ចាប់ពីថ្ងៃទី១៧ ខែកុម្ភៈ ឆ្នាំ២០១៩នេះតទៅ ក្រុមការងារ ថែរក្សាបរិស្ថានអនាម័យ នៃរដ្ឋបាលក្រុងសៀមរាប បានចាប់ផ្ដើមធ្វើការប្រមូលសារ៉ាយ ស្លែ និងរុក្ខជាតិទឹកតូចៗ ចេញពីក្នុងស្ទឹងសៀមរាប ។
លោក ពៅ សារ៉ាវុធ អភិបាលរងក្រុងសៀមរាប ឲ្យដឹងថា ក្រុមការងារថែរក្សាបរិស្ថានអនាម័យ របស់រដ្ឋបាលក្រុងសៀមរាប បានធ្វើការ ប្រមូលសារ៉ាយ ស្លែ និង រុក្ខជាតិទឹកតូចៗមួយចំនួន ដែលមាននៅក្នុងស្ទឹងសៀមរាប ចាប់ពីចំណុចស្ពានខាងក្រោយ អតីតមន្ទីទេសចរណ៍ចាស់ រហូតដល់ស្ពានព្រះរាជដំណាក់ ។
លោកអភិបាលរង បានឲ្យដឹងថា ដោយសារតែស្ទឹងសៀមរាប ជាស្ទឹងធម្មជាតិសំបូរ ជីវៈចម្រុះ ដូចជា សារ៉ាយ ស្លែ និងរុក្ខជាតិទឹកតូចៗ បានដុះឡើងជាច្រើន ជាពិសេសនូវពេលទឹកគ្មានលំហូ ហើយចំពោះករណីទឹកគ្មានលំហូរនេះ ដោយសារតែយើងត្រូវការសន្សំសំចៃទឹក សម្រាប់ប្រើប្រាស់ និងត្រៀមឆ្លើយតប ចំពោះគ្រោះរាំងស្ងួត ដែលនឹងអាចកើតឡើងក្នុងរដូវប្រាំងខាងមុខនេះ ។
ពាក់ពន្ធ័ នឹងសកម្មភាថែរក្សា បរិស្ថាន អនាម័យ សោភណ្ឌភាព ដងស្ទឹងសៀមរាប នេះដែរ លោកអភិបាលរងក្រុងសៀមរាប បានបញ្ជាក់ថា សម្រាប់ដំណាក់កាលទី១នេះ ក្រុមការងារ នឹងបន្តធ្វើការសម្អាត ចាប់អតីតមន្ទីទេសចរណ៍ចាស់ រហូតដល់ស្ពានវត្តដំណាក់៕
អត្ថបទ និង រូបថត ៖ លោក ជា ស្រស់ និងលោក ខេង ឧត្តម
កែសម្រួលអត្ថបទ ៖ លោក សេង ផល្លី
