ឯកឧត្ដមកិត្តិនីតិកោសលបណ្ឌិត ងួន ញ៉ិល អនុប្រធានទី១រដ្ឋសភា និងជាប្រធានគណៈកម្មការរៀបចំកិច្ចប្រជុំភាពជាដៃគូសភាអាស៊ី-អឺរ៉ុបលើកទី១១ (ASEP11) នៅរសៀលថ្ងៃទី២០ ខែកញ្ញា ឆ្នាំ២០២១ បានអញ្ជើញជាអធិបតីភាព ដឹកនាំកិច្ចប្រជុំគណៈកម្មការរៀបចំ ដើម្បីពិនិត្យអំពីវឌ្ឍនភាពការងារដែលបានរៀបចំកន្លងមក និងពិភាក្សាអំពីទិសដៅការងារបន្ត ដូចជាផ្នែកខ្លឹមសារនិងឯកសារកិច្ចប្រជុំ ការងាររដ្ឋបាល ពិធីការ និងជាពិសេសការងារបច្ចេកទេសព័ត៌មានវិទ្យា (ICT) សម្រាប់ឆ្ពោះទៅរៀបចំ និងដឹកនាំកិច្ចប្រជុំភាពជាដៃគូសភាអាស៊ី-អឺរ៉ុបលើកទី១១ តាមអនឡាញ ONLINE ឬហៅថាប្រព័ន្ធនិម្មិត ដែលនឹងប្រព្រឹត្តទៅនៅថ្ងៃទី១៦ ខែវិច្ឆិកា ឆ្នាំ២០២១ខាងមុខ។
កិច្ចប្រជុំនេះរៀបចំឡើងនៅវិមានរដ្ឋសភា ដោយមានការអញ្ជើញចូលរួមពី លោកជំទាវកិត្តិសង្គហបណ្ឌិត ឃួន សុដារី អនុប្រធានទី២រដ្ឋសភា និងជាអនុប្រធានគណៈកម្មការរៀបចំកិច្ចប្រជុំភាពជាដៃគូសភាអាស៊ី-អឺរ៉ុបលើកទី១១ និងឯកឧត្តម លោកជំទាវ ជាប្រធានអនុគណៈកម្មការរៀបចំទាំង៦ ប្រធានគណៈប្រតិភូ និងប្រធានដឹកនាំកិច្ចប្រជុំក្រុមពិភាក្សាទាំងបី ព្រមទាំងមន្ត្រីជំនាញមួយចំនួនទៀត។
ឯកឧត្តមកិត្តិនីតិកោសលបណ្ឌិត បានមានប្រសាសន៍ថា កាលបរិច្ឆេទនៃកិច្ចប្រជុំភាពជាដៃគូសភាអាស៊ី-អឺរ៉ុបលើកទី១១ (ASEP11) ដែលសភានៃព្រះរាជាណាចក្រកម្ពុជាធ្វើជាម្ចាស់ផ្ទះរៀបចំ គឺនៅសល់រយៈពេលតែជាង១ខែទៀតទេ នឹងដល់ថ្ងៃនៃកិច្ចប្រជុំដែលត្រូវរៀបចំតាមអនឡាញ ឬហៅថាប្រព័ន្ធនិម្មិត (Virtual Meeting)។ កិច្ចប្រជុំតាមរយៈអនឡាញបែបនេះគឺជាការរៀបចំលើកទី១ហើយសម្រាប់វេទិកាកិច្ចប្រជុំភាពជាដៃគូសភាអាស៊ី-អឺរ៉ុប (ASEP) និងក៏ជាលើកទី១ដែរសម្រាប់សភាកម្ពុជា ដែលទទួលរៀបចំកិច្ចប្រជុំអនឡាញ ហើយមានទ្រង់ទ្រាយធំបែបនេះ។
ព័ត៌មានជាតិ ថ្មីៗ
