នៅព្រឹកថ្ងៃទី ២២ ខែកញ្ញា ឆ្នាំ២០២១ ឯកឧត្ដម គុជ លីណា អនុប្រធានគណៈកម្មាធិការសាខាកាកបាទក្រហមកម្ពុជាខេត្តសៀមរាប តំណាងដ៏ខ្ពង់ខ្ពស់ឯកឧត្តម ទៀ សីហា ប្រធានគណៈកម្មាធិការសាខា បានដឹកនាំយុវជនកាកបាទក្រហមកម្ពុជា ចំនួន៤០នាក់ សហការជាមួយរដ្ឋបាលខេត្ត និងសហភាពសហព័ន្ធយុវជនកម្ពុជាខេត្ត ចុះចែកជូនសាច់ជ្រូកដល់បងប្អូនប្រជាពលរដ្ឋងាយរងគ្រោះបំផុត នៅភូមិចំនួន១១ ក្នុងសង្កាត់សង្កាត់ស្លក្រាម , សង្កាត់គោកចក ,សង្កាត់ស្វាយដង្គំ និង សង្កាត់ជ្រាវ ដែលកំណត់ដាក់ជា តំបន់ក្រហម នៃការរីករាលដាលជំងឺកូវីដ-១៩។
ឯកឧត្ដម គុជ លីណា មានប្រសាសន៍ថា ដោយមានការយកចិត្តទុកដាក់ខ្ពស់ពីសំណាក់ឯកឧត្តម ទៀ សីហា ប្រធានគណៈកម្មាធិការសាខាកាកបាទក្រហមកម្ពុជាខេត្តសៀមរាប ថ្ងៃនេះសាខាកាកបាទក្រហមកម្ពុជាខេត្ត បានដឹកនាំកម្លាំងយុវជនកាកបាទក្រហមកម្ពុជា ចំនួន៤០នាក់ ចុះចែកជូនសាច់ជ្រូកដល់ប្រជាពលរដ្ឋងាយរងគ្រោះបំផុតដែលស្ថិតនៅក្នុងតំបន់ក្រហម ដើម្បីជួយដោះស្រាយនូវការលំបាករបស់ពួកគាត់ ។
ឯកឧត្ដម គុជ លីណា មានប្រសាសន៍ទៀតថា ក្នុងនាមជាជំនួយការឱ្យអាជ្ញាធរសាធារណៈលើវិស័យមនុស្សធម៌កាកបាទសក្រហមកម្ពុជា តែងចូលរួមយ៉ាងសកម្មជាមួយរាជរដ្ឋាភិបាល និងអាជ្ញាធរមូលដ្ឋានលើការងារមនុស្សធម៌ ដូច្នេះសកម្មភាពការងាររបស់ប្អូនៗយុវជនកាកបាទក្រហមកម្ពុជា ដែលចូលរួមសកម្មភាពមនុស្សធម៌នៅថ្ងៃនេះ គឺក្នុងនាមយើងជាជំនួយការឱ្យអាជ្ញាធរសាធារណៈក្នុងវិស័យមនុស្សធម៌ ដែលត្រូវចូលរួមឱ្យសកម្ម និងអស់ពីកម្លាំងកាយចិត្តជាមួយអាជ្ញាធរមូលដ្ឋាន ក្នុងការជួយសម្រាលទុក្ខលំបាករបស់បងប្អូនប្រជាពរដ្ឋដែលងាយរងគ្រោះបំផុត ស្ថិតក្នុងតំបន់ក្រហម នៃការរីករាលដាលជំងឺកូវីដ-១៩ ហើយក្នុងនាមជាប្រតិបត្តិករមនុស្សធម៌ ចុះបេសកម្មថ្ងៃនេះ ប្អូនៗត្រូវអនុវត្តន៍ឱ្យបានខ្ជាប់ខ្ជួនបំផុតចំពោះវិធានការរបស់រាជរដ្ឋាភិបាល ៣កុំ និង ៣ការពារ៕
អត្ថបទ និង រូបថត ៖ សាខាកាកបាទក្រហមកម្ពុជាខេត្តសៀមរាប
កែសម្រួលអត្ថបទ ៖ លោក លីវ សាន្ត
