន សូមទាក់ទងទៅមន្ត្រីកសិកម្មស្រុក ឬទាក់ទងទៅកាន់ការិយាល័យផលិតកម្មនិងបសុព្យាបានៃមន្ទីរកសិកម្មខេត្ត ដើម្បីទទួលបានថ្នាំសម្លាប់មេរោគ ដោយមិនបង់កម្រៃឡើយ៕
អត្ថបទ និង រូបថត ៖ លោក យូ វង្ស
កែសម្រួលអត្ថបទ ៖ លោក លីវ សាន្ត
