បន្ទាប់ពីអវត្តមាន និងបាត់មុខមួយរយៈពីទឹកដីមាតុភូមិជាច្រើនមកនេះ លោក ប៉ែន ផាត កីឡាករឆ្នើមប្រចាំព្រះរាជាណាចក្រកម្ពុជា និងជាកីឡាករបាល់ទាត់ជម្រើសជាតិពាក់កណ្តាលទសវត្ស ៥០និង៧០ បានអញ្ជើញចូលជួបសំដែងការគួរ និងបង្ហាញពីក្តីនឹករលឹក ជាមួយឯកឧត្តម ខៀវ កាញារីទ្ធ រដ្ឋមន្រ្តីក្រសួងព័ត៌មាន នៅព្រឹកថ្ងៃទី២១ ខែកញ្ញា ឆ្នាំ២០២១ នាទីស្តីការក្រសួងព័ត៌មាន។
លោក ប៉ែន ផាត បានសំដែងការរីករាយដោយបានមកកាន់ទឹកដីកំណើតខ្លួនវិញនៅក្នុងវ័យ ៧៤ឆ្នាំនេះ បន្ទាប់ពីបានទៅរស់នៅក្រៅប្រទេសជាច្រើនឆ្នាំមកហើយ។ តាមប្រវត្តិក្នុងវិស័យកីឡាបាល់ទាត់ លោក ប៉ែន ផាត បានចូលហាត់លេងបាល់តាំងពីអាយុ ១៥ឆ្នាំមកម្ល៉េះ រហូតបានក្លាយជាកីឡាករជម្រើសជាតិកម្ពុជា ដោយធ្វើការប្រកួតជាលក្ខណះអន្តរជាតិ ក្នុងស្រុក និងបន្តទៅលេងនៅក្រៅប្រទេសជាច្រើនប្រកួត ដោយបាននាំយកនូវលទ្ធផលល្អមកជូនប្រទេសជាតិ និងប្រជាជនកម្ពុជា។ តាមការបញ្ជាក់របស់ លោក ប៉ែន ផាត គឺនៅឆ្នាំ១៩៧២ រូបលោកបានចេញទៅលេងអោយក្លឹបកីឡាបាល់ទាត់ល្បីមួយក្នុងប្រទេសថៃ ដោយបានឈ្នះពានរង្វាន់ធំៗចំនួន ៦ពាននៅថៃ ក្នុងរយៈពេល ៣ឆ្នាំជាប់ៗគ្នា។ បន្ទាប់ពីបានលេងនៅក្លឹបក្នុងប្រទេសថៃរួចមក នៅក្នុងឆ្នាំ១៩៧៧ លោក ប៉ែន ផាត ក៏បានទៅលេងអោយក្លឹបកំពូលបាល់ទាត់នាប្រទេសបាំងថែមទៀតផង។ ដូច្នេះការដែលលោក ប៉ែន ផាត ត្រឡប់មកកម្ពុជានាពេលនេះ គឺមានភារកិច្ចការងារផ្ទាល់ខ្លួន និងគម្រោងជួយបណ្តុះបណ្តាលកីឡាករកម្ពុជាវ័យក្មេង ដែលស្រលាញ់វិស័យកីឡាបាល់ទាត់ហើយចេះគោរពវិន័យ និងប្រឹងប្រែង ហាត់រៀនអោយពូកែ ដើម្បីរួមចំណែកលើកកម្ពស់វិស័យកីឡាបាល់ទាត់នៅកម្ពុជាបានកាន់តែរីកចំរើន និងមានភាពល្បីល្បាញក្នុងឆាកអន្តរជាតិ។
ឯកឧត្តម រដ្ឋមន្រ្តី ខៀវ កាញារីទ្ធ បានសំដែងនូវការរីករាយ ដោយបានឃើញវត្តមានកីឡាជម្រើសជាតិដ៏ល្បីកាលពីជំនាន់មុន គឺលោក ប៉ែន ផាត មកកាន់កម្ពុជានាពេលនេះ ហើយសង្ឃឹមថា លោកនឹងមានពេលវេលារួមទាំងកំលាំងកាយចិត្ត មកជួយដល់វិស័យកីឡាបាល់ទាត់នៅក្នុងប្រទេសកម្ពុជា អោយមានភាពរីកចំរើនបន្ថែមទៀត។
តមកនៅរសៀលថ្ងៃដដែលនេះឯកឧត្តម រដ្ឋមន្រ្តី ខៀវ កាញារីទ្ធ អនុញ្ញាតឱ្យលោក ពេជ្រ ប៊ុនសាយ តំណាងស្ថាបនិក វេទិកាយុវអ្នកសារព័ត៌មានកម្ពុជា ហៅកាត់ថា CYJF និងសហការី ចូលជួបសម្តែងការគួរសម ដោយក្នុងឱកាសនោះ ថ្នាក់ដឹកនាំ និងក្រុមការងារបានគោរពសុំអនុសាសន៍ពីឯកឧត្តម រដ្ឋមន្រ្តី ដើម្បីអនុវត្តការងារក្នុងវិស័យព័ត៌មានឱ្យកាន់តែមានប្រសិទ្ធភាព។
តាមការបញ្ជាក់របស់លោក ពេជ្រ ប៊ុនសាយ បានលើកឡើងថា វេទិកាយុវអ្នកសារព័ត៌មានកម្ពុជា ដែលបានប្រមូលផ្តុំយុវជនបំពេញការងារនៅក្នុងវិស័យព័ត៌មានមកជួបគ្នាផ្លាស់ប្តូរបទពិសោធន៏ និងជួយបណ្តុះបណ្តាលយុវជនជំនាន់ក្រោយ ដើម្បីអោយមានសមត្ថភាព វិជ្ជាជីវៈ ក្រមសីលធម៏ ក្នុងការបំពេញកិច្ចការងារលើវិស័យព័ត៌មានបានល្អប្រសើរ។
ឯកឧត្តម រដ្ឋមន្រ្តី ខៀវ កាញារីទ្ធ បានសំដែងនូវការគាំទ្រ ចំពោះសកម្មភាពការងាររបស់ថ្នាក់ដឹកនាំ សមាជិក សមាជិកា វេទិកាយុវអ្នកសារព័ត៌មានកម្ពុជា និងឯកភាព អោយមន្រ្តីជំនាញពិនិត្យចំពោះសំណើរសុំបង្កើតសមាគមសារព័ត៌មានមួយ ឈ្មោះថា វេទិកាយុវអ្នកសារព័ត៌មានកម្ពុជា។ តាមរយះនេះ ឯកឧត្តម រដ្ឋមន្ត្រី បានជម្រុញលើកទឹកចិត្តអោយអ្នកសារ ព័ត៌មានទាំងអស់ ត្រូវបង្កើននូវសមត្ថភាព និងជំនាញរបស់ខ្លួន អោយក្លាយទៅជាអ្នកសារសរសេរអត្ថបទវិភាគធំៗ ហើយសម្រាប់អត្ថបទដែលបានសរសេរត្រូវបានគេអោយតំលៃ ហើយពេលនោះ តំលៃនៃអ្នកសារព័ត៌មានក៏ត្រូវបានលើកតម្កើងផងដែរ៕
#ទូរទស្សន៍ជាតិកម្ពុជា
