កាលពីរសៀលថ្ងៃទី២១ ខែកញ្ញា ឆ្នាំ២០២១ម្សិលមិញនេះ ឯកឧត្តម ទៀ សីហា អភិបាលនៃគណៈអភិបាលខេត្តសៀមរាប បានដឹកនាំកិច្ចប្រជុំតាមរយៈប្រព័ន្ធ OnLine មួយ ស្ដីការគ្រប់គ្រងការឆ្លងរាលដាលនៃជំងឺកូវីដ-១៩ ក្នុងភូមិសាស្ត្រខេត្តសៀមរាប ដោយមានការអញ្ជើញចូលរួមពីសំណាក់លោក លោកស្រី ជាអភិបាលរងខេត្ត ថ្នាក់ដឹកនាំមន្ទីរ អង្គភាពនានាក្នុងខេត្ត អភិបាលក្រុង និង ចៅសង្កាត់នៃក្រុងសៀមរាប ដែលស្ថិតក្នុងតំបន់បិទខ្ទប់។
ឯកឧត្តម ទៀ សីហា អភិបាលខេត្តសៀមរាប មានប្រសាសន៍ថា កិច្ចប្រជុំនេះពិតជាមានសារៈសំខាន់ខ្លាំងណាស់ ដើម្បីពិភាក្សារួមគ្នា ពិនិត្យលើការងារទប់ស្កាត់ការឆ្លងរាលដាលនៃជំងឺកូវីដ-១៩ ក្នុងភូមិសាស្ត្រខេត្តសៀមរាប ហើយរាល់មតិយោបល់របស់លោក លោកស្រីក្នុងកិច្ចប្រជុំនេះ គឺជាធាតុចូលយ៉ាងសំខាន់និងជាបទពិសោធន៍មួយ ដើម្បីលើកជាផែនការអនុវត្តបន្ត ធានាដល់ប្រសិទ្ធភាពនៃការគ្រប់គ្រងការឆ្លងរាលដាលនៃជំងឺនេះនៅក្នុងសហគមន៍ និង ចេញពីតំបន់មួយទៅតំបន់មួយផ្សេងទៀត ។
ឯកឧត្តមមានប្រសាសន៍ទៀតថា ក្នុងក្រុងសៀមរាបមានសង្កាត់ចំនួន៤ និងភូមិចំនួន៣នៃសង្កាត់ចំនួន២ផ្សេងទៀត ត្រូវបានជាតំបន់ក្រហមដែលនឹងត្រូវផុតកំណត់នៅថ្ងៃទី២២ ខែកញ្ញា នេះ ប៉ុន្តែមុននឹងដកចេញពីតំបន់ក្រហម យើងគួរបង្កើតក្រុមការងារមួយ ដើម្បធ្វើការស្រាវជ្រាវ ពិនិត្យស្ថានភាព ណែនាំនិងសង្កេតឱ្យបានហ្មត់ចត់ និងច្បាស់លាស់បន្ថែមទៀត ដោយអនុវត្តតាមវិធានការរដ្ឋបាល និងគោលការណ៍ច្បាប់ ទៅលើភោជនីយដ្ឋាន , អាជីវកម្មដ្ឋាន , ទីផ្សារ , កន្លែងធ្វើការ និង គ្រឹះស្ថានឯកជននានា ថាតើគាត់បានកែប្រែហេដ្ឋារចនាសម្ព័ន្ឋ ឬអនុវត្តតាមវិធានការណែនាំរបស់រដ្ឋបាលខេត្តហើយឬនៅ បើបានអនុវត្តតាមហើយទើបអនុញ្ញាតឱ្យបើកអាជីវកម្មឡើងវិញ ប៉ុន្តែបើមិនអនុវត្តតាមទេ អាជីវកម្មដ្ឋាននោះប្រឈមនឹងការបិទ និងឈានទៅដកហូតអាជ្ញាប័ណ្ណទៀតផង ពោល គឺរួមគ្នាទប់ស្កាត់ការឆ្លងនិងរៀនរស់តាមគន្លងថ្មីនៃវិបត្តិដោយសារជំងឺកូវីដ-១៩ ។
ព័ត៌មានជាតិ ថ្មីៗ
ក្នុងឱកាសនោះដែរ ឯកឧត្តម ទៀ សីហា បានណែនាំដល់រដ្ឋបាលខេត្តនិងរដ្ឋបាលក្រុង ត្រូវត្រៀមលក្ខណៈជាលាយល័ក្ខអក្សរនូវចំណុចសំខាន់ៗ ពីល័ក្ខណ្ឌមួយចំនួននៃតំបន់ក្រហម គឺ ប្រមូលទិន្នន័យអ្នកឆ្លងនៅតាមភូមិឬសង្កាត់ ដោយយកចំនួនសរុបអ្នកមកពិនិត្យសំណាក ទៅប្រៀបធៀបជាមួយទិន្នន័យ នៃអ្នកវិជ្ជមានក្នុងភូមិឬសង្កាត់ ហើយបើពិនិត្យឃើញលើស១០ភាគរយ គឺដាក់ក្នុងតំបន់ក្រហម នេះគឺជាគោលការណ៍របស់ក្រសួងសុខាភិបាល ហើយអាជ្ញាធរត្រូវតាមដានពីស្ថានភាព និងវិភាគឱ្យបានច្បាស់លាស់ពីប្រជាពលរដ្ឋនៅក្នុងភូមិ សង្កាត់ដែលបិទខ្ទប់ និងត្រូវត្រៀមបំរុងស្បៀងអាហារសម្រាប់ប្រជាពលរដ្ឋក្រីក្រីខ្វះខាត និងការចែកថ្នាំព្យាបាលនៅក្នុងតំបន់ក្រហម ពិសេស អាជ្ញាធរមូលដ្ឋាន ត្រូវប្រុងប្រយ័ត្នផងដែរមុននឹងទទួលសម្ភារអំណោយពីអង្គការក្រៅរដ្ឋាភិបាលនានា យកទៅចែកជូនប្រជាពលរដ្ឋ នៅក្នុងតំបន់ក្រហម ហើយបើមិនបានឆ្លងការឯកភាពពីអាជ្ញាធរសង្កាត់និងរដ្ឋបាលក្រុងទេ គឺហាមទទួលដាច់ខាត។
ជាមួយគ្នានេះដែរឯកឧត្តមអភិបាលខេត្តសៀមរាប បានស្នើទៅមន្ទីរសុខាភិបាលនិងអាជ្ញាធរមូលដ្ឋាន ត្រូវសហការគ្នាបង្កើតជាក្រុមពេទ្យ ដើម្បីត្រៀមឆ្លើយតបទៅនឹងសំណូមពរពីប្រជាពលរដ្ឋ ក្នុងពេលដែលគាត់មានអាការៈមិនស្រួលខ្លួន ដែលពួកគាត់មានឈ្មោះនៅក្នុងបញ្ជីឈ្មោះពីក្រុមការងារស្រាវជ្រាវជំងឺកូវីដ-១៩ នៃអ្នកពាក់ព័ន្ឋដោយផ្ទាល់ ឬដោយប្រយោល ដើម្បីនាំគាត់ទៅព្យាបាលឈានទៅកាត់ផ្តាច់នៃការចម្លងទៅក្នុងក្រុមគ្រួសារគាត់៕
អត្ថបទ ៖ លោក យូ វង្ស
កែសម្រួលអត្ថបទ ៖ លោក លីវ សាន្ត
