ក្បួនដង្ហែពិធីសាសនាដ៏ធំក្នុងក្រុងសៀមរាប ត្រូវបានរៀបចំឡើងនៅរសៀលថ្ងៃទី១៩ កុម្ភៈ ដើម្បីប្រារព្ធពិធីបុណ្យមាឃបូជា។ ក្បួនដង្ហែមាឃបូជាចាប់ផ្តើមនៅម៉ោងជាង ៣រសៀល ដោយមានអ្នកចូលរួមប្រមាណជិត ៣ពាន់អង្គ-នាក់ ដែលបានធ្វើដំណើរចេញពីវត្តដំណាក់។ ពិធីនេះបានទាញចំណាប់អារម្មណ៍ពីភ្ញៀវទេសចរជាតិ និងអន្តរជាតិ រួមនិងប្រជាពលរដ្ឋក្នុងខេត្ត នៅអមសងខាងផ្លូវជាច្រើនផងដែរ។
ក្បួនដង្ហែរមាឃបូជានេះ ចែកជា៦ផែន រួមមានផែនរថយន្តនាំផ្លូវ មានបដាអបអរសាទរ ដង្ហែមាឃមហាបូជា សិស្សសាលាបឋមសិក្សាវត្តបូព៌ លោកគ្រូអ្នកគ្រូ, ផែនរថយន្តពិណពាទ្យ, ផែនរថយន្តព្រះអង្គប្រសូត ព្រះសង្ឃកាន់ទង់ជាតិ ទង់សាសនា ១,២៥០អង្គ, ផែនរថយន្តស្ដេចដំរី បាលិលេយ្យ មានតម្កល់ព្រះអង្គមាស សិស្សានុសិស្ស, ផែនរថយន្តរាជហង្ស និងផែន ក្រុមភ្លេងខ្យងស័ង្ខ រទេះរាជរថតម្កល់ ព្រះចង្កូមកែវ អ្នកស្លៀកក្បិន អាវប៉ាក់ចម្រុះពណ៌កាន់កន្ដ្រកផ្កា រថយន្តព្រះទីនាំង តម្កល់សារីរិកធាតុ និងព្រះអង្គត្រាស់ដឹង រួមនិងពុទ្ធបរិស័ទមានកាន់ទង់សាសនា និងផ្លាឈូក។
គួរឱ្យដឹងដែរថា ក្បួនដង្ហែរមាឃបូជាបានចេញដំណើរពីវត្តដំណាក់ ចេញខាងកើតព្រះវិហារ បត់កែងកសិកម្មចាស់ ឡើងស្ពានថ្មវត្តដំណាក់ត្រង់ទៅមន្ទីរពេទ្យខេត្តទៅស្ដុបសុខា បត់ស្ដាំទៅរង្វង់មូលព្រះរាជដំណាក់ បត់ស្ដាំតាមផ្លូវស្របតាមស្ទឹងសៀមរាប រហូតឡើងស្ពានថ្មវត្តដំណាក់វិញ៕
អត្តបទ៖ម៉ាត់អារីហ្វីន
