នៅរសៀលថ្ងៃទី២១ ខែកញ្ញា ឆ្នាំ២០២១ លោក ពិន ប្រាកដ អភិបាលរងខេត្ត តំណាងដ៍ខ្ពង់ខ្ពស់ឯកឧត្តម ទៀ សីហា អភិបាលខេត្តសៀមរាប បានអញ្ជើញទទួលអំណោយពីក្រុមហ៊ុន មីជាតិ នូវទឹកពិសាវីតាល់ ចំនួន ១០០០កេស និងមីជាតិ ចំនួន ១០០០កេស សម្រាប់ចែកជូនប្រជាពលរដ្ឋដែរកំពុងជួបការលំបាកនៃការឆ្លងជំងឺកូវីដ-១៩ ជាពិសេសបងប្អូនប្រជាពលរដ្ឋដែរកំពុងរស់នៅក្នុងទីតាំងដែរបានបិទខ្ទប់ និងដាក់ជាតំបន់ក្រហម និងតំបន់លឿងទុំ ក្នុងក្រុងសៀមរាប។
លោក ពិន ប្រាកដ មានប្រសាសន៍ថា អាជ្ញាធរខេត្តសៀមរាបក្រោមការដឹកនាំរបស់ឯកឧត្តម ទៀ សីហា អភិបាលខេត្ត ឯកឧត្តមបានយកចិត្តទុកដាក់ គិតគូរពីសុខទុក្ខរបស់បងប្អូនប្រជាពលរដ្ឋគ្រប់ទីកន្លែង និងខិតខំប្រឹងប្រែងពន្យល់ណែនាំអប់រំជារឿយៗ នូវវិធីសាស្ត្រ និងការណែនាំនានារបស់ក្រសួងសុខាភិបាល ក៍ដូចជាវិធានការផ្សេងៗ របស់រាជរដ្ឋាភិបាលក្នុងការប្រយុទ្ឋប្រឆាំងជាមួយនឹងជំងឺកូវីដ-១៩ ជាក់ស្តែងបច្ចុប្បន្ននេះ រដ្ឋបាលខេត្តសៀមរាបបាននឹងកំពុងយកចិត្តទុកដាក់ ក្នុងការអនុវត្តវិធានការបង្ការទប់ស្កាត់ ការឆ្លងរីករាលដាលជំងឺកូវីដ-១៩ ចូលដល់សហគមន៍ តាមបទបញ្ជា និងវិធានការ គឺ៣ការពារ និង៣កុំ របស់ប្រមុខរាជរដ្ឋាភិបាល និងវិធានការណែនាំរបស់ក្រសួងសុខាភិបាល បានយ៉ាងល្អប្រសើរផងដែរ ។
លោក ពិន ប្រាកដ មានប្រសាសន៍ទៀតថា បញ្ហាការប្រយុទ្ធប្រឆាំង និងការបង្ការទប់ស្កាត់ជំងឺកូវីដ-១៩ គឺជាបញ្ហារួមរបស់យើងទាំងអស់គ្នា មិនមែនជាបញ្ហារបស់បុគ្គលណាម្នាក់ឡើយ ទាំងថ្នាក់ដឹកនាំ មន្ត្រីរាជការ កងកម្លាំងប្រដាប់អាវុធ ព្រះសង្ឃ ប្រជាពលរដ្ឋទូទៅ ត្រូវតែចូលរួមបង្ការទប់ស្កាត់ទាំងអស់គ្នា ខណៈបច្ចុប្បន្នជំងឺកូវីដ-១៩ បាននឹងកំពុងបន្តតាមយាយីដល់សុខភាពរបស់មនុស្សនៅទូទាំងពិភពលោក ក៏ដូចជាប្រទេសកម្ពុជានៅឡើយ។ ជាមួយគ្នានេះ លោកអភិបាលរងខេត្ត ក៏បានថ្លែងអំណរគុណចំពោះក្រុមហ៊ុន មីជាតិ ដែលតែងតែជួយដើម្បីចូលរួមចំណែកក្នុងការទប់ស្កាត់ជំងឺកូវីដ-១៩ ដែលកំពុងតែឆ្លងក្នុងសហគមន៍នៃព្រឹត្តិការណ៍ ២០ កុម្ភៈកន្លងមកនេះ៕
អត្ថបទ និង រូបថត ៖ លោក ស៊ាន សុផាត
កែសម្រួលអត្ថបទ ៖ លោក លីវ សាន្ត
