កាលពីរសៀលថ្ងៃទី២១ ខែកញ្ញា ឆ្នាំ២០២១ ម្សិលមិញនេះ អាជ្ញាធរសង្កាត់ជ្រាវ ក្រុងសៀមរាប ទទួលបានអំណោយជាគ្រឿងបរិភោគជាអង្ករចំនួន២តោន រួមជាមួយនឹងត្រីខ ប្រេងឆា និងប៊ីចេងមួយចំនួន ពីលោក គង់ ប៊ឹប ជាសប្បុរសជនក្នុងសង្កាត់សង្កាត់ជ្រាវ សម្រាប់ជួយប្រជាពលរដ្ឋងាយរងគ្រោះ និង ជួបការលំបាក ដែលកំពុងរស់នៅស្ថិតក្នុងតំបន់ពណ៌ក្រហម។
មានប្រសាសន៍ក្នុងឱកាសនោះ លោក ក្អោប រ៉ន ចៅសង្កាត់ជ្រាវ ក្រុងសៀមរាប បានសម្ដែងនូវការអរគុណចំពោះលោក គង់ ប៊ឹប ដែលបានឧបត្ថម្ភជាគ្រឿងបរិភោគសម្រាប់ផ្តល់ជូនពលរដ្ឋក្នុងសង្កាត់ជួបការលំបាកខ្វះខាត ដែលកាយវិការសប្បុរសធម៌នេះ គឺជាការចូលរួមចំណែកជាមួយរាជរដ្ឋាភិបាល ជាពិសេសរដ្ឋបាលខេត្តតែម្តង ក្នុងអំឡុងពេលប្រយុទ្ឋទប់ស្កាត់នៅការពារការឆ្លងរីករាលដាលដោយជំងឺកូវីដ-១៩នេះ ខណៈដែលសង្កាត់ជ្រាវនេះ ត្រូវបានរដ្ឋបាលខេត្តកំណត់ជាតំបន់ក្រហម ហើយក្នុងពេលបិទខ្ទប់នេះ សង្កាត់ក៏ទទួលបានអង្ករ និងគ្រឿងបរិភោគមួយចំនួនរួចហើយពីរដ្ឋបាលក្រុងសៀមរាប សម្រាប់ជួយបន្ទាន់ដល់ពលរដ្ឋដែលមានបណ្ណក្រ១ និងក្រ២ ។
សូមបញ្ជាក់ថា៖កាលពីថ្ងៃទី១៧ ខែកញ្ញា ឆ្នាំ២០២១នេះ រដ្ឋបាលខេត្តសៀមរាប បានសម្រេចកំណត់ជា “តំបន់ក្រហម” នៅក្នុងភូមិសាស្ត្រភូមិ និងសង្កាត់មួយចំនួនក្នុងក្រុងសៀមរាប ជាបណ្តោះអាសន្នរយៈពេល ១សប្តាហ៍ គិតចាប់ពីថ្ងៃទី១៧ ដល់ថ្ងៃទី២៣ ខែកញ្ញា ឆ្នាំ២០២១ ក្នុងនោះមាន ៖ សង្កាត់ស្លក្រាម , សង្កាត់ស្វាយដង្គំ , សង្កាត់គោកចក , សង្កាត់ជ្រាវ , ភូមិតាវៀន ក្នុងសង្កាត់សាលាកំរើក និង ភូមិព្រៃធំ , ភូមិស្រង៉ែ ក្នុងសង្កាត់ស្រង៉ែ ដើម្បីទប់ស្កាត់ការឆ្លងរាលដាលនៃជំងឺកូវីដ-១៩៕
អត្ថបទ និង រូបថត ៖ លោក ជា ស្រស់
កែសម្រួលអត្ថបទ ៖ លោក លីវ សាន្ត