ឯកឧត្ដមកិត្តិនីតិកោសលបណ្ឌិត ងួន ញ៉ិល ក៏បានមានប្រសាសន៍លើកឡើងពីបញ្ហ ការអញ្ជើញតំណាងអង្គការខ្លះចូលរួមជាភ្ញៀវកិច្ចប្រជុំ។ ការជ្រើសរើសវាគ្មិន និងអ្នករាយការណ៍សម្រាប់កិច្ចប្រជុំក្រុមពិភាក្សានីមួយៗ។ ការកំណត់ពេលវេលាដែលត្រូវផ្ញើរសេចក្ដីព្រាងសេចក្ដីប្រកាស(Zero Draft) ទៅប្រទេសសមាជិក Asep ទាំងអស់ ។ ការរៀបចំស្ប៉តជាឃ្លីបវីដេអូខ្លីសម្រាប់ចាក់បញ្ចាំងនៅមុនពេលពិធីបើកកិច្ចប្រជុំ និងទីកន្លែង(សាល)ដែលត្រូវរៀបចំពិធីបើក និងដំណើរការកិច្ចប្រជុំជាដើម។
ក្នុងឱកាសនោះដែរ ឯកឧត្តម ឡេង ប៉េងឡុង អគ្គលេខាធិការរដ្ឋសភា និងជាប្រធានលេខាធិការដ្ឋានជាតិ ASEP-11 បានរាយការណ៍សង្ខេបអំពីលទ្ធផលការងារត្រៀមសម្រាប់ការរៀបចំកិច្ចប្រជុំខាងលើ ហើយសមាជិកអង្គប្រជុំផ្សេងៗទៀតក៏បានចូលរួមមតិយោបល់ ពិភាក្សាផងដែរ។
អង្គប្រជុំ ក៏បានទទួលនូវការចូលរួមផ្ដល់មតិយោបល់ ពិភាក្សាយ៉ាងក្បោះក្បាយ ពីលោកជំទាវ ឯកឧត្ដម ជាសមាជិកនៃអង្គប្រជុំដែលបានចូលរួមនាពេលនេះ។
ឯកឧត្ដមកិត្តិនីតិកោសលបណ្ឌិត ងួន ញ៉ិល បានថ្លែងអំណរគុណចំពោះការចូលរួមផ្ដល់មតិយោបល់ របស់លោកជំទាវ ឯកឧត្ដមទាំងអស់ និងសូមស្នើឲ្យអនុគណៈកម្មការនានា ចំណុះគណៈកម្មការរៀបចំ បន្តធ្វើការងារតាមមុខសញ្ញារៀងៗខ្លួន ពិសេសអនុគណៈកម្មការព័ត៌មាននិងអាយស៊ីធី ត្រូវសិក្សាជាមួយអង្គភាពជំនាញ សំដៅធ្វើយ៉ាងណាត្រៀមលក្ខណៈសម្បត្តិឲ្យបានគ្រប់ជ្រុងជ្រោយ ដើម្បីធានាឲ្យកិច្ចប្រជុំតាមប្រព័ន្ធនិម្មិតនេះ ប្រព្រឹត្តទៅដោយរលូន និងចៀសវាងភាពរអាក់រអួល។
ឯកឧត្ដមកិត្តិនីតិកោសលបណ្ឌិតប្រធានគណៈកម្មការរៀបចំកិច្ចប្រជុំភាពជាដៃគូសភាអាស៊ី-អឺរ៉ុបលើកទី១១ ក៏បានជំរុញឲ្យលេខាធិការដ្ឋាន (ASEP11) រៀបចំការងារ និងឯកសារពាក់ព័ន្ធនានាដាក់ជូនអនុគណៈកម្មការខ្លឹមសារ និងឯកសារពិនិត្យឲ្យបានគ្រប់ជ្រុងជ្រោយ និងទាន់ពេលវេលាដើម្បីដាក់ជូនថ្នាក់ដឹកនាំពិនិត្យសម្រេច។ ហើយលេខាធិការដ្ឋាន (ASEP11) ក៏ត្រូវ បន្តធ្វើទំនាក់ទំនងជាប្រចាំជាមួយក្រសួងការបរទេស និងសហប្រតិបត្តិការអន្តរជាតិ និងទំនាក់ទំនងជាមួយមន្ត្រីសម្របសម្រួលការងារ ASEP នៅទីក្រុងប្រ៊ុយស៊ែល ដើម្បីធ្វើយ៉ាងណាឱ្យការរៀបចំកិច្ចប្រជុំនេះ ប្រព្រឹត្តទៅបានរលូននិងទទួលបានជោគជ័យ៕
