ព្រៃឈើមិនត្រឹមតែជួយលើកសម្រស់ និងបរិស្ថាន ក្នុងតំបន់រមណីយដ្ឋានអង្គរប៉ុណ្ណោះទេ ថែមទាំងបានជួយការពារទប់លំនឹងប្រាសាទទៀតផង ព្រោះថាមានព្រៃឈើទើបមានទឹកហើយ ទឹកមានសារប្រយោជន៍ខ្លាំងណាស់ សម្រាប់ការពារលំនឹងគ្រឹះប្រាសាទបុរាណ ព្រោះវាមានទំនាក់ទំនងទៅនឹងគ្រឺះប្រាសាទ និងបរិស្ថានជុំវិញមិនអាចកាត់ផ្តាច់បានព្រៃឈើក្រៅពីផ្តល់នូវសោភណ្ឌភាព ទេសភាពធម្មជាតិ វានៅបានចូលរួម ក្នុងការកាត់បន្ថយកំដៅនិងគ្រោះថ្នាក់ធម្មជាតិផ្សេងៗ។
បើតាមលោក យិត ចាន់ដារដ្ឋ អគ្គនាយករងអាជ្ញាធរជាតិអប្សរា កាលរសៀលថ្ងៃទី១៦ ខែកញ្ញា ឆ្នាំ២០២១ បានឱ្យដឹងថា អាជ្ញាធរជាតិអប្សរាក្រៅពីការងារអភិរក្ស និងជួសជុលប្រាង្គប្រាសាទ ក៍នៅមានកិច្ចការស្នូលជាចម្បងមួយទៀតគឺ កិច្ចការលើកតម្លៃទេសភាពវប្បធម៌នៅក្នុងរមណីយដ្ឋានអង្គរទាំងមូល ពោល គឺថែរក្សាធនធានធម្មជាតិ និងធនធានវប្បធម៌» ក្នុងនោះការងារថែរក្សា ការពារព្រៃឈើនិងការដាំស្តារឡើងវិញនៃព្រៃរិចរិលក្នុងតំបន់អង្គរ ជាកិច្ចការអាទិភាពសំខាន់មួយ ក្នុងចំណោមការងារសំខាន់ៗជាច្រើនរបស់ស្ថាប័នមួយនេះ។ ជារៀងរាល់ឆ្នាំ អាជ្ញាធរជាតិអប្សរាបានបណ្តុះកូនឈើគ្រប់ប្រភេទ នៅតាមបណ្តាស្ថានីយបណ្តុះកូនឈើគ្រប់ប្រភេទ នៅទីតាំងទាំង១០របស់ខ្លួនបានជាង២០ម៉ឺនដើម ចែកជូនដល់ប្រជាពលរដ្ឋ ព្រះសង្ឃ រួមទាំងស្ថាប័នផ្សេងៗ ទាំងក្នុង និងក្រៅខេត្តសៀមរាបដោយឥតគិតថ្លៃសម្រាប់ដាំ ដើម្បីបង្កើនភាពបៃតងនៃបរិស្ថាន ក្នុងនោះអាជ្ញាធរជាតិអប្សរាបានដាំជាង២ម៉ឹនដើមក្នុង១ឆ្នាំ និងផ្សេងពីនោះចែកជូនដល់គ្រប់ស្ថាប័ន មន្ទីរអង្គភាពដើម្បីសហការដាំក្នុងតំបន់អង្គរ និងនៅតាមស្ថាប័នអង្គភាពរៀងៗខ្លួន។
លោក យិត ចាន់ដារដ្ឋ បន្តថា ក្រៅពីបណ្តុះនិងចែកកូនឈើដល់សាធារណៈជនទូទៅ អាជ្ញាធរអប្សរាក៍មានក្រុមការងារបច្ចេកទេសតាមដាន និងព្យាបាលជំងឺដើមឈើផងដែរ ដោយពួកគាត់ធ្វើការកាត់ក្រីដើមឈើមួយចំនួន និងធ្វើការដកហូតដើមឈើណាដែលបង្កគ្រោះថ្នាក់ដល់ភ្ញៀវ ព្រមទាំងបានធ្វើការព្យាបាល និងបំប៉ន់ជីដល់ដើមឈើដែលមានជំងឺ។ ក្រៅពីនេះក៍មានក្រុមការងារសិក្សាពីហានិភ័យនៃដើមឈើដែលមានភាពអវិជ្ជមានដល់ប្រាង្គប្រាសាទដូចជា ប្រាសាទតាព្រហ្មជាដើម ដែលមុននឹងសម្រេចកាត់ក្រីឬដកហូតចេញ សុទ្ឋតែត្រូវបានក្រុមការងារលើកសំណើរសុំការឯកភាព ICC ដើមី្បធ្វើការកាប់យកចេញ កុំឲ្យឆ្លងជម្ងឺទៅដើមឈើឯទៀត និង កុំឲ្យមានហានីភ័យណាមួយកើតឡើង ដោយសាដើមឈើមួយដើមនេះ នាំឲ្យមានវិបត្តិសារីទៅថ្ងៃក្រោយ។ ក្នុងឆ្នាំ២០២០កន្លងមក ក្រុមការងារបានព្យាបាលដើមឈើក្នុងតំបន់អង្គរបានជាង៣០០ដើម។ ក្រៅពីគុណតម្លៃ និងអត្ថប្រយោជន៍ដ៍ច្រើនលើសលុបនៃដើមឈើ ដូចជាជួយនាំទឹកភ្លៀង ជារបាំងការពារខ្យល់ព្យុហ៍ ជួយការពារការការហូរច្រោះដី ទប់លំនឹងកុំឱ្យបាក់ស្រុតនៃគ្រឺះប្រាសាទនានា រក្សាសីតុណ្ហភាព កាត់បន្ថយភាពពុកផុយនៃថ្មប្រាសាទ ។ល។ ដើមឈើក៍ផ្តល់នូវហានិភ័យ ឬគុណវិបត្តិចំពោះយើងផងដែរ ដូចជា ដុះកៀកនឹងប្រាសាទ ដុះកៀកនឹងសហគមន៍មនុស្ស ដែលទាមទារឱ្យ ក្រុមការងារហានិភ័យដើមឈើ យកចិត្តទុកដាក់ពិនិត្យតាមដាននងលើកសំណើរទៅថ្នាក់ដឹកនាំ ដើម្បីកាប់ចេញឬដកហូត បញ្ចៀសនូវផលប៉ះពាល់អវិជ្ជមានដល់ជីវិតមនុស្ស និងប្រាង្គប្រាសាទដែលគិតមកដល់ពេលនេះ ដើមឈើដែលបង្កហានិភ័យក្នុងតំបន់រមណីយដ្ឋានអង្គរ មានប្រមាណជា ៣ពាន់ដើម៕
អត្ថបទ និង រូបភាព៖ លោក យូ វង្ស
