អាជ្ញាធរស្រុកបន្ទាយស្រី នៅថ្ងៃទី២១ ខែកញ្ញា ឆ្នាំ២០២១នេះ បានសម្រេចបិទ ផ្សារបន្ទាយស្រី ក្នុងស្រុកបន្ទាយស្រី រយៈពេល២សប្តាហ៍ គិតចាប់ពីថ្ងៃទី២១ ខែកញ្ញាតទៅ ដើម្បីទប់ស្កាត់ជំងឺកូវីដ-១៩ មិនឱ្យឆ្លងរាលដាលទ្រង់ទ្រាយធំចូលទៅក្នុងសហគមន៍ និងតំបន់ផ្សេងទៀតនៅក្នុងស្រុកបន្ទាយស្រី បន្ទាប់ពីរកឃើញអាជីវករក្នុងផ្សារមួយនេះជាង២០នាក់ បានវិជ្ជមានជំងឺកូវីដ-១៩។
បើតាមលោក ឃឹម ហ្វីណង់ អភិបាលស្រុកបន្ទាយស្រី បានឲ្យដឹងថា បន្ទាប់ពីទទួលបានព័ត៌មានកាលពីថ្ងៃទី២០ ខែកញ្ញា ឆ្នាំ២០២១កន្លងទៅ មានអាជីវករនៅក្នុងផ្សារបន្ទាយស្រីពីរនាក់ប្តីប្រពន្ធ ត្រូវបានរកឃើញមានវិជ្ជមានកូវីដ-១៩ ក្រោយពេលទៅពិនិត្យជំងឺនៅក្នុងគ្លីនិកឯកជនមួយនៅក្នុងក្រុងសៀមរាបរួចមក ក្រុមការងារស្រាវជ្រាវរបស់ស្រុកបន្ទាយស្រី ក៏បានកំណត់មុខសញ្ញាដែលបានប៉ះពាល់ផ្ទាល់នឹងអ្នកទាំងពីរនេះភ្លាមៗ និងបានសម្រេចធ្វើតេស្តយកសំណាកលើអាជីវករទាំងអស់ជាង២០០នាក់ នៅក្នុងផ្សារបន្ទាយស្រីទាំងមូល ជាលទ្ធផលត្រូវបានរកឃើញវិជ្ជមានសរុប ២៤នាក់។
លោក ឃឹម ហ្វីណង់ ជាមួយការរកឃើញនេះទើបរដ្ឋបាលស្រុកបន្ទាយស្រី បានរៀបចំបិទផ្សារបន្ទាយស្រីភ្លាមៗ ព្រមទាំងបន្តយកសំណាកលើអ្នកពាក់ព័ន្ធនឹងអ្នកវិជ្ជមាន ទាំង២៤នាក់នេះបន្ថែមទៀត ធ្វើយ៉ាងណាហ៊ុមព័ទ្ធការឆ្លងរាលដាលនៅក្នុងសហគមន៍ឱ្យខាងតែបាន ទោះបីជាត្រូវចត្តាឡីស័កមនុស្សរាប់រយគ្រួសារក៏ដោយ។ ជាមួយគ្នានោះអាជ្ញាធរស្រុកបន្ទាយស្រី នឹងរៀបចំទីកន្លែងលក់បន្លែត្រីសាច់ និងរបស់របរចាំបាច់ប្រចាំថ្ងៃមួយចំនួនទៀតនៅទីតាំងថ្មីមួយ ដែលមានរក្សាគម្លាតសុវត្ថិភាពត្រឹមត្រូវ និងមិនបង្កហានិភ័យឆ្លងបន្តដល់អ្នកភូមិ។ ចំពោះអ្នកលក់បន្លែត្រីសាច់នៅក្នុងតំបន់ថ្មីនេះ នឹងតម្រូវឱ្យធ្វើតេស្តយកសំណាក និងមានលទ្ធផលអវិជ្ជមានជាមុនសិន ព្រមទាំងមានពាក់ស្លាកសញ្ញាសម្គាល់ត្រឹមត្រូវ និងស្ថិតក្រោមការគ្រប់គ្រងយ៉ាងតឹងរ៉ឹងពីសំណាក់រដ្ឋបាលស្រុក។
លោកអភិបាលស្រុក ក៏បានស្នើសុំការយោគយល់ចំពោះផលប៉ះពាល់ ដែលកើតចេញពីវិធានការបន្ទាន់មួយនេះ និងសូមធ្វើការអំពាវនាវដល់បងប្អូនប្រជាពលរដ្ឋ នៅក្នុងស្រុកទាំងអស់ ជាពិសេសអ្នករស់នៅជុំវិញផ្សារបន្ទាយស្រី ដែលគិតថាខ្លួនមានជាប់ពាក់ព័ន្ធជាមួយករណីខាងលើ មេត្តាដាក់ខ្លួនឲ្យនៅដាច់ដោយឡែករយៈពេល១៤ថ្ងៃ ហើយប្រសិនបើមានអាការៈមិនស្រួលខ្លួន ឬសង្ស័យ សូមប្រញាប់ទៅធ្វើតេស្តរកមេរោគជាប្រញាប់នៅមណ្ឌលសុខភាពបន្ទាយស្រីផ្ទាល់តែម្តង៕
អត្ថបទ និង រូបភាព៖ លោក ជា ស្រស់
