នាព្រឹកថ្ងៃទី២៤ ខែកញ្ញា ឆ្នាំ២០២១នេះ លោក ហាក់ សេង ជាប្រជាពលរដ្ឋរស់នៅភូមិជន្លង់ សង្កាត់សាលាកំរើក ក្រុងសៀមរាប បាននាំយកអង្ករចំនួន២តោន រួមជាមួយឯកសណ្ឋានសម្រាប់ប្រជាការពារចំនួន៣០កំប្លេ ដែលជារបស់ខ្លួនផ្ទាល់ ប្រគល់ជូនដល់រដ្ឋបាលសង្កាត់ជ្រាវ សម្រាប់សកម្មភាពប្រយុទ្ធប្រឆាំងជំងឺកូវីដ-១៩នៅក្នុងមូលដ្ឋាន។
ក្នុងនាមលោក ក្អោប រ៉ន ចៅសង្កាត់ជ្រាវ ក្រុងសៀមរាប លោក គង់ ប៊ឹប ចៅសង្កាត់រងទី១ នៃសង្កាត់ជ្រាវ បានថ្លែងនូវការអរគុណចំពោះ លោក ហាក់ សេង ដែលបានបរិច្ចាគធនធានផ្ទាល់ខ្លួន ឧបត្ថម្ភជូនដល់រដ្ឋបាលសង្កាត់ ដើម្បីចែកជូនដល់ប្រជាពលរដ្ឋក្រីក្រ ដែលនៅក្នុងតំបន់បិទខ្ទប់ ក៏ដូចជាពលរដ្ឋដែលកំពុងធ្វើចត្តាឡីស័ក ឬកំពុងព្យាបាលនៅតាមផ្ទះក្នុងមូលដ្ឋានសង្កាត់ជ្រាវ ហើយក្នុងនាមអាជ្ញាធរសង្កាត់ទាំងមូល នឹងប្រើប្រាស់ជំនួយឧបត្ថម្ភនេះ ឲ្យចំគោលដៅ និងស្មើភាពដោយមិនរើសអើង ឬប្រកាន់និន្នាកាអ្វីឡើយ។
គួររំលឹកថា កាលពីថ្ងៃទី២៣ ខែកញ្ញា ឆ្នាំ២០២១ ម្សិលមិញនេះ រដ្ឋបាលខេត្តសៀមរាប បានសម្រេចកំណត់ជា “តំបន់ក្រហម” ក្នុងភូមិសាស្ត្រភូមិខ្នារ នៃសង្កាត់ជ្រាវ ជាបណ្តោះអាសន្នរយៈពេល ១សប្ដាហ៍ គិតចាប់ពីវេលាម៉ោង២៣:៥៩ នាទី នាថ្ងៃទី២៣ ខែកញ្ញា រហូតដល់ថ្ងៃទី៣០ ខែកញ្ញា ឆ្នាំ២០២១ ក្នុងគោលបំណងធានាដល់ប្រសិទ្ធភាពនៃការគ្រប់គ្រងការឆ្លងរាលដាលនៃជំងឺកូវីដ-១៩ នៅក្នុងភូមិសាស្តដែលត្រូវបិទ និងទប់ស្កាត់ជំងឺនេះមិនឱ្យឆ្លងរាលដាលទៅតំបន់ផ្សេងទៀត រហូតមានការចេញសេចក្ដីសម្រេចជាថ្មី ៕
អត្ថបទ និង រូបតថត ៖ លោ ជា ស្រស់
កែសម្រួលអត្ថបទ ៖ លោក លីវ សាន្ត
