មុនការបញ្ចប់ បេសកកម្មការទូតនៅកម្ពុជា អគ្គកុងស៊ុលសាធារណរដ្ឋកូរ៉េ សំណូមពរ អាជ្ញាធរខេត្តសៀមរាប កម្មវិធីនៃការជួបជុំ គ្រប់អគ្គកុងស៊ុលនៃបណ្តាប្រទេស ដែលប្រចាំការនៅខេត្តសៀមរាប រយៈពេល៦ខែម្តង ឬ មួយឆ្នាំម្តង ដើម្បីផ្លាស់ប្តូរនូវរាល់បទពិសោធន៍គ្នានឹងគ្នា។
នៅព្រឹកថ្ងៃទី ១៨ ខែ កុម្ភះ ឆ្នាំ២០១៩នេះ ឯកឧត្តម ទៀ សីហា អភិបាលនៃគណៈអភិបាលខេត្តសៀមរាប បានជួបពិភាក្សាការងារ ជាមួយឯកឧត្តម ផាក សឹង ជីយ៉ូ (Park Seung Gyoo) ប្រធានការិយាល័យកុងស៊ុល នៃសាធារណរដ្ឋកូរ៉េ ប្រចាំខេត្តសៀមរាប នៅរដ្ឋបាលខេត្តសៀមរាប។
ក្នុងជំនួបពិភាក្សានោះ ឯកឧត្តម ផាក សឹង ជីយ៉ូ (Park Seung Gyoo) បានលើកអំពីលទ្ធផល នៃកិច្ចសហប្រតិបត្តិការ រវាងកម្ពុជា និងកូរ៉េ សំខាន់ខេត្តសៀមរាប ជាមួយបណ្តាខេត្ត ក្រុងសម្ព័ន្ធមេត្រីភាពនៃសាធារណរដ្ឋកូរ៉េ ដោយផ្តោតទៅលើវិស័យអប់រំ និង សុខាភិបាល រួមទាំងការបណ្តុះបណ្តាលធនធានមនុស្ស និង វិស័យវិនិយោគទេសចរណ៍ក្នុងខេត្តសៀមរាប ។
ឯកឧត្តម បានបន្ថែមថា ចំពោះសំណូមពរ ដល់អាជ្ញាធរខេត្ត ក្នុងការរៀបចំកម្មវិធីនៃការជួបជុំ គ្រប់អគ្គកុងស៊ុលនៃបណ្តាប្រទេស ក្នុងខេត្តសៀមរាបនេះ គឺដើម្បីផ្លាស់ប្តូរនូវរាល់បទពិសោធន៍រវាងគ្នានឹងគ្នា ព្រមទាំងការកែលម្អបញ្ហាប្រឈម ក្នុងគោលដៅ កិច្ចអភិវឌ្ឍន៍ទីក្រុងទេសចរណ៍ ជាពិសេស ការងារសន្តិសុខ ចំពោះភ្ញៀវ ទេសចរណ៍ និង អ្នកវិយោគិន ដែលបានចូលមកប្រកបការងារនៅខេត្តសៀមរាប។
ក្នុងនោះដែរឯកឧត្តម ទៀ សីហា ក៏បានធ្វើការសាទរផងដែរ ចំពោះសមិទ្ធិផលមួយចំនួន ដែលផ្តើមចេញកិច្ចសហប្រតិបត្តិ ការរវាងប្រទេសទាំងពីរកម្ពុជា កូរ៉េ សំខាន់បណ្តាខេត្ត ក្រុង សម្ព័ន្ធមេត្រីភាពជាមួយខេត្តសៀមរាប បានបង្កើតនូវសមិទ្ធិផលធំៗមួយ ចំនួន សំខាន់លើវិស័យអប់រំ សុខាភិបាល និង ការបណ្តុះបណ្តាលនូវធនធានមនុស្ស និង វិនិយោគលើវិស័យទេសចរណ៍ ។
ឆ្លើយតបទៅនឹងសំណូមពរនេះ ឯកឧត្តម ទៀ សីហា បានធ្វើការឯកភាព ទៅលើសំណើររបស់ឯកឧត្តមអគ្គកុងស៊ុលកូរ៉េ លើកម្មវិធីជួបជុំនេះ ដែលវាគឺជាគន្លឹះមួយដ៏សំខាន់ក្នុងការ ពិភាក្សា ផ្លាស់ប្តូរនូវបទពិសោធន៍ពីគ្នា ដើម្បីចូលរួមក្នុងកិច្ចអភិវឌ្ឍន៍ក្រុងប្រវត្តិសាស្ត្រដ៏ចំណាស់ ក្នុងការទាក់ទាញភ្ញៀវទេសចរណ៍ ចូលមកទស្សនាកម្សាន្ត កាន់តែមានការកើនឡើងថែមទៀត ។
អត្ថបទ និង រូបថត ៖ លោក ម៉ី សុខារិទ្ធ
កែសម្រួលអត្ថបទ ៖ លោក សេង ផល្លី
