នៅក្នុងកិច្ចប្រជុំបូកសរុបលទ្ធផលការងារសុវត្ថិភាពចរាចរណ៍ផ្លូវគោក ប្រចាំឆមាសទី១ និងទិសដៅការងារឆមាសទី២ ឆ្នាំ២០២១ តាមប្រព័ន្ធវីដេអូ កាលពីថ្ងៃទី២១ ខែកញ្ញា ឆ្នាំ២០២១ ដឹកនាំដោយសម្ដេចក្រឡាហោម ស ខេង ឧបនាយករដ្ឋមន្រ្តី រដ្ឋមន្រ្តីក្រសួងមហាផ្ទៃ បង្ហាញថា នៅឆមាសទី១ ឆ្នាំ២០២១ ករណីគ្រោះថ្នាក់ចរាចរណ៍សរុបនៅទូទាំងប្រទេស មានចំនួនជាង ១,២០០លើក និងមានអ្នកស្លាប់សរុបជាង ៧០០ករណី ក្នុងនោះខេត្តសៀមរាប មានអ្នកស្លាប់សរុបជាង២០នាក់។
តាមការបង្ហាញដោយ លោកជំទាវ មិន មាណាវី រដ្ឋលេខាធិការក្រសួងសាធារណៈការ និងដឹកជញ្ជូន និងជាអគ្គលេខាធិការគណៈកម្មាធិការជាតិសុវត្ថិភាពចរាចរណ៍ផ្លូវគោក បញ្ជាក់ថា តំបន់ដែលមានករណីគ្រោះថ្នាក់ចរចរណ៍ច្រើនជាងគេ រួមមាន រាជធានីភ្នំពេញ ខេត្តកណ្ដាល និងខេត្តស្វាយរៀង។ ទោះបីមានចំនួនអ្នកស្លាប់ជាង៧០០នាក់ក្ដី ប៉ុន្តែបើធៀបនឹងរយៈពេលដូចគ្នា ករណីគ្រោះថ្នាក់ចរាចរណ៍ទូទាំងប្រទេសនៅឆមាសទី១នេះ បានថយចុះ៣៥៨លើក ស្មើនឹង ២២ភាគរយ និងករណីស្លាប់ថយចុះ ១៥២នាក់ ស្មើនឹង១៨ភាគរយ។
ដោយឡែកសម្រាប់ខេត្តសៀមរាប បើតាមរបាយការណ៍របស់អនុគណៈកម្មការសុវត្ថិភាពចរាចរណ៍ផ្លូវគោកខេត្តសៀមរាប បង្ហាញថា ករណីគ្រោះថ្នាក់ចរាចរណ៍ក្នុងខេត្តសម្រាប់ឆមាសទី១ ឆ្នាំ២០២១នេះ មានចំនួនសរុប ២៥ករណី ថយចុះ ៥ករណី ស្មើនឹងជាង ១៦ភាគរយ និងស្លាប់សរុប ២៦ករណី ថយចុះ១២ករណី ស្មើនឹងជាង៣១ភាគរយ។ តាមរបាយការណ៍ដដែលនេះ ក៏បានបញ្ជាក់ផងដែរថា ក្រុមការងារ បានត្រួតពិនិត្យយានយន្តលើដងផ្លូវ ក្នុងភូមិសាស្ត្រខេត្តសៀមរាប ខុសបច្ចេកទេសសរុប ២៥១គ្រឿង និងពិនិត្យឃើញអ្នកបើកបររថយន្ត និងអ្នករួមដំណើរមានសារធាតុញៀនសរុប៤៦នាក់។
អត្ថបទ៖ លោក សេង ផល្លី
រូបភាព៖ មន្ត្រីការិយាល័យទូរទស្សន៍
